కోర్టుల విచారణ లైవ్​ స్ట్రీమింగ్​ కు ప్రత్యేక వేదిక​ ఉండాలి: సీజేఐ

కోర్టుల విచారణ లైవ్​ స్ట్రీమింగ్​ కు ప్రత్యేక వేదిక​ ఉండాలి: సీజేఐ

కోర్టుల వ్యవహారాలను ప్రత్యక్ష ప్రసారం చేయడానికి ఒక స్వతంత్ర వేదిక ఉంటే బాగుంటుందని యోచిస్తున్నట్లు సుప్రీంకోర్టు ప్రధాన న్యాయమూర్తి జస్టిస్​ డి.వై.చంద్రచూడ్​ అభిప్రాయపడ్డారు. భావితరాల కోసం కోర్టుల ప్రొసీడింగ్స్​ ను నిక్షిప్తం చేసే ఉద్దేశంతో ఈ దిశగా ఆలోచిస్తున్నామని ఆయన తెలిపారు. ఇదే అంశంపై సీనియర్​ అడ్వకేట్​ ఇందిరా జైసింగ్​ దాఖలు చేసిన ఓ అభ్యర్ధనపై వాదనలు వినే సందర్భంగా సుప్రీంకోర్టు ప్రధాన న్యాయమూర్తి జస్టిస్​ డి.వై.చంద్రచూడ్​ ఈ వ్యాఖ్యలు చేశారు.

“చాలా హైకోర్టులు కోర్టు వ్యవహారాలను యూట్యూబ్​ లో ప్రత్యక్ష ప్రసారం చేస్తున్నాయి. ఈ లైవ్​ స్ట్రీమింగ్స్​ చేసేందుకు ఒక ప్రత్యేక వేదిక ఉంటే బాగుంటుందని మేం యోచిస్తున్నం. ఇందుకోసం సంస్థాగతమైన ఒక వ్యవస్థ ఉంటే బాగుంటుంది. కరోనా సంక్షోభ సమయంలో కోర్టు వ్యవహారాల ప్రత్యక్ష ప్రసారాలను తాత్కాలిక ప్రాతిపదికన నిర్వహించాం. ఇప్పుడు మనం ఈ ప్రత్యక్ష ప్రసారాలను భవిష్యత్​ తరాలకు చేరవేసే ఉద్దేశంతో నిర్వహిస్తున్నం. మనది చాలా పెద్ద దేశం. దేశంలోని వైవిధ్యం, విస్తృత ప్రయోజనాలు నెరవేర్చేలా వ్యవస్థాగత మార్పులు చేసుకోవాల్సిన అవసరం ఉంది”అని సుప్రీంకోర్టు ప్రధాన న్యాయమూర్తి డి.వై.చంద్రచూడ్​ పేర్కొన్నారు.

 సుప్రీంకోర్టు ప్రొసీడింగ్స్​ ను ప్రత్యక్ష ప్రసారం చేసే ఒక వేదికను సిద్ధం చేయగల ఏజెన్సీని ఎంపిక చేసేందుకు సంబంధించి  సుప్రీంకోర్టుకు చెందిన  ‘ఈ‌‌– కమిటీ’ ఎక్స్​ ప్రెషన్​ ఆఫ్​ ఇంట్రెస్ట్​ ను ఆహ్వానించాలని  భావిస్తోందన్నారు. కాగా, ప్రస్తుతం సుప్రీంకోర్టు ప్రొసీడింగ్స్​ను నేషనల్​ ఇన్ఫర్మాటిక్స్​ సెంటర్​ (ఎన్​ఐసీ)కి చెందిన యూట్యూబ్​ చానల్​ ద్వారా ప్రత్యక్ష ప్రసారం చేస్తున్నాయి.