- సీఎం ఫేస్తోనే ఎన్నికలకు వెళ్లాలని నేతల పట్టు..
- కూటమిలో పార్టీలన్నీ చర్చించి నిర్ణయిస్తాయంటున్న కాంగ్రెస్
పాట్నా: బిహార్లో ప్రతిపక్ష కూటమి ‘మహాఘట్ బంధన్’లో సీఎం అభ్యర్థి ఎంపికపై అనిశ్చితి నెలకొంది. ఆర్జేడీ నేత తేజస్వీ యాదవ్ సీఎం అభ్యర్థిగా ఎన్నికలకు వెళ్లాలని ఆ పార్టీ కోరుకుంటున్నది. కాంగ్రెస్ దీనిపై ఎటువంటి స్పందన తెలియజేయకుండా మౌనం వహిస్తున్నది. సీఎం అభ్యర్థిని ప్రకటించే ఎన్నికలకు వెళ్తామని ఇటీవల మీడియాతో మాట్లాడుతూ తేజస్వీ ప్రకటించారు. మరోవైపు సీఎం అభ్యర్థిపై మహాఘట్బంధన్లోని పార్టీలన్ని సమష్టిగా నిర్ణయం తీసుకుంటాయని కాంగ్రెస్ నేతలు చెప్తున్నారు.
అసెంబ్లీ ఎన్నికలకు మరో 30 రోజులే సమయం ఉన్న నేపథ్యంలో ఈ అనిశ్చితి ఇండియా బ్లాక్ నేతల్లో, కార్యకర్తల్లో టెన్షన్ పెంచుతున్నది. కాంగ్రెస్ సీనియర్ నేత ఉదిత్ రాజ్ మంగళవారం మీడియాతో మాట్లాడుతూ.. ‘‘తేజస్వీ యాదవ్ ఆర్జేడీ పార్టీ సీఎం అభ్యర్థి కావచ్చు. అయితే ఇండియా బ్లాక్ సీఎం ఫేస్ ఎవరనేది కూటమిలోని పార్టీలు నిర్ణయిస్తాయి. కాంగ్రెస్ హైకమాండ్ ఏం నిర్ణయిస్తుందో చూద్దాం” అని అన్నారు. ఉదిత్రాజ్ కామెంట్లపై ఆర్జేడీ కానీ, తేజస్వీ యాదవ్ కానీ ఇంకా స్పందించలేదు.
తేజస్వీ మినహా ఆప్షన్ లేదు
తేజస్వీ యాదవ్ సారథ్యంలో 2020 ఎన్నికలకు వెళ్లిన ఆర్జేడీ పార్టీ 75 సీట్లు గెలిచింది. అధికార బీజేపీ-–జేడీయూ కూటమిని ఓడించాలంటే తేజస్వీ మాత్రమే ఆప్షన్ అని ఆర్జేడీ పార్టీ నేతలు అంటున్నారు. అయితే, దీనిపై కాంగ్రెస్ మౌనం వహిస్తోంది. ఆగస్టు నెలలో బిహార్అసెంబ్లీ ఎన్నికలపై రాహుల్ గాంధీ మీడియాతో మాట్లాడారు. ఈ సందర్భంగా సీఎం అభ్యర్థి ఎవరనే ప్రశ్నకు.. ‘‘దానిపై ఇండియా బ్లాక్లో చర్చ జరుగుతున్నది. మేం కలసి పోటీ చేస్తం. మంచి రిజల్ట్ వస్తుంది” అంటూ స్కిప్ చేశారు. ఆ సమయంలో వేదికపై తేజస్వీ ఆయన పక్కనే కూర్చొని ఉన్నారు. మరోవైపు, బిహార్లో కాంగ్రెస్ పార్టీకి ఉన్న జూనియర్ పార్ట్నర్అనే ముద్రను తొలగించుకునేందుకు ఆ పార్టీ ప్రయత్నిస్తున్నట్టు సమాచారం. రాహుల్ గాంధీ బిహార్లో నిర్వహించిన యాత్రలు, సభల ద్వారా కాంగ్రెస్ బలం పుంజుకున్నట్టు ఇటీవలి సర్వేలు స్పష్టం చేస్తున్నాయి.
