ప్రపంచంలోని ఏడు వింతల్లో ఒకటిగా పేరు ప్రఖ్యాతలు పొందిన తాజ్ మహల్ ను షాజహాన్ కట్టలేదని ఆరోపిస్తూ హిందూ సేన ఢిల్లీ హైకోర్టులో ఒక ప్రజా ప్రయోజన వ్యాజ్యాన్ని దాఖలు చేసింది. రాజా మాన్ సింగ్ ప్యాలెస్‌కు మార్పులు చేసి తాజ్ మహల్‌ను సిద్ధం చేశారంటూ ఆ పిల్‌లో ఆరోపించింది. తాజ్ మహల్‌కు చెందిన చరిత్ర పుస్తకాల్లోని తప్పులను సరిదిద్దాలంటూ హిందూ సేన ఢిల్లీ హైకోర్టును ఆశ్రయించింది. తాజాగా దీనిపై విచారించిన ఢిల్లీ హైకోర్టు.. ఈ విషయంపై భారత పురావస్తు శాఖ దృష్టిసారించాలని ఆదేశించింది.
ఈ పిటిషన్‌పై జస్టిస్ సతీశ్ చంద్ర శర్మ, జస్టిస్ తుషార్ గెడెలాతో కూడిన ధర్మాసనం విచారణ చేపట్టింది. హిందూ సేన ఇదే తరహా పిటిషన్‌తో గతంలో సుప్రీం కోర్టును ఆశ్రయించిన వైనాన్ని ప్రస్తావించింది. కానీ, ఈ విషయంలో భారత పురావస్తు శాఖ (ఏఎస్ఐ) ఇప్పటికీ ఓ నిర్ణయానికి రాలేదని గుర్తించిన ఢిల్లీ హైకోర్టు ఈ విషయంపై దృష్టిసారించాలని ఏఎస్ఐని కోరింది.
తాజ్ మహల్ నిర్మాణానికి సంబంధించి తప్పుడు చారిత్రక వాస్తవాలను ప్రజలకు బోధిస్తున్నారని, వాటిని ప్రదర్శిస్తున్నారని హిందూసేన పిటిషన్‌లో ఆరోపించింది. తాజ్ మహల్ నిర్మాణానికి సంబంధించిన తప్పుడు చారిత్రక వాస్తవాలు ఇప్పటికీ పబ్లిక్ డొమైన్‌లో ఉన్నందున ఇదే కారణం నేటికీ కొనసాగుతోంది. తాజ్ మహల్ విషయంలో తాము లోతైన అధ్యయనం చేశామని, చరిత్ర పుస్తకాల్లో ఈ విషయమై ఉన్న తప్పులు సరిదిద్ది ప్రజలకు ఖచ్చితమైన సమాచారం ఇవ్వాలని అభిప్రాయపడింది. రాజా మాన్ సింగ్ ప్యాలెస్‌ను కూల్చి మొఘలులు తాజ్ మహల్ నిర్మించారనడానికి ఎలాంటి ఖచ్చితమైన ఆధారాలు లేవని పేర్కొంది.
ఆర్కియాలజికల్ సర్వే ఆఫ్ ఇండియా (ASI) తన ASI, ఆగ్రా సర్కిల్ వెబ్‌సైట్‌లో తాజ్ మహల్‌పై విరుద్ధమైన సమాచారాన్ని అందించిందని పిటిషనర్ ఆరోపించారు. దీని ప్రకారం, 1631లో ముంతాజ్ మహల్ మరణించిన ఆరు నెలల తర్వాత, ఆమె మృతదేహాన్ని తాజ్ మహల్ ప్రధాన సమాధిని క్రిప్ట్‌లో ఉంచడానికి ఆగ్రాకు తరలించారని ASI తెలిపింది. 1648లో స్మారక చిహ్నాల సముదాయం పూర్తి కావడానికి 17 సంవత్సరాలు పట్టిందని ASI తెలిపిన తాజ్ మహల్ కోసం అదే వెబ్ పేజీలో అందించిన సమాచారానికి ఇది విరుద్ధంగా ఉంది.
Also Read :- భవిష్యత్ లో నేపాల్ దేశం ఉంటుందా..! ఇంత పెద్ద భూకంపానికి కారణాలు ఏంటీ.. ?
