- ఆయా శాఖల సమన్వయ సమావేశాల్లో కలెక్టర్లు
జనగామ అర్బన్, వెలుగు : నకిలీ విత్తనాలు అమ్మితే కఠిన చర్యలు తప్పవని కలెక్టర్ రిజ్వాన్ బాషా షేక్ హెచ్చరించారు. గురువారం కలెక్టరేట్లోని కాన్ఫరెన్సు హాల్లో డీసీపీ సీతారాం, ఏసీపీ అంకిత్ కుమర్ శంఖ్వార్ తో కలిసి విత్తనాలు, ఎరువులు, పురుగు మందుల డీలర్లకు అవగాహన కార్యక్రమాన్ని నిర్వహించారు. ఈ సందర్భంగా ఆయన మాట్లాడుతూ జిల్లాలో వ్యవసాయ , పోలీస్ , రెవెన్యూ అధికారులు, విత్తన, ఎరువుల డీలర్లు సమన్వయంతో పనిచేయాలని.. నకిలీ, కల్తీ విత్తనాల సరఫరా జరగకుండా చర్యలు చేపట్టాలని సూచించారు.
విత్తనాల విషయంలో రైతులకు సందేహాలు ఉంటే వెంటనే 9398616041 టోల్ఫ్రీ నంబర్ ద్వారా వ్యవసాయాధికారులను సంప్రదించాలని కోరారు. గ్రామ స్థాయిలో రైతులకు నాణ్యమైన విత్తనాల కొనుగోలుపై రైతు వేదికల్లో విస్తృతంగా అవగాహన కార్యక్రమాలు చేపట్టాలని అధికారులకు సూచించారు. నకిలీ విత్తనాలు విక్రయిస్తే దుకాణాల యజమానులపై కఠిన చర్యలు తీసుకుంటామని హెచ్చరించారు. జిల్లా అధికారులతో టాస్క్ఫోర్స్ బృందాలను ఏర్పాటు చేయాలని విస్తృత తనిఖీలు నిర్వహించాలన్నారు. అనంతరం నాణ్యమైన విత్తనాలు, ఎరువులు, పురుగు మందులు రైతులకు విక్రయిస్తామని అధికారులు, డీలర్లు ప్రతిజ్ఞ చేశారు. ఈ కార్యక్రమంలో డీఏవో వినోద్ కుమార్, విత్తనాల అసోసియేషన్ ప్రెసిడెంట్ బజ్జూరి గోపయ్య, ఏడీఏలు, అన్ని మండలాల వ్యవసాయ అధికారులు, డీలర్లు, సంబంధిత సిబ్బంది పాల్గొన్నారు.
రైతులను మోసం చేస్తే చర్యలు :
హనుమకొండ : రైతులను మోసం చేసి నకిలీ విత్తనాలు అంటగడితే చట్టప్రకారం సీరియస్యాక్షన్తీసుకుంటామని హనుమకొండ కలెక్టర్ సిక్తా పట్నాయక్ హెచ్చరించారు. పంటల సీజన్ కావడంతో పత్తి, మిర్చీ నకిలీ విత్తనాలు ఎక్కువగా అమ్ముతుంటారని, నకిలీల నియంత్రణకు జిల్లా స్థాయిలో టాస్క్ ఫోర్స్ కమిటీ ఏర్పాటు చేసినట్లు స్పష్టం చేశారు. హనుమకొండ కలెక్టరేట్ లోని కాన్ఫరెన్స్ హాలులో వ్యవసాయ, పోలీస్ శాఖ అధికారులు, విత్తన వ్యాపారులతో సమన్వయ సమావేశం నిర్వహించారు. జిల్లా లో టాస్క్ ఫోర్స్ కమిటీ విస్తృత తనిఖీలు నిర్వహిస్తుందని, నకిలీ విత్తనాలను అమ్మిన వారిపై తప్పకుండా కఠిన చర్యలు తీసుకుంటామని చెప్పారు. ఈ సమావేశంలో జిల్లా అడిషనల్ కలెక్టర్ వెంకట్ రెడ్డి, సెంట్రల్ జోన్ డీసీపీ ఎంఏ బారీ, వ్యవసాయశాఖ జేడీ రవీందర్ సింగ్ పాల్గొన్నారు.
