బిజినెస్ డెస్క్, వెలుగు: ఫిక్స్డ్ డిపాజిట్లు ఎక్కువ మందికి నచ్చే అసెట్క్లాస్. ఈక్విటీలు, ఇతర పెట్టుబడులతో పోల్చితే, ఎఫ్డీలు సురక్షితమే కాక హామీపూర్వక రాబడిని అందిస్తాయి. సాధారణ ఎఫ్డీల కంటే ట్యాక్స్ సేవింగ్ ఎఫ్డీ స్కీములతో పెట్టుబడిదారులు అదనపు లాభాలు పొందవచ్చు. ట్యాక్స్ సేవింగ్ ఎఫ్డీలతో ఆదాయపు పన్ను చట్టం, 1961లోని సెక్షన్ 80 సి కింద పన్ను ప్రయోజనాలను పొందవచ్చు. ట్యాక్స్ సేవింగ్ ఎఫ్డీలలో పెట్టుబడితో ఒక ఆర్థిక సంవత్సరానికి రూ. 1.5 లక్షల వరకు పన్ను మినహాయింపును క్లెయిమ్ చేయవచ్చు. ఈ ఎఫ్డీలకు కనీసం 5 సంవత్సరాల లాక్- ఇన్ పీరియడ్ ఉంటుంది. దానిపై వచ్చే వడ్డీకి ఇన్వెస్టర్ పన్ను బ్రాకెట్ ప్రకారం పన్ను వేస్తారు. పెట్టుబడి ఉమ్మడిగా చేసినట్లయితే, ఎఫ్డీ రసీదులోని మొదటి హోల్డర్ మాత్రమే పన్ను ప్రయోజనాలకు అర్హుడు అవుతాడు. ట్యాక్స్ సేవింగ్ ఎఫ్డీలపై క్యూములేటివ్ (సంచిత), నాన్-క్యుములేటివ్ వడ్డీ చెల్లింపులను ఎంచుకోవడానికి అవకాశం ఉంది. ఆదాయపు పన్ను చట్టాల ప్రకారం, వ్యక్తులు, హిందూ అవిభక్త కుటుంబాలు మాత్రమే ట్యాక్స్ సేవింగ్ ఎఫ్డీలలో పెట్టుబడి పెట్టవచ్చు. ఇట్లాంటి పెట్టుబడులపై అత్యధిక రాబడి రేటును అందించే కొన్ని బ్యాంకుల స్కీముల వివరాలు ఇలా ఉన్నాయి.
ఇండస్ఇండ్ బ్యాంక్
ఇండస్ఇండ్ బ్యాంక్ 5 సంవత్సరాల ట్యాక్స్ సేవింగ్ఇన్వెస్ట్మెంట్లపై 6.5 శాతం వడ్డీ రేటును అందిస్తుంది. అయితే, సీనియర్ సిటిజన్లు ఈ పథకంపై అదనంగా 0.5 శాతం రాబడిని పొందుతారు.
ఆర్బీఎల్ బ్యాంక్
2 నుండి 3 సంవత్సరాల ఎఫ్డీల కోసం ఈ బ్యాంక్ అత్యధికంగా 6.5 శాతం రాబడిని అందిస్తుంది. పన్ను ఆదా పథకాలపై వడ్డీ 6.3 శాతంగా ఉంటుంది. సీనియర్ సిటిజన్లు ఎఫ్డీలపై 6.8 శాతం వడ్డీ పొందుతారు.
ఐడీఎఫ్సీ
రూ. 2 కోట్ల లోపు డిపాజిట్లపై ఐడిఎఫ్సి ఫస్ట్ బ్యాంక్ ట్యాక్స్ సేవర్ స్కీము కింద వడ్డీ రేటు 6.25 శాతం ఉంటుంది. సీనియర్ సిటిజన్లు అదనంగా 0.5 శాతం వడ్డీకి అర్హులు.
డీసీబీ బ్యాంక్
డీసీబీ బ్యాంక్ తన పన్ను ఆదా ఎఫ్డీలపై 5.95 శాతం వడ్డీ రేటును అందిస్తుంది. ఎఫ్డీపై సంపాదించిన వడ్డీని మూడు నెలలకు ఒకసారి పొందవచ్చు.
కరూర్ వైశ్యా బ్యాంక్
రూ.రెండు కోట్లలోపు విలువైన కరూర్ వైశ్యా బ్యాంక్ పన్ను షీల్డ్ ఎఫ్డీ స్కీము డిపాజిట్లపై 5.9 శాతం వడ్డీ ఇస్తారు. మీ దగ్గర అదనంగా డబ్బు ఉంటే ఈ బ్యాంకు ఎఫ్డీల్లో ఏదో ఒకదానిని ఎంచుకోవచ్చు.