యూజర్ల కోసం టెలిగ్రామ్ కొత్త అప్డేట్ తీసుకొస్తోంది. ‘టెలిగ్రామ్ ప్రీమియం’ పేరుతో కొత్త సబ్స్క్రిప్షన్ ప్లాన్ తెచ్చింది. ఈ అప్డేట్ ద్వారా యూజర్లకు సరికొత్త ఫీచర్లు అందుబాటులోకి రానున్నాయి. ఈ ప్రీమియం తీసుకుంటే... యూజర్లు 4 జిబి సైజ్ ఫైళ్లను పంపించొచ్చు, రిసీవ్ చేసుకోవచ్చు కూడా. ఫైళ్లు, ఫొటోల్ని తొందరగా డౌన్లోడ్ చేయొచ్చు. అంతేకాదు టెలిగ్రామ్లో కొత్తగా ఏ ఫీచర్ తెచ్చినా అది ముందుగా ప్రీమియం సబ్స్క్రయిబర్స్కు అందుబాటులో ఉంటుంది. టెలిగ్రామ్ ప్రీమియం సబ్స్క్రిప్షన్ ధర నెలకు 460 రూపాయలు. మామూలుగా అయితే వాయిస్ మెసేజ్లని విన్న తర్వాతే రిప్లయ్ ఇస్తుంటాం. కానీ, ఈ కొత్త ఫీచర్ ఉంటే వాయిస్ మెసేజ్లని వినాల్సిన అవసరం ఉండదు. అవును... టెలిగ్రామ్ ప్రీమియం తీసుకున్నవాళ్లు ఇప్పుడు వాయిస్ మెసేజ్లను టెక్స్ట్ మెసేజ్లుగా మార్చొచు.
యునిక్ స్టిక్కర్లు, రియాక్షన్లు:
టెలిగ్రామ్ ప్రీమియం సబ్స్క్రిప్షన్ తీసుకున్న యూజర్లు దాదాపు12కు పైగా యునిక్ స్టిక్కర్లని వాడుకోవచ్చు. వీటిలో ఫుల్ స్క్రీన్ యానిమేషన్ స్టిక్కర్లు కూడా ఉంటాయి. ప్రీమియం యూజర్లు వీటిని ప్రీమియం తీసుకోనివాళ్లకు పంపొచ్చు. మరో విషయం... ఈ స్టిక్కర్ కలెక్షన్ని ప్రతి నెలా టెలిగ్రామ్ ఆర్టిస్ట్లు అప్డేట్ చేస్తుంటారు. అంతేకాదు మెసేజ్లకు యూనిక్ రియాక్షన్స్ ద్వారా రిప్లయ్ ఇవ్వొచ్చు. టెలిగ్రామ్ ప్రీమియంలో కొత్తగా10 ఎమోజీలు అందుబాటులో ఉన్నాయి .
చాట్ లిస్ట్ మార్చుకోవచ్చు:
చాట్లిస్ట్ని మార్చుకునేందుకు వీలుగా రెండు కొత్త ఫీచర్లు తెచ్చింది. డిఫాల్ట్గా చాట్ ఫోల్డర్లని మార్చుకోవచ్చు. అందుకోసం చాట్లిస్ట్లోని డిఫాల్ట్ ఫోల్డర్ మీద నొక్కిపడితే రీఆర్డర్ ఆప్షన్ వస్తుంది. అప్పుడు ఆ ప్లేస్లో ముఖ్యమైన చాట్ని పెట్టుకోవచ్చు. అంతేకాదు ప్రైవసీ, సెక్యూరిటీ సెట్టింగ్స్లో కొత్త చాట్లని ఆటోమెటిక్గా మ్యూట్ చేసే ఆప్షన్ని ఎనేబుల్ చేయొచ్చు.
యానిమేటెడ్ ప్రొఫైల్ పిక్చర్:
టెలిగ్రామ్ ప్రీమియం తీసుకున్నవాళ్ల ప్రొఫైల్ వీడియోలు మిగతావాళ్లకు యానిమేటెడ్ బొమ్మల్లా కనిపిస్తాయి. చాట్లిస్ట్లో యూజర్ల పేరు పక్కనే ప్రీమియం స్పెషల్ బ్యాడ్జ్ కనిపిస్తుంది. ఇది ప్రీమియం సబ్స్క్రిప్షన్ తీసుకున్నారనేదానికి గుర్తు.
ప్రీమియం సబ్స్క్రిప్షన్ తీసుకుంటే...
యూజర్లు టెలిగ్రామ్లో 500 గ్రూప్స్ని యాడ్ చేయొచ్చు. దాదాపు రెండొందల ముఖ్యమైన జిఐఎఫ్(గ్రాఫిక్ ఇంటర్ఛేంజ్ ఫార్మాట్)లను సేవ్ చేసుకోవచ్చు. అంతేకాదు 20కి పైగా చాట్ ఫోల్డర్స్ని క్రియేట్ చేయొచ్చు. 4జిబి సైజ్ ఫైల్స్ని పంపే అవకాశం ఉండడంతో ఫుల్ హెచ్డి సినిమాలు, మ్యూజిక్ ఆల్బమ్స్ని షేర్ చేయొచ్చు.
క్రోమ్బుక్ని ఫోన్కి కనెక్ట్ చేయొచ్చు
త్వరలో క్రోమ్బుక్ని ఆండ్రాయిడ్ ఫోన్లకు కనెక్ట్ చేసే కొత్త ఫీచర్లు తీసుకురాబోతోంది గూగుల్. క్రోమ్ ఓఎస్ వెర్షన్103 అప్డేట్ సాయంతో క్రోమ్బుక్స్ని ఆండ్రాయిడ్ ఫోన్లకు కనెక్ట్ చేయొచ్చు. అంతేకాదు ఫోన్లో ఈమధ్య తీసిన ఫొటోల్ని, ఫోన్హబ్లోకి వెళ్లి తొందరగా చూడొచ్చు. దాంతో, ఇకపై కొత్తఫొటోల్ని చూసేందుకు వాటిని ఇ–మెయిల్ లేదా గూగుల్ ఫొటోస్లో వెతకాల్సిన అవసరం ఉండదు. ఇంటర్నెట్ లేకున్నా కూడా ఈ ఫీచర్ పనిచేస్తుంది. అంతేకాదు మీకు దగ్గర్లో ఉన్న, సేవ్ చేసిన ఫోన్ వై–ఫైకి క్రోమ్బుక్ని కనెక్ట్ చేసే ఫీచర్ కూడా తేనుందట గూగుల్.
గూగుల్ నెస్ట్ కెమెరా
ఈరోజుల్లో ఇంటి దగ్గర కూడా సెక్యూరిటీ కెమెరాలు పెట్టుకుంటున్నారు చాలామంది. గూగుల్ సంస్థ కూడా సెక్యూరిటీ కెమెరాల్ని తీసుకొచ్చింది. ‘గూగుల్ నెస్ట్’ పేరుతో పిలిచే ఈ కెమెరాలు ఇప్పుడు మనదేశంలోకి వచ్చేశాయి. టాటా ప్లే సంస్థతో కలిసి వీటిని తెచ్చింది గూగుల్. ఇవి టాటా ప్లే శాటిలైట్ ప్లాట్ఫామ్ సాయంతో పనిచేస్తాయి. వీటిలో బ్యాటరీ ఉంటుంది. ఇంటికి దగ్గరగా జంతువులు, వాహనాలు, మనుషులు వస్తే అలర్ట్ చేస్తుంది. లైవ్ వీడియోని 1080 పిక్సెల్, హెచ్డిలో చూపిస్తుంది. ఈ కెమెరాలోని 2 మెగా పిక్సెల్ సెన్సర్ 130 డిగ్రీలు తిరుగుతుంది. వీటి ధర రూ. 11,999. టాటా ప్లే సెక్యూరిటీ ప్లస్ ప్లాన్ తీసుకున్నవాళ్లకు ఈ కెమెరాతో పాటు రూ. 4500 విలువైన గూగుల్ నెస్ట్ మినీ కెమెరా, రెండు నెలలు నెస్ట్ అవేర్ సబ్స్క్రిప్షన్ ఉచితం.
ట్విట్టర్ నోట్స్
ట్విట్టర్ త్వరలోనే ‘నోట్స్’ అనే కొత్త ఫీచర్ను తీసుకురాబోతోంది. ఈ ఫీచర్ వస్తే, యూజర్లు వ్యాసం గురించిన రైటప్స్ని లింక్స్ లాగా పంపించొచ్చు. ‘రైట్’ ఆప్షన్ ద్వారా యూజర్లు ఈ కొత్త ఫీచర్ని ఉపయోగించొచ్చు. ప్రస్తుతం టెస్టింగ్ దశలో ఉన్న ఈ ఫీచర్ ఎప్పుడు అందుబాటులోకి వస్తుందో ఇంకా అనౌన్స్ చేయలేదు.
ఇన్స్టాగ్రామ్లో ఏజ్ వెరిఫికేషన్
ఇన్స్టాగ్రామ్ త్వరలోనే ఏజ్ వెరిఫికేషన్ ఫీచర్ తీసుకురాబోతోంది. తక్కువ టైంలోనే యూజర్ల వయసుని నిర్థారించేందుకు రెండు పద్ధతుల్ని ఎంచుకుంది ఇన్స్టా. వాటిలో మొదటిది వీడియో సెల్ఫీ. రెండోది సోషల్ వౌచింగ్. వీడియో సెల్ఫీ తీసేటప్పుడు యూజర్లు కొన్ని ఇన్స్ట్రక్షన్స్ పాటించాలి. ఈ వీడియో సెల్ఫీని ‘యొటి’ అనే కంపెనీకి షేర్ చేస్తుంది ఇన్స్టాగ్రామ్. ఆ వీడియోలో యూజర్ల ఫేషియల్ ఎక్స్ప్రెషన్స్ని బాగా గమనించి యూజర్ల వయసుని నిర్థారిస్తుంది ఈ కంపెనీ. అందుకు 20 నిమిషాలు పడుతుంది. ఆ తర్వాత ఈ వీడియో ఆటోమెటిక్గా డిలీట్ అవుతుంది. సోషల్ వౌచింగ్ పద్ధతిలో మీకు తెలిసిన ముగ్గురు మీ సరైన వయసుని చెప్తారు. అయితే ఆ ముగ్గురికి కనీసం18 ఏండ్లు ఉండాలి. అంతేకాదు మూడు రోజుల్లో వాళ్లు ‘ఏజ్ వెరిఫికేషన్’ రిక్వెస్ట్కు రిప్లయ్ ఇవ్వాలి.
