రామచంద్రాపురం, వెలుగు : గద్దర్ విగ్రహావిష్కరణ కోసం సంగారెడ్డి జిల్లా తెల్లాపూర్ మున్సిపాలిటీలో కౌన్సిలర్ కొల్లూరి భరత్ ఆమరణ నిరాహార దీక్ష చేపట్టారు. ఈనెల 31న విగ్రహావిష్కరణ కార్యక్రమాన్ని చేయాల్సి ఉండగా విగ్రహం ఏర్పాటు చేస్తున్న స్థలం హెచ్ఎండీఏ పరిధిలోకి వస్తుందని అధికారులు ఫిర్యాదు చేయడంతో పోలీసులు ఆ కార్యక్రమాన్ని అడ్డుకున్నారు. అధికారుల తీరును నిరసిస్తూ కౌన్సిలర్ భరత్ శనివారం ఆమరణ నిరాహార దీక్షకు దిగారు. ఆయన దీక్షకు వివిధ పార్టీలు, యూనియన్ల నాయకులు, హెచ్సీయూ స్టూడెంట్లు, పీఎస్టీయూ స్టూడెంట్ సంఘాల నేతలు, గ్రామస్తులు సంఘీభావం తెలుపుతూ దీక్ష శిబిరంలో కూర్చున్నారు.
ఈ సందర్ఛంగా భరత్ మాట్లాడుతూ.. గతంలో తెల్లాపూర్లో గద్దర్ సంస్మరణ సభ నిర్వహించినపుడు విగ్రహ ఏర్పాటు అంశాన్ని అందరి దృష్టికి తీసుకెళ్లామని, దానికి అనుగుణంగా మున్సిపల్ కౌన్సిల్లో ఏకగ్రీవ తీర్మానం కూడా చేశామని పేర్కొన్నారు. తాజాగా హెచ్ఎండీఏ అధికారులు ఉద్దేశపూర్వకంగానే అనుమతుల పేరుతో ఇబ్బందులకు గురిచేస్తున్నారని, పోలీసులు తమ వారిపై కేసులు నమోదు చేసి అరెస్టులు చేస్తామని బెదిరిస్తున్నారని ఆవేదన వ్యక్తం చేశారు. ఈనెల 31 న డిప్యూటీ సీఎం భట్టి విక్రమార్క చేతుల మీదుగా గద్దర్ విగ్రహాన్ని ఆవిష్కరింపజేస్తామని చెప్పారు. ప్రభుత్వ అధికారులు విగ్రహ ఏర్పాటుకు అనుమతులు ఇచ్చే వరకు దీక్షను ఆపేది లేదని ఆయన స్పష్టం చేశారు.
