- క్లియరెన్స్ సర్టిఫికెట్ కోసం లంచం డిమాండ్
- మీడియేటర్గా వ్యవహరించిన ఏపీ రిటైర్డ్ ఏఆర్ ఎస్ఐ
- పట్టించిన కానిస్టేబుల్
అలంపూర్, వెలుగు: ఓ కేసు విషయంలో రూ.50 వేల లంచం తీసుకున్న టెన్త్ బెటాలియన్ అసిస్టెంట్ కమాండెంట్తో పాటు మీడియేటర్ అయిన రిటైర్డ్ ఏఆర్ ఎస్ఐ ఏసీబీకి చిక్కారు. ఏసీబీ డీఎస్పీ కృష్ణ గౌడ్ కథనం ప్రకారం...జోగులాంబ గద్వాల జిల్లా ఎర్రవెల్లి చౌరస్తా సమీపంలోని టెన్త్ బెటాలియన్ లో కానిస్టేబుల్గా పని చేస్తున్న గోవర్ధన్కు క్లియరెన్స్ సర్టిఫికెట్ ఇవ్వడానికి అసిస్టెంట్ కమాండెంట్ నరసింహస్వామి రూ.50 వేలు లంచం డిమాండ్ చేశాడు.
ఇష్టం లేని గోవర్ధన్ ఏసీబీని ఆశ్రయించాడు. వారి సూచనల మేరకు నరసింహస్వామిని సంప్రదించగా ఆయన ఏపీ కల్లూరులో ఉన్న ఎస్ఏపీ క్యాంప్ రిటైర్డ్ ఏఆర్ ఎస్ఐ అబ్దుల్ వహాబ్కు అలంపూర్ చౌరస్తాలో డబ్బులు ఇవ్వాలని కోరాడు. అతడు చెప్పినట్టే రూ.50 వేలు ఇస్తుండగా ఏసీబీ రైడ్ చేసి వహాబ్ను రెడ్హ్యాండెడ్గా పట్టుకుంది. తర్వాత అతడిని విచారించగా అసిస్టెంట్ కమాండెంట్ నరసింహస్వామి పేరు చెప్పాడు. దీంతో ఇద్దరిని అరెస్ట్ చేసి నాంపల్లి ఏసీబీ కోర్టులో హాజరు పర్చినట్లు తెలిపారు.
