- త్వరలో త్రిమెన్ కమిటీ ఏర్పాటుకు అధికారుల కసరత్తు
- నెల రోజులో మొత్తం 15 డైరెక్టర్ స్థానాలకు ఎన్నికలు
నల్గొండ, వెలుగు: నల్గొండ-–రంగారెడ్డి పాల ఉత్పత్తిదారుల పరస్పర సహాయ సహకార సంఘం(మదర్డెయిరీ) పాలకవర్గాన్ని హైకోర్టు రద్దు చేసింది. గతంలో విధించిన స్టేను బుధవారం రద్దు చేసింది. గత సెప్టెంబర్లో ఖాళీ అయిన మూడు డైరెక్టర్ల స్థానాలకు ఎన్నికలు నిర్వహించలేదు. ఎన్నికలు పెట్టకుండా మ్యాక్స్ చట్టాన్ని ఉల్లంఘించిన పాలకవర్గాన్ని రద్దు చేయాలని పలు సొసైటీల అధ్యక్షులు అప్పటి రంగారెడ్డి జిల్లా డీసీవో, జిల్లా కలెక్టర్కు ఫిర్యాదు చేశారు.
అయితే అప్పటి బీఆర్ఎస్ ప్రభుత్వం రాజకీయ ఒత్తిడి వల్ల అధికారులు చర్యలు తీసుకోలేకపోయారు. రాష్ట్రంలో ప్రభుత్వం మారడంతో వివిధ సొసైటీల అధ్యక్షులు మరోసారి డీసీవో, కలెక్టర్కు ఫిర్యాదు చేశారు. దీంతో రంగారెడ్డి జిల్లా డీసీవో ధాత్రి విచారించి మ్యాక్స్ చట్టాన్ని ఉల్లంఘించారని తేల్చి పాలకవర్గాన్ని రద్దు చేశారు. డీసీవో ఆర్డర్స్ను సవాల్ చేస్తూ డెయిరీ చైర్మన్ శ్రీకర్ రెడ్డి హైకోర్టులో కేసు వేశారు. డీసీవో ఆదేశాలపై డిసెంబర్లో హైకోర్టు స్టే విధించింది. బుధవారం చివరి వాదనల తర్వాత పాలకవర్గాన్ని రద్దు చేస్తూ హైకోర్టు ఉత్తర్వులు జారీ చేసింది.
