పారిస్ : ఫ్రాన్స్ అధ్యక్షుడు ఇమ్మూనుయేల్ మేక్రాన్ ప్రభుత్వానికి దేశ ప్రజలు ఊహించని షాక్ఇచ్చారు. ఫ్రాన్స్ పార్లమెంట్ అయిన నేషనల్‌ అసెంబ్లీకి జరిగిన ఎన్నికల ఫలితాలు సోమవారం (జూన్ 20న) వచ్చాయి. మేక్రాన్ సంకీర్ణ ప్రభుత్వం మెజారిటీని కోల్పోయింది. దీంతో ఫ్రాన్స్రాజకీయాలు గందరగోళంగా మారాయి. మేక్రాన్కూటమి భారీగా స్థానాలను కోల్పోయింది. మితవాద పార్టీలు అనూహ్యంగా పుంజుకున్నాయి. అయితే.. సంపూర్ణ మెజారిటీ దక్కకపోయినా మిగతా పార్టీల కంటే మేక్రాన్ సారథ్యంలోని సెంట్రిస్ట్కూటమి ఎక్కువ స్థానాలను దక్కించుకుంది.
ఫ్రాన్స్‌లో రెండో పార్లమెంట్అయిన జాతీయ అసెంబ్లీ ఎన్నికల్లో అతివాద వామపక్ష నేత జీన్ లూక్ మెలెన్‌చోన్ నేతృత్వంలోని కూటమి 'న్యూప్స్' గతంలో కంటే ఎక్కువ సీట్లు గెలుచుకుంది. మొత్తం 577 స్థానాల్లో 245 సీట్లు మేక్రాన్సంకీర్ణ ప్రభుత్వానికి దక్కాయి. జాతీయ అసెంబ్లీలో సంపూర్ణ మెజారిటీ దక్కాలంటే 289 సీట్లు రావాల్సి ఉంది. జీన్ లూక్ మెలెన్‌చోన్ కూటమి 131 స్థానాల్లో విజయం సాధించి, రెండో స్థానంలో నిలిచింది. మరోవైపు మారీన్ లె పెన్ సారథ్యంలోని అతివాద పార్టీ అయిన సంప్రదాయవాద నేషనలిస్ట్ పార్టీ కూడా పుంజుకుంది. ఈ ఎన్నికల్లో 89 స్థానాలను గెలుచుకుంది.
ఈ ఫలితాలపై అతివాద వామపక్ష నేత జీన్ లూక్ మెలెన్‌చోన్ స్పందించారు. 'అహంకార ప్రభుత్వాన్ని గద్దె దించాలని అనుకున్న నెల రోజుల్లోనే మనం అనుకున్న లక్ష్యాన్ని సాధించుకున్నాం' అని కామెంట్స్ చేశారు. 2000లో వచ్చిన ఎన్నికల సంస్కరణల తర్వాత దిగువ పార్లమెంట్లో మెజారిటీ సాధించని మొదటి సిట్టింగ్ అధ్యక్షుడిగా మేక్రాన్ చరిత్రలో నిలిచిపోనున్నారు.
