నాలుగేండ్ల వయసులో..105 నిమిషాల్లో 36 పుస్తకాలు చదివింది కియారా కౌర్. అందుకుగానూ ‘గిన్నిస్ బుక్ ఆఫ్ వరల్డ్ రికార్డ్స్’లో చోటు దక్కించుకుంది. ఐదేండ్లు వచ్చేసరికి ప్రపంచంలోనే అతి చిన్న వయసు టెడెక్స్ స్పీకర్గా నిలిచింది. ఇప్పుడు ఆరేండ్ల వయసులో దుబాయిలో జరిగిన వరల్డ్
"ఎక్స్పో–2022 వేదికపై మాట్లాడింది. ఒకటో తరగతి చదువుతున్న ఈ చిన్నారి.. ‘చిన్న మార్పులు.. పెద్ద తేడా’ అంటూ వరల్డ్ ఎక్స్పోలో చేసిన ప్రసంగానికి ప్రపంచమంతా చప్పట్లు కొట్టింది. అతి చిన్న వరల్డ్ ఎక్స్పో స్పీకర్’గా గిన్నిస్ వరల్డ్ రికార్డ్స్ కూడా ఈ చిన్నారిని గుర్తించింది. ఈ రికార్డుల చిన్నారి భారతీయ మూలాలున్న కుటుంబంలో పుట్టడం మరో విశేషం.
ఈ చిచ్చర పిడుగు తల్లిదండ్రులిద్దరూ చెన్నై లోనే పుట్టి, పెరిగారు. కానీ, వృత్తిరీత్యా పెండ్లి తర్వాత కొన్నాళ్లు అమెరికాలో ఉన్నారు. కియారా పుట్టాక అక్కడ్నించి దుబాయ్కి షిఫ్ట్ అయ్యారు. అయితే కియారాకి ‘పుస్తకాలంటే ఎందుకింత ఇష్టమ’ని పేరెంట్స్ని అడిగితే.. ‘వాళ్ల తాతయ్య నుంచే తనకి ఈ ఆసక్తి వచ్చింద’ని చెప్పారు. కియారా తాతయ్యకి పుస్తకాలు తప్పించి మరో వ్యాపకం ఉండేది కాదట. కథలు, నవలలు బాగా చదివేవాడట. ఆ అలవాటే వారసత్వంగా ఈ చిన్నారికి వచ్చింది. అక్షరాలు నేర్చుకోవడం మొదలుపెట్టిన రోజు నుంచే పదాలు చదవడానికి ప్రయత్నించేదట కియారా. పోస్టర్లు, హోర్డింగులపై ఉన్న పదాల్ని కూడా వదిలిపెట్టేది కాదట. అది గమనించిన తల్లిదండ్రులు ఎంకరేజ్ చేశారు.
రికార్డులెన్నో..
అలా నాలుగేండ్ల వయసులో 105 నిమిషాల్లో 36 పుస్తకాలు చదివి రికార్డ్స్కి ఎక్కింది కియారా. దాంతో పాటు ఆపకుండా అన్ని పుస్తకాలు చదివినందుకు ‘ఏసియా బుక్ ఆఫ్ రికార్డ్స్’కి కూడా ఎక్కింది. కిందటి ఏడాది చిల్డ్రన్స్ డేకి టెడెక్స్ స్పీకర్గానూ మారింది . అందులో తన బుక్ రీడింగ్ జర్నీతో ఎందరినో ఇన్స్పైర్ చేసింది. పోయిన నెలలో ఏకంగా వరల్డ్ ఎక్స్ పో ఇంటర్నేషనల్ విమెన్స్ వీక్ సెలబ్రేషన్స్లోనూ మాట్లాడింది. ఆ వేదికపై ఈ చిన్నారి విమెన్ ఎంపవర్మెంట్ గురించి ‘చిన్న మార్పు.. పెద్ద తేడా’ అంటూ మాట్లాడిన మాటలు అందర్నీ కదిలించాయి. ఆడపిల్లలకి చదువు, హక్కులు, హెల్త్, డెసిషన్ మేకింగ్, జీతాలు, ప్రొఫెషనల్ కెరీర్.. ఇలా అన్నింట్లో సమానత్వం లభించినప్పుడే అది నిజమైన విమెన్ ఎంపవర్మెంట్ అవుతుందంటూ చెప్పిన మాటలకి ప్రశంసలు దక్కాయి. ఈ స్పీచ్ని చాలా రోజులు ప్రాక్టీస్ చేసిందట కియారా. అయితే చిన్న వయసులో అంతటి ప్రెస్టేజియస్ స్టేజ్ మీద మాట్లాడిన మొదటి చిన్నారి కియారానే అవడంతో మరోసారి వరల్డ్ గిన్నిస్ బుక్ ఆఫ్ రికార్డ్స్లోకి కూడా ఎక్కింది. ఈ చిన్నారి ఒక పుస్తకం కూడా రాసింది.
