చిత్రదుర్గ (కర్నాటక) : ఇస్రో మరో విజయం సాధించింది. ఆదివారం ఉదయం కర్నాటకలోని చిత్రదుర్గలో ఉన్న ఏరోనాటికల్ టెస్ట్రేంజ్(ఏటీఆర్)లో నిర్వహించిన రీయూజబుల్ లాంచ్ వెహికల్(ఆర్ఎల్వీ) ల్యాండింగ్ ప్రయోగం సక్సెస్ అయింది. శాస్త్రవేత్తలు నిర్దేశించుకున్న విధంగా రీయూజబుల్ లాంచ్ వెహికల్(స్పేస్ ప్లేన్) నింగి నుంచి నేల వైపునకు దూసుకొచ్చి.. పూర్తి సెల్ఫ్ కంట్రోల్తో దానంతట అదే ఏటీఆర్ గ్రౌండ్లో ల్యాండ్ అయింది. ప్రయోగంలో భాగంగా ఉదయం 7.10 గంటలకు ఆర్ఎల్వీ స్పేస్ ప్లేన్ను తీసుకొని ఇండియన్ఎయిర్ఫోర్స్కు చెందిన చినూక్ హెలికాప్టర్ గాల్లోకి ఎగిరింది. అది ఆర్ఎల్వీని సముద్ర మట్టం నుంచి 4.5 కిలోమీటర్ల ఎత్తుకు తీసుకెళ్లింది. అనంతరం ఇస్రో కమాండ్ కంట్రోల్ సెంటర్ నుంచి ఆదేశాలు రాగానే.. చినూక్ హెలికాప్టర్ నుంచి ఆర్ఎల్వీ స్పేస్ ప్లేన్ను కిందికి వదిలింది.
తనలో ఉన్న ఇంటిగ్రేటెడ్ నేవిగేషన్ టెక్నాలజీ ద్వారా ఆర్ఎల్వీ నిట్టనిలువునా భూమివైపు దూసుకొచ్చింది. మార్గం మధ్య నుంచి తనపై తాను కంట్రోల్ పొంది.. జర్నీ మొదలుపెట్టింది. లాంచ్ సైట్కు చేరువకాగానే దానిలోని ప్యారచూట్ విచ్చుకుంది. ఉదయం 7.40 గంటలకు అది ల్యాండ్ అయింది. అంటే అర్ధగంట వ్యవధిలోనే ఈ ప్రయోగం విజయవంతంగా పూర్తయింది. ఈ ప్రయోగం కోసం ఇస్రో ఉపయోగించిన ఆర్ఎల్వీ పొడవు 6.5 మీటర్లు, వెడల్పు 3.6 మీటర్లు.
స్పేస్ టూరిజం టెక్నాలజీ దిశగా..
ఇక తమ తదుపరి లక్ష్యం.. ఆర్బిటల్ రీ ఎంట్రీ (ఓఆర్ఈ) ప్రయోగమే అని ఇస్రో చెబుతోంది. స్పేస్ ప్లేన్ను ఒక ప్రత్యేక అసెంట్ వెహికల్ ద్వారా నిర్ణీత కక్ష్యలోకి ప్రవేశపెట్టి.. అక్కడ నిర్ణీత సమయం పాటు ఉన్నాక, భూమికి తిరిగొచ్చేలా చేయడమే ఓఆర్ఈ టెక్నాలజీ ప్రత్యేకత. ఇది కూడా సక్సెస్ అయితే స్పేస్ టూరిజానికి ఇస్రో కూడా రెడీ అయినట్టు అవుతుంది. ఓఆర్ఈ టెక్నాలజీని స్పేస్ ఎక్స్, బ్లూ ఆరిజిన్, బోయింగ్ కంపెనీలు కలిగి ఉన్నాయి.
మరిన్ని వెహికల్స్ తయారీ..
తాజా ప్రయోగం సక్సెస్ కావడంతో ఇస్రో వివిధ రకాల లాంచ్ వెహికల్స్ తయారు చేసేందుకు తలుపులు తెరుచుకుంటాయి. స్పేస్ లాంచ్ వెహికల్స్ మార్కెట్లో ఇస్రోకు విదేశాల నుంచి బిజినెస్ ఆర్డర్స్ కూడా పెరుగుతాయి. ‘‘ఆర్బిటల్ రీ ఎంట్రీ స్పేస్ వెహికల్స్ తయారు చేయాలనే మా చిరకాల స్వప్నానికి చేరువయ్యాం. భారతదేశపు తొలి రీయూజబుల్ లాంచ్ వెహికల్ ఇక త్వరలోనే అందుబాటులోకి వస్తుంది” అని ఇస్రో చైర్మన్ ఎస్.సోమనాథ్ తెలిపారు. సెంటర్ ఫర్ మిలిటరీ ఎయిర్ వర్తీనెస్ అండ్ సర్టిఫికేషన్(సీఈఎంఐఎల్ఏసీ), ఏరోనాటికల్ డెవలప్మెంట్ ఎస్టాబ్లిష్మెంట్(ఏడీఈ), ఏరియల్ డెలివరీ రీసెర్చ్ అండ్ డెవలప్ మెంట్ ఎస్టాబ్లిష్మెంట్(ఏడీఆర్డీఈ) సంస్థలు ఈ ప్రయోగంలో సహకరించాయని చెప్పారు.
