- బీఆర్ఎస్ నుంచి కాంగ్రెస్లో చేరిన వారిలో సంబురం
- పదేళ్లుగా బీఆర్‌‌‌‌ఎస్‌‌ను నమ్ముకున్న నేతల్లో నైరాశ్యం
నల్గొండ, వెలుగు : ఉమ్మడి జిల్లాలో అసెంబ్లీ ఎన్నికల ఫలితాలు కాంగ్రెస్, బీఆర్ఎస్ నేతల జాతకాలను తారుమారు చేశాయి. పదేళ్లుగా పార్టీ కోసం పనిచేస్తూ మూడోసారి అధికారంలోకి వస్తే తప్పక పదవులు వస్తాయని భావించిన బీఆర్ఎస్ నేతల ఆశలు గల్లంతయ్యాయి. జిల్లా కాంగ్రెస్ నాయకత్వం మీద తిరుగుబాటు చేసి చివరి నిమిషంలో బీఆర్ఎస్లో చేరిన నేతల పరిస్థితి అయితే మరింత ఆగమ్యగోచరంగా మారింది. అదే బీఆర్ఎస్ హైకమాండ్పై నమ్మ కం లేక చివరి నిమిషంలో కాంగ్రెస్లో చేరిన నాయకులు మాత్రం తెగ సంబరపడుతున్నారు. కాంగ్రెస్ అధికారంలోకి రావడంతో ఐదేళ్ల వరకు తమకు తిరుగులేదని వారు భావిస్తున్నారు.
పదేళ్ల నుంచి పదవుల కోసం పాకులాట
తెలంగాణ ఉద్యమంలో కీలక పాత్ర పోషించిన ఉద్యమకారులు బీఆర్ఎస్ పార్టీలో తమకు తప్పక పదవి వస్తదని నమ్మకంతో ఉన్నారు. ముఖ్యంగా నల్గొండలో చకిలం అనిల్కుమార్, చాడ కిషన్ రెడ్డి, కోదాడలో కన్మంత శశిధర్ రెడ్డి, ఆలేరులో మాజీ ఎమ్మెల్యే బూడిద భిక్షమయ్యగౌడ్, చివరి నిమిషంలో కాంగ్రెస్ నుంచి బీఆర్ఎస్లో చేరిన డాక్టర్ చెరుకు సుధాకర్, భువనగిరిలో జిట్టా బాలకృష్ణారెడ్డి లాంటి నేతలు అనేక మంది పదవుల కోసం పదేళ్ల నుంచి పాకులాడుతున్నారు. ఇందులో జిట్టా బాలకృష్ణారెడ్డి, చెరుకు సుధాకర్ సొంతంగా పార్టీలు స్థాపించి, చివరకు కాంగ్రెస్లో విలీనం చేశారు.
అయితే తమకు ఆశించిన ప్రయోజనం పార్టీలో దక్కలేదన్న కోపంతో బీఆర్ఎస్లో చేరారు. ఇక 2009లో ఆలేరులో కాంగ్రెస్ ఎమ్మెల్యేగా గెలుపొందిన బూడిద భిక్షమయ్యగౌడ్ బీఆర్ఎస్ నుంచి బీజేపీలోకి, తిరిగి మళ్లీ బీఆర్ఎస్లో చేరారు. మూడోసారి ప్రభుత్వం వస్తే ఎమ్మెల్సీ పదవి వస్తదని ఆశించారు. నల్గొండ మాజీ ఎమ్మెల్యే కంచర్ల భూపాల్ రెడ్డి మీద తిరుగుబాటు చేసిన అనిల్ కుమార్, చాడ కిషన్ రెడ్డి, హైకమాండ్ బుజ్జగించడంతో దారికొచ్చారు.
అధికారంలోకి వస్తే నామినేటెడ్ పదవులు ఇస్తామని కేటీఆర్హామీ ఇవ్వడంతో బీఆర్ఎస్లో కొనసాగారు. చివరి వరకు కాంగ్రెస్లో చేరేందుకు సిద్ధమైన కన్మంత శశిధర్ రెడ్డి కూడా హైకమాండ్ జోక్యం చేసుకోవడంతో సైలెంట్ అయ్యారు. కానీ ఎన్నికల ఫలితాలు వీరిని నట్టేట ముంచాయి.
వలసొచ్చిన నేతలకు కలిసొచ్చిన కాలం...
బీఆర్ఎస్ హైకమాండ్ పెద్దలు పదవులు ఇస్తామని ఆశపెట్టి చివరకు మోసపోయిన సీనియర్లు కాంగ్రెస్లో చేరడం కలిసొచ్చింది. ముఖ్యంగా భువనగిరిలో కుంభం అనిల్ కుమార్ రెడ్డి సీఎం కేసీఆర్ సమక్షంలో బీఆర్ఎస్లో చేరిన కొద్దిరోజులకే మళ్లీ కాంగ్రెస్లో చేరి ఎమ్మెల్యేగా గెలుపొందారు. తుంగతుర్తిలో మందుల సామెల్ బీఆర్ఎస్‌కు రాజీనామా చేసి కాంగ్రెస్లో చేరి ఎమ్మెల్యేగా విజయం సాధించారు.
నకిరేకల్లో మాజీ ఎమ్మెల్యే వేముల వీరేశానికి రెండోసారి ఎమ్మెల్యే అయ్యే ఛాన్స్ దక్కింది. మండలి మాజీ డిప్యూటీ చైర్మన్ నేతి విద్యాసాగర్, మాజీ మంత్రి మోత్కుపల్లి నర్సింహులు మునుగోడు, నల్గొండలో ఎంపీపీలు, జడ్పీటీసీలు, సర్పంచులు, ఎంపీటీసీలు హుజూర్నగర్, దేవరకొండ, నాగార్జునసాగర్లో మున్సిపల్ చైర్మన్లు, కౌన్సిలర్లు, వైస్ చైర్మన్లు గంప గుత్తగా కాంగ్రెస్లో చేరారు.
త్వరలో మరికొందరు ముఖ్యనేతలు కాంగ్రెస్ గూటికి..
త్వరలో మరికొంత మంది బీఆర్ఎస్ ముఖ్యనేతలు కాంగ్రెస్ గూటికి చేరేందుకు సిద్ధమయ్యారు. ఎన్నికలకు 20 రోజుల ముందుగానే పార్టీలో చేరాలని భావించారు. కానీ, బీఆర్ఎస్లో ఉన్నత పదవులు అడ్డువస్తాయని ఆగిపోయారు. ఈ ఎన్నికల్లో పరోక్షంగా కాంగ్రెస్ అభ్యర్థుల గెలుపుకు వారు దోహదపడినట్టు తెలిసింది.
గతంలో కాంగ్రెస్ నుంచి బీఆర్ఎస్లో చేరిన వారే మళ్లీ సొంత గూటికి రావాలని ప్రయత్నిస్తున్నారు. ఈమేరకు తెర వెనక గ ట్టి ప్రయత్నాలే చేస్తున్నట్టు సమాచారం. నల్గొండ, నకిరేకల్, మిర్యాలగూడ, నాగార్జునసాగర్, దేవరకొండ బీఆర్ఎస్లో ముఖ్యనేతలు పార్టీ మారే అవకాశాలు ఉన్నాయి.
