క్లాస్ ఇంట్రెస్టింగ్గా చెప్తేనే శ్రద్ధగా వింటారు స్టూడెంట్స్. అందుకని టీచర్లు కొత్త ప్రయోగాలు చేస్తుంటారు. అలాంటిదే ఈ కొత్తరకం పెన్ను. ఈ పెన్ను స్పెషాలిటీ ఏంటంటే... ఏ టీచర్ అయినా రాకపోతే ఆ రోజుఆ టీచర్ చెప్పాల్సిన పాఠం మిస్ అవుతామనే బెంగ ఉండదు స్టూడెంట్స్కి. అదెలాగంటే... ఈ పెన్ను సాయంతో రికార్డు చేసిన పాఠాల్ని వినొచ్చు. ‘టీచింగ్– లెర్నింగ్’ టెక్నాలజీలో భాగంగా ఈ వెరైటీ పెన్ను తయారు చేశారు నౌరంగాబాద్ ఊళ్లోని గవర్నమెంట్ స్కూల్ టీచర్లు.
హిమాచల్ ప్రదేశ్లోని సిర్మౌర్ జిల్లాలో ఉంది నౌరంగాబాద్. అక్కడి గవర్నమెంట్ స్కూల్ హెడ్మాస్టర్ సైన్స్ టీచర్ సంజీవ్ అత్రి. స్కూల్లో ఏరోజైనా టీచర్ సెలవులో ఉన్నప్పుడు ఆ రోజు స్టూడెంట్స్ క్లాస్ మిస్ అయ్యేవాళ్లు. ఈ సమస్యకు పరిష్కారంగా సెన్సర్ పెన్ను తయారుచేయాలనుకున్నాడు సంజీవ్. ఇదే విషయం టీచర్లకు చెప్తే ‘ఐడియా బాగుంద’న్నారు. మూడు నెలలు కష్టపడి 20 అడుగుల పొడవు, 43 కిలోల బరువు ఉన్న పెన్ను తయారుచేశారు. ఈ భారీ పెన్నుని ఈ మధ్యే స్కూల్ ఎంట్రన్స్ ముందు పెట్టారు. దీనికి ‘శక్తి’ అని పేరు పెట్టారు. ఇందులో రెండు లీటర్ల ఇంక్ పట్టే సదుపాయం ఉంది. దీన్ని కొయ్య, ఇనుముతో తయారు చేశారు. పెన్ను తయారీకి ఖర్చయిన45 వేల రూపాయల్ని టీచర్లు తలా కొంత భరించారు.
సౌండ్ సెన్సర్, సీసీ కెమెరాలు
సెలవులో ఉండే టీచర్లు ముందు రోజు పాఠాల్ని రికార్డ్ చేస్తారు. లేదంటే ఫోన్లో రికార్డు చేసి ప్రిన్సిపల్కి పంపిస్తారు. వాటిని ఈ పెన్నులోని సౌండ్ సెన్సర్ సాయంతో పిల్లలకు వినిపిస్తారు. పాఠాలతో పాటు కథలు, పాటల్ని కూడా రికార్డు చేస్తున్నారు టీచర్లు. ఇందులోని సెన్సర్లు అన్నిరకాల కమాండ్స్ని ఇస్తాయి. ఈ పెన్నులో సీసీ కెమెరాలు కూడా ఉన్నాయి. ప్రస్తుతానికి ప్రపంచంలోనే పొడవైన పెన్ను ఎత్తు 18 అడుగులు. దాంతో ఈ పెన్ను త్వరలోనే ‘లిమ్కా బుక్ ఆఫ్ వరల్డ్ రికార్డ్సు’లోకి కూడా ఎక్కనుంది.