ఆదివాసీ యువత ఎదుర్కొంటున్న సవాళ్లు గురించి ఆదివాసీ సమాజం, ఆదివాసీ మేధావులు ఆందోళన చెందుతున్నారు. ఆదివాసీ ప్రాంతాల్లో నాణ్యమైన విద్య అందకపోవడం, మధ్యలోనే చదువు ఆపేయడం వారి భవిష్యత్తును దెబ్బతీస్తోంది. నిరుద్యోగం, సరైన ఉపాధి మార్గాలు లేకపోవడం వల్ల యువత అసహనానికి గురై పెడదోవ పడుతున్నారు. మద్యం, ఇతర మత్తు పదార్థాలకు త్వరగా బానిసవ్వడం వల్ల ఆరోగ్యం, సామాజిక గౌరవం కోల్పోతున్నారు. ఆధునిక పోకడల ప్రభావంతో తమ మూలాలను, విలువలను మర్చిపోవడం వల్ల వ్యక్తిత్వ లోపాలు తలెత్తుతున్నాయి. ప్రభుత్వాలు, స్వచ్ఛంద సంస్థలు ఆదివాసీ యువతకు వృత్తి విద్యా కోర్సుల్లో శిక్షణ ఇచ్చి స్వయం ఉపాధి కల్పించాలి. చైతన్య కార్యక్రమాలు: మత్తు పదార్థాల వల్ల కలిగే అనర్థాలపై గ్రామాల్లో అవగాహన సదస్సులు నిర్వహించాలి. యువతలో ఉన్న ప్రతిభను గుర్తించి క్రీడలు, కళల వైపు వారిని ప్రోత్సహించాలి.
ఈ సమస్యను పరిష్కరించడంలో ప్రభుత్వ పథకాలతోపాటు, సమాజం ముఖ్యంగా చదువుకున్న ఆదివాసీ యువకులు తమ గూడెంలను మార్చడానికి ముందుకురావాలి. చాలా ఆదివాసీ సంఘాలు తమ భూమి, నీరు, అడవి (జల్, -జంగిల్, -జమీన్) హక్కుల కోసం, రాజ్యాంగం కల్పించిన ఐదవ షెడ్యూల్ రక్షణల కోసం పోరాడుతుంటాయి. యువత తమ సంస్కృతిని, హక్కులను కాపాడుకోవడానికి వీటిలో చేరుతుంటారు. కొన్ని సందర్భాల్లో సంఘాల ముసుగులో యువత తప్పుదోవ పట్టే అవకాశం ఉంది. చదువును నిర్లక్ష్యం చేయడం, హింసాత్మక మార్గాల వైపు ఆకర్షితులు కావడం లేదా చట్టవిరుద్ధ కార్యకలాపాల్లో పాల్గొనడం వంటివి జరిగితే అది కచ్చితంగా ఆందోళనకరమే. సరైన ఉపాధి అవకాశాలు లేకపోవడం వల్ల యువత మద్యానికి అలవాటుపడుతున్నారు. గిరిజన ప్రాంతాల్లో నాటు సారా, బెల్ట్ షాపుల ద్వారా మద్యం విచ్చలవిడిగా లభించడం ఒక ముఖ్య కారణం. యువతకు నైపుణ్య శిక్షణ ఇచ్చి, వారిని స్వయం ఉపాధి వైపు మళ్లించాలి. గ్రామాల్లో అక్రమ మద్యం తయారీని, విక్రయాలను అరికట్టడానికి పోలీసులు, ఎక్సైజ్ శాఖ కఠినంగా వ్యవహరించాలి. కేవలం ప్రభుత్వం మాత్రమే కాకుండా, ఆదివాసీ నాయకులు, మేధావులు బాధ్యత తీసుకుని ఆదివాసీ యువతలో మార్పు తీసుకురావాలి.
- వూకె రామకృష్ణ దొర
