నల్గొండ, వెలుగు : ‘‘డబ్బులతో వచ్చే పదవి నాకొద్దు. అవసరమైతే ప్రజలకోసం ఇంకో గంట కష్టపడ్త” అని గ్రాడ్యుయేట్ ఎమ్మెల్సీ కాంగ్రెస్ అభ్యర్థి తీన్మార్ మల్లన్న అన్నారు. శనివారం నల్గొండ లో జరిగిన సమావేశంలో ఆయన మాట్లాడారు. కేటీఆర్ తన పైన చేసిన కామెంట్లకు తీవ్ర మనస్తాపానికి గురయ్యారు. ‘‘ఒక బీసీ బిడ్డ తెల్ల అంగి వేసుకుంటే కేటీఆర్ ఓర్వలేక పోతున్నడు. ఎన్నికల్లో పోటీ చేస్తే భరించలేకపోతున్నడు. బ్లాక్ మెయిలర్ అని నాపై కేటీఆర్ ఆరోపణలు చేస్తున్నడు. నా ఆస్తులన్నీ ప్రభుత్వానికి రాసిచ్చిన.
నేను బ్లాక్ మెయిలర్ ఎట్లవుత? అసలు బ్లాక్ మెయిలర్ అనేటోడు ఈ రకంగా ఉంటడా? బీసీ బిడ్డ, బడుగు బలహీన వర్గాల బిడ్డ ఎన్నికల్లో పోటీ చేయొద్దా..? కారులో తిరిగితే తప్పా?” అని భావోద్వేగానికి గురయ్యారు. ‘‘నా బిడ్డకు వచ్చిన కష్టం మరే బిడ్డకు రావొద్దని 200 మంది ఆడ పిల్లలకు ఆపరేషన్ చేయించిన. ఈ రకమైన విధానంతో నేను ముందుకు పోతున్న.
అయినప్పటికీ నాపైన ఆరోపణలు చేస్తుంటే.. రైట్ టు రికాల్ పెడ్తా అని చెప్పిన. నన్ను ఎమ్మెల్సీగా గెలిపిస్తే ప్రజల కోసం పనిచేస్త. కాంగ్రెస్ ప్రభుత్వం ఇచ్చిన హామీలను నెరవేర్చేందుకు కృషి చేస్త. లేదంటే ఎమ్మెల్సీ పదవికి రాజీనామా చేస్త” అని తీన్మార్ మల్లన్న స్పష్టం చేశారు.
