ఇరుకైన రణతంబోర్ టైగర్ రిజర్వ్
వేరే చోటుకు తరలించేలా
ఎన్టీసీఏకి ప్రతిపాదనలు
చోటు చాలక జనాలపై
పులుల దాడులు
ఒక్క నెలలోనే ముగ్గురు మృతి
పెద్ద పులులకు రణతంబోర్ టైగర్ రిజర్వ్(ఆర్టీఆర్) ఇరుకైపోయింది. పులుల సంఖ్య పెరిగిపోవడంతో ఆ చోటు వాటికి సరిపోవట్లేదు. పులుల సంఖ్య ఇంకా పెరిగితే వాటి బతుకు చాలా కష్టమైపోతుందట. అందుకే పెద్ద పులుల సంరక్షణను చూసే నేషనల్ టైగర్ కన్జర్వేషన్ అథారిటీ (ఎన్టీసీఏ)కి రాజస్థాన్ వైల్డ్లైఫ్ చీఫ్ వార్డెన్ అరిందమ్ తోమర్ కొన్ని ప్రతిపాదనలు పెట్టారు. రణతంబోర్లోని కొన్ని పులులను ముకుందా హిల్స్ టైగర్ రిజర్వ్ (ఎంహెచ్టీఆర్), సరిస్కా టైగర్ రిజర్వ్ (ఎస్టీఆర్), రామ్గఢ్ విష్ధారి వైల్డ్లైఫ్ శాంక్చువరీకి పంపించాలని కోరారు. ‘‘మా ప్రతిపాదనలకు ఎన్టీసీఏ ఓకే చెప్పింది. ఎన్ని పులులను ఆయా చోట్లకు తరలించాలో ప్రతిపాదనలు తయారు చేస్తాం. ఆ ప్రతిపాదనలను మరోసారి ఎన్టీసీఏకి, పర్యావరణ, అటవీ శాఖకు పంపిస్తాం” అని ఆయన వివరించారు.
1700 చదరపు కిలోమీటర్లు
రణతంబోర్ టైగర్ రిజర్వ్ దాదాపు 1700 చదరపు కిలోమీటర్లకుపైనే విస్తరించి ఉంది. అందులో ప్రధాన ప్రాంతం 392 చదరపు కిలోమీటర్లు కాగా, బఫర్ జోన్ 1342 చదరపు కిలోమీటర్లు. మొత్తం విస్తీర్ణంలో పులులు తిరిగేది 600 చదరపు కిలోమీటర్లలోనే. ప్రస్తుతం ఆర్టీఆర్లో మొత్తం 61 పెద్ద పులులున్నాయి. అందులో 27 మగ పులులు, 24 ఆడ పులులున్నాయి. మిగతా పది పులి కూనలు. ఓ మగ పులి అందాదా 25 చదరపు కిలోమీటర్ల మేర తిరుగుతుంటుందని అధికారులు చెబుతున్నారు. అదే ఆడపులికి అయితే 15 చదరపు కిలోమీటర్లు సరిపోతుందట. ఆ లెక్కన చూసుకున్నా అవి తిరిగే ప్రాంతం వాటికి సరిపోదని అధికారులు అంటున్నారు. దీంతో ఇప్పుడు ఎన్ని యంగ్ పులులున్నాయో తేల్చేందుకు అధికారులు కసరత్తులు చేస్తున్నారు.
ఇరుకు స్థలంలో ఎన్ని పులులు ఇబ్బందులు పడుతున్నాయో తేల్చనున్నారు. ఆ లెక్కల ఆధారంగా ఎన్ని పులులను వేరే ప్రాంతాలకు తరలించాలో నిర్ణయానికి రానున్నారు.
చంపుతున్నయ్ లేదా చస్తున్నయ్
చోటు సరిపోకపోవడంతో టైగర్ పార్క్లోకి వెళ్లే జనాలపైన పెద్ద పులులు దాడులు చేస్తున్నాయని అధికారులు అంటున్నారు. దీంతో పెద్ద పులుల చేతిలో మనుషులు చనిపోతున్నారంటున్నారు. ఇప్పటికే ఈ ఘటనలు ఎక్కువయ్యాయని అధికారులు ఆందోళన వ్యక్తం చేస్తున్నారు. సవాయ్ మాధోపూర్, పరిసర జిల్లాల్లో ఒక్క నెలలోనే ముగ్గురిని పులులు చంపాయని గుర్తు చేస్తున్నారు. మరో వ్యక్తి తీవ్రంగా గాయపడ్డాడని చెబుతున్నారు. ఈ దాడులు చేస్తున్నదీ ఎక్కువగా యుక్త వయసులోకి వచ్చిన పులులేనని అంటున్నారు. అది కాకుండా చోటు విషయంలో పులుల మధ్యే గొడవలు జరుగుతున్నాయని, ఆ గొడవల్లోనూ కొన్ని పులులు ఇప్పటికే చనిపోయాయని చెబుతున్నారు. స్థలం గొడవల్లో ఈ ఏడాది రెండు పులులు చనిపోయాయని అంటున్నారు.
