వాళ్లంతా దొంగలు.. మాస్క్లు ధరించి సైలెంట్ గా వచ్చారు... మెల్లగా ఓ ఇంటి మెయిన్ గేట్ ను బద్దలు కొట్టి లోపలికి చొరబడ్డారు.. దొంగల్లో ఒకడు గేటు తెరిచి పట్టుకోగా.. మిగతా నలుగురు ఇంటి కాంపౌండ్ లోపల నిలిపి ఉంచిన 4 లగ్జరీ కార్లను డ్రైవ్ చేసుకుంటూ దర్జాగా తీసుకెళ్లిపోయారు. అప్పటిదాకా గేటు తెరిచి పట్టుకున్న చోరుడు కూడా.. మరో కారును తీసుకొని పరారయ్యాడు. ఇదంతా సినీ ఫక్కీలో 60 సెకన్లలోనే జరిగిందని సీసీ కెమెరా ఫుటేజీని బట్టి వెల్లడైంది. బ్రిటన్ లోని ఎసెక్స్ ప్రాంతంలో నవంబరు 11న వేకువజామున చోటుచేసుకున్న ఈ ఘటన ఆలస్యంగా వెలుగుచూసింది.
ఇప్పుడు దీనికి సంబంధించిన వీడియోలు వైరల్ అవుతున్నాయి. దొంగలు ఎత్తుకెళ్లిన కార్ల జాబితాలో ఏరియల్‌ ఆటమ్‌ రేసింగ్‌ కార్‌, మెర్సిడెస్‌ బెంజ్‌ ఏ45 ఏఎంజీ 4మ్యాటిక్‌, పోర్షె కెయెన్నె, పోర్షే 911 కెరేరా, మెర్సిడెస్‌ మేబాష్‌ ఉన్నాయని బాధితులు పోలీసులకు ఫిర్యాదు చేశారు. ఈ కార్ల మొత్తం విలువ దాదాపు రూ.7 కోట్లకుపైనే ఉంటుందని అంచనా వేస్తున్నారు. దర్యాప్తును వేగవంతం చేసిన పోలీసులు ఇప్పటికే ఓ మెర్సిడెస్‌ కారును గుర్తించి స్వాధీనం చేసుకున్నారు. మిగతా కార్లు, దుండగులను గాలించేందుకు ప్రత్యేక టీమ్ లను రంగంలోకి దింపారు.
