పిల్లల్ని అన్ని ఫెసిలిటీస్ ఉన్న స్కూల్లో చదివించాలి అనుకుంటారు తల్లిదండ్రులు. కానీ, చాలామందికి పేదరికం అడ్డొస్తుంది. అయితే, కామారెడ్డి జిల్లా బీబీపేట మండలం చుట్టుపక్కల ఉన్న ఊళ్ల వాళ్లకి ఆ సమస్య లేదు. అక్కడ పేదపిల్లల కోసం కార్పొరేట్ స్కూళ్లని తలపించే స్కూల్ కట్టించాడు తిమ్మయ్యగారి సుభాష్ రెడ్డి. నలుగురికీ సాయం చేయాలనుకునే అతన్ని.. ఆరేండ్ల క్రితం తెలుగులో వచ్చిన‘ శ్రీమంతుడు’ సినిమా ఇన్స్పైర్ చేసిందట. సుభాష్ రెడ్డి సొంతూరు బీబీపేట్ మండలం లోని జనగాం. హైదరాబాద్లో కన్స్ట్రక్షన్ బిల్డర్గా సెటిలయ్యాడు. నలుగురికీ హెల్ప్ చేయాలన్న ఈయన జర్నీ నిన్నమొన్న మొదలైంది కాదు. దాదాపు 20 ఏండ్ల నుంచి నడుస్తోంది. చదువుని, ట్రీట్మెంట్ని సాయం అడిగితే కాదనడు.
సినిమా ఎఫెక్ట్తో..
‘శ్రీమంతుడు’ సినిమా చూసి అందరిలానే సుభాష్ కూడా ‘నేను చదువుకున్న బడి, మా ఊళ్లో గుడి మంచిగ చేయాలె, హాస్పిటల్ కట్టాలె’ అనుకున్నాడు. ఒకరోజు వాళ్ల అబ్బాయి పేపర్ చూస్తూ, ‘శ్రీమంతుడు సినిమా చూసి చాలామంది ఇన్స్పైర్ అయ్యారు. సొంతూళ్లని డెవలప్ చేస్తున్నారు’ అన్నాడు సుభాష్తో. అప్పుడు సుభాష్ ‘అవును... నేను కూడా ‘గ్రామజ్యోతి’ ప్రోగ్రాంలో పార్టిసిపేట్ చేస్తున్నా’ అన్నాడు. దానికి వాళ్ల అబ్బాయి ‘వెళ్లు కానీ, శ్రీమంతుడు సినిమాలో హీరోలా నువ్వు నా సైకిల్ మాత్రం తీసుకెళ్లకు’ అన్నాడట. దాంతో తను పుట్టిపెరిగిన ఊరికోసం ఏదైనా చేయాలనుకున్నాడు. సొంత డబ్బులతో ఊళ్లో కొత్త పంచాయతి బిల్డింగ్ కట్టించాడు. రోడ్లు వేయించాడు. స్ట్రీట్లైట్స్, వాటర్ ప్లాంట్ కూడా పెట్టించాడు.
స్కూల్ ఆలోచన వెనక..
ఒకసారి సుభాష్ తన టెన్త్క్లాస్ ఫ్రెండ్స్తో కలిసి బీబీపేట్లో వాళ్లు చదువుకున్న స్కూల్కి వెళ్లాడు. వర్షానికి కురుస్తున్న పై కప్పులు, పాత గోడలు, కూలిపోయిన క్లాస్ రూమ్లని చూసి గుండె తరుక్కు పోయింది. తలాకొన్ని డబ్బులు వేసి స్కూల్ బిల్డింగ్ రిపేర్ చేయించాలి అనుకున్నారు. కానీ, సుభాష్ మాత్రం కార్పొరేట్ స్కూళ్లలా, అన్ని ఫెసిలిటీస్ ఉన్న స్కూల్ కట్టించాలి అనుకున్నాడు. సొంత డబ్బుతో అమ్మానాన్న జ్ఞాపకార్థంగా రాష్ట్రంలోనే అన్ని ఫెసిలిటీస్ ఉన్న గవర్నమెంట్ స్కూల్ కట్టించాడు. డిజిటల్ క్లాస్రూమ్లు, మోడర్న్ లైబ్రరీ, ల్యాబ్స్, టీచర్లకి రెస్ట్ రూమ్స్, ప్లే గ్రౌండ్ ఉన్న స్కూల్ కట్టించాడు. అందుకోసం సుభాష్ ఆరు కోట్ల రూపాయలు ఖర్చుచేశాడు.
రూ.2 కోట్లతో కార్పస్ ఫండ్
కార్పొరేట్ స్కూల్ని తలపించేలా స్కూల్ కట్టడం తోనే ఆగిపోకుండా... స్కూల్ మెయింటెనెన్స్ కోసం రెండు కోట్ల రూపాయల కార్పస్ ఫండ్ డిపాజిట్ చేయాలనుకున్నాడు. ఇప్పటి వరకూ కోటి 20 లక్షల రూపాయలు జమచేశాడు. అంతేకాదు జీవితంలో సక్సెస్ అయిన వాళ్లతో పిల్లలకి నెలకొకసారి మోటివేషన్ క్లాసులు చెప్పించాలి అనుకుంటున్నాడు సుభాష్.
సంతోష్ బొందుగుల