- ఫేక్ పోలీసుల టోకరా
- వ్యాపారిని బెదిరించి రూ.50 వేలు వసూలు
పాలకుర్తి, వెలుగు : పోలీసులమని బెదిరించి ఓ వ్యాపారి నుంచి రూ. 50 వేలు కాజేసిన నిందితులను పోలీసులు అరెస్ట్ చేశారు. జనగామ ఏసీపీ శ్రీనివాస రావు వారిని ఆదివారం మీడియా ఎదుట ప్రవేశ పెట్టి వివరాలు వెల్లడించారు.. భువనగిరి జిల్లా గాజుల రామారం గ్రామానికి చెందిన ఓ పౌల్ట్రీ ఫారమ్ ఓనర్ ధారావత్ సాయికిరణ్ రేషన్ బియ్యం వ్యాపారం చేస్తున్నాడు. జనగామ జిల్లా కొడకండ్ల మండలం లక్ష్మక్కపల్లి గ్రామానికి చెందిన యువకులు పడమటింటి నవీన్, చుక్క యాకన్న, నామాల ఉదయ్, జిలుకర సోమేశ్వర్ వ్యాపారి సాయి కిరణ్కు ఫోన్ చేసి తమ వద్ద రేషన్ బియ్యం ఉన్నాయని, అమ్ముతాం రమ్మంటూ ఫోన్ చేశారు. దీంతో గత నెల 30న వ్యాపారి సాయికిరణ్ లక్ష్మక్కపల్లి గ్రామానికి వచ్చాడు.
యువకులలో ఇద్దరు వ్యాపారితోనే ఉండి, వెహికిల్లో రేషన్ బియ్యం బస్తాలను లోడ్ చేశారు. బియ్యం లోడుతో వెహికిల్ కొంత దూరం వెళ్లగానే మరో ఇద్దరు యువకులు తాము పోలీసులమని చెప్పి ఆపారు. రూ.50 వేలు ఇవ్వాలని, లేకుంటే కేసు పెడతామని బెదిరించారు. దీంతో సాయికిరణ్ నిందితులు చెప్పిన రెండు నెంబర్లకు రూ.50 వేలు ఫోన్ పే చేశాడు. అయినా కూడా బియ్యం లోడును లాక్కుని అతన్ని పంపించారు. ఈవిషయంపై బాధిత వ్యాపారి పోలీసులను ఆశ్రయించగా నిందితులను అరెస్ట్ చేసి రిమాండ్కు తరలించారు.
