వాషింగ్టన్: అమెరికాలో జరిగిన యాక్సిడెంట్లో ముగ్గురు భారత అమెరికన్ స్టూడెంట్లు ప్రాణాలు కోల్పోయారు. ఇంకో ఇద్దరు గాయాలతో బయటపడ్డారు. వేగంగా వెళ్తున్న వీళ్ల కారు చెట్టును డీకొట్టి పల్టీ కొట్టిందని పోలీసులు తెలిపారు. మృతులను అవసరాల శ్రియ, అన్వీ శర్మ, ఆర్యన్ జోషిగా గుర్తించారు. జార్జియా రాష్ట్రంలో ఈ నెల 14న జరిగిన ఈ ప్రమాదం గురించి పోలీసులు బుధవారం మీడియాకు వెల్లడించారు.
అతివేగంతోనే ప్రమాదం..
జార్జియా స్టేట్ యూనివర్సిటీ, ఆల్ఫారెట్టా హైస్కూల్లో చదువుతున్న ఐదుగురు శ్రియ, అన్వీ శర్మ, ఆర్యన్ జోషి, సోమెపల్లి రిత్విక్, మహ్మద్ లియాకత్ ఈ నెల 14న కారులో బయల్దేరారు. ఆల్ఫారెట్టా దగ్గర్లో వీళ్లు ప్రయాణిస్తున్న కారు అదుపుతప్పి చెట్టును ఢీకొని పల్టీలు కొట్టింది. దీంతో ఆర్యన్ జోషి, శ్రియ అక్కడికక్కడే ప్రాణాలు కోల్పోయారు. అన్వీ శర్మ, మిగతా ఇద్దరికి తీవ్రగాయాలుకాగా పోలీసులు నార్త్పుల్టన్ ఆస్పత్రికి తరలించారు.
పరిస్థితి విషమించడంతో అన్వీ శర్మ ఆస్పత్రిలో కన్నుమూసింది. రిత్విక్, లియాకత్ ట్రీట్మెంట్ పొందుతున్నారు. వీళ్లందరూ 18 ఏండ్ల వయసువాళ్లేనని పోలీసులు వెల్లడించారు. ప్రమాద సమయంలో కారు నడిపింది లియాకత్ అని తెలిపారు. ఓవర్స్పీడ్ కారణంగానే కారు కంట్రోల్ తప్పి చెట్టును ఢీకొట్టిందన్నారు.
