టిక్టాక్లో పాపులర్ అయ్యేందుకు డాన్సులు, ఫన్నీ వీడియోలు చేస్తుంటారు చాలామంది. కానీ, అవేమీ చేయకుండానే ఈమె టిక్టాక్ వీడియో వైరల్ అవుతోంది. కారణం... ఈమె టిక్టాక్ చేసింది అంతరిక్షంలో. ఇంటర్నేషనల్ స్పేస్ సెంటర్లో మొదటి టిక్ టాక్ వీడియో చేసిన ఈమె పేరు సమాంతా క్రిస్టోఫొరెట్టి. యూరోపియన్ స్పేస్ ఏజెన్సీకి చెందిన వ్యోమగామి. ప్రస్తుతం ఎలాన్మస్క్కు చెందిన స్పేస్ ఎక్స్ కంపెనీ అంతరిక్షం లోకి పంపిన క్రూ–4 మిషన్లో ఒక మెంబర్.
క్రిస్టోఫొరెట్టి స్పేస్లోకి వెళ్లడం ఇది రెండోసారి. ఇంతకుముందు కూడా అంతరిక్ష కేంద్రం గురించి టిక్టాక్లో వీడియోలు పెట్టేది. ఈసారి స్పేస్ సెంటర్ నుంచి టిక్టాక్ వీడియో చేసి, అంతరిక్షంలో మొదటి టిక్టాక్ వీడియో చేసిన వ్యోమగామిగా గుర్తింపు తెచ్చుకుంది. ‘మళ్లీ ఇంటర్నేషనల్ స్పేస్ స్టేషన్లో’.. అనే క్యాప్షన్ రాసి 88 సెకండ్ల వీడియోని పోస్ట్ చేసింది. అందులో స్పేస్ ఎక్స్ మిషన్ జీరో– జి ఇండికేటర్ గురించి, తన స్పేస్ జర్నీతో పాటు సిమ్మిఎట్టా( అంటే ఇటాలియన్ భాషలో ‘చిన్న కోతి’ అని అర్థం) అనే కోతి బొమ్మ గురించి కూడా చెప్పింది క్రిస్టోఫొరెట్టి.
స్పేస్ స్టేషన్ గురించి చెప్తూ..
‘‘స్పేస్ ఎక్స్ క్రూ–4 మిషన్ మొదటి 4 రోజులు చాలా బిజీగా గడిచాయి. స్పేస్ స్టేషన్లో జీవితం గురించి మీకు ఏమైనా ప్రశ్నలు ఉన్నాయా? ఉంటే కామెంట్ బాక్స్లో నన్ను అడగండి. గుర్తు పెట్టుకోండి.... ఏ టిక్టాకర్ను ఫాలో కానంతగా నన్ను ఫాలో అవ్వండి” అని ఆ వీడియోలో చెప్పింది క్రిస్టోఫొరెట్టి. ఆమె స్పేస్ స్టేషన్లో తేలియాడుతూ చేసిన ఈటిక్టాక్ వీడియోని ఇప్పటికే రెండు లక్షల మందికి పైగా చూశారు. ఏప్రిల్ 27న స్పేస్ ఎక్స్ వాళ్ల క్రూ–4 మిషన్లో అంతరిక్ష యాత్రకు వెళ్లింది క్రిస్టోఫొరెట్టి. ఆమె అక్కడే ఆరు నెలలు ఉంటుంది.
