వానాకాలంలో పెంపుడు జంతువులకి రకరకాల స్కిన్ ఇన్ఫెక్షన్లు వస్తాయి. వాటిలో వర్షంలో తడవడం వల్ల, మట్టి ద్వారా ద్వారా వచ్చే ఇన్ఫెక్షన్లు ఎక్కువ. అందుకని ఈ సీజన్లో పెట్స్ని జాగ్రత్తగా చూసుకోవాలి. అందుకోసం వాటికి పెట్టే ఫుడ్తో పాటు వాటి ఆరోగ్యం మీద కూడా దృష్టి పెట్టాలి అంటున్నాడు వెటర్నరీ డాక్టర్ దిలీప్ సొనూనే. పెంపుడు జంతువుల్ని వాకింగ్కి తీసుకెళ్లినప్పుడు బ్యాక్టీరియా, వైరస్లు మట్టితో పాటు వాటి కాళ్లలో చిక్కుకుంటాయి. అందుకని బయటికి తీసుకెళ్లి వచ్చిన ప్రతిసారి వాటి పాదాల్ని గోరువెచ్చని నీళ్లతో శుభ్రం చేసి, మెత్తని టవల్తో తుడవాలి. కాళ్ల సందుల్లో నూనె కూడా వేయాలి. ఇలాచేస్తే వాటికి స్కిన్ ఇన్ఫెక్షన్లు, జీర్ణ సమస్యలు రావు.
కొన్ని పెట్స్ గడ్డిమీద నడిచేందుకు ఇష్టపడతాయి. దాంతో గరుకుగా ఉండే గడ్డిపోచలు కోసుకుపోయి వాటి కాళ్ల కింది చర్మం దెబ్బతిని డెర్మటైటిస్ సమస్య వస్తుంది. అంతేకాకుండా అవి నాలుకతో పాదాల్ని శుభ్రం చేసుకుంటాయి. అలాచేస్తే వాటి పాదాలకు అంటిన మట్టి, క్రిములు పొట్టలోకి చేరి జీర్ణ సమస్యలు వస్తాయి. అందుకని వాటి ఇమ్యూనిటీ పెంచేందుకు ప్రొ–బయాటిక్ ఫుడ్ ఇవ్వాలి. ఈ కాలంలో వాతావరణం చల్లగా ఉంటుంది కాబట్టి పెట్స్కి మరిగించిన నీళ్లు లేదా ఫిల్టర్ నీళ్లు తాగించాలి. ఇలాచేస్తే జీర్ణ సమస్యలు తగ్గిపోయి అవి హుషారుగా ఉంటాయి.
ఈ సీజన్లో పేలు, పెద్ద ఈగలు, దోమల కారణంగా పెట్స్ జబ్బు పడే అవకాశాలు ఎక్కువ. కాబట్టి పెంపుడు జంతువులు ఆడుకునే, నిద్రపోయే ప్లేస్ని శుభ్రంగా ఉంచాలి. వాటి రెస్టింగ్ బెడ్ని మారుస్తుండాలి. ఈ కాలంలో వాతావరణంలో తేమ వల్ల పెట్స్ బొచ్చు తడిగా ఉంటుంది. తడి వల్ల వాటికాళ్ల మీద బ్యాక్టీరియా వంటి క్రిములు పెరిగి స్కిన్ ఇన్ఫెక్షన్లు వచ్చే అవకాశం ఉంది. ఫంగల్ ఇన్ఫెక్షన్లు కూడా రావచ్చు. అందుకని యాంటీ–ఫంగల్ పౌడర్ వాడాలి. పెట్స్కు వాటర్లెస్ షాంపూతో స్నానం చేయించాలి. అవి వానలో తడవకుండా వాటికి సరిపోయే రెయిన్కోట్ వేయాలి.
పెట్స్కి ఫైబర్ ఉండే ఫుడ్ పెట్టాలి. అంతేకాదు అవి బరువు పెరగకుండా ఉండేందుకు వాటి యాక్టివిటీకి తగ్గట్టుగా ఫుడ్ ఉండాలి. ఇవేకాకుండా... వెటర్నరీ డాక్టర్ని కలిసి పెట్స్కు డీవార్మింగ్ ట్యాబ్లెట్లు తీసుకోవాలి. అవసరమైతే వ్యాక్సిన్ ఇప్పించాలి. గోర్లు పెరిగితే ఎప్పటికప్పుడు కత్తిరించాలి.
