ఆస్కార్ అవార్డ్కి నామినేట్ అవ్వడమే గొప్ప విషయం. అలాంటిది విజేతగా నిలిస్తే.. మాటల్లో చెప్పలేనంత సంతోషం వేస్తుంది ఎవరికైనా. అమెరికన్ నటుడు ట్రోయ్ కాట్సర్ కూడా ఇప్పుడు అంతే హ్యాపీగా ఉన్నాడు. ఈ ఏడాది ఆస్కార్ అవార్డులు ఆయనకు చాలా ప్రత్యేకం. ఎందుకంటే వినికిడి శక్తి లేని మగ నటుడు ఆస్కార్ గెలవడం ఇదే మొదటిసారి. ‘కొడా’ సినిమాలో సపోర్టింగ్ రోల్ చేసినందుకు కాట్సర్ ఆస్కార్ అందుకున్నాడు.
బెస్ట్ సపోర్టింగ్ యాక్టర్ కేటగిరీలో విజేతగా కాట్సర్ పేరు అనౌన్స్ చేయగానే అక్కడివాళ్లంతా నిల్చొని చప్పట్లు కొట్టారు. ఆ క్షణం చాలా ఎమోషనల్ అయ్యాడు కాట్సర్. ఆయనకి ఆస్కార్ ఇచ్చిన తర్వాత సైన్ లాంగ్వేజ్ ట్రాన్స్లేటర్ని పిలిచారు.‘‘ఇక్కడ మీ అందరి ముందు నిల్చోవడం చాలా సంతోషంగా ఉంది. నేను ఇక్కడ ఉన్నానంటే నమ్మలేకపోతున్నా. నాలోని నటుడిని గుర్తించినందుకు అకాడమీ మెంబర్స్కి ధన్యవాదాలు. మా నాన్న బెస్ట్ సైనర్. ఆయన్ని చూసి చాలా నేర్చుకున్నాను. ఆయనే నా హీరో. నా ఫ్యాన్స్, నా భార్య, నా కూతురు కైరా, నా మేనేజర్... వీళ్లందరికీ థ్యాంక్స్.
నేను ఆర్టిస్ట్గా ఎదిగేందుకు సాయం చేసిన డ్రామా కంపెనీలకు థ్యాంక్స్” అని సైగలతో ఎమోషనల్ అవుతూ చెప్పాడు కాట్సర్. తనకు వచ్చిన ఆస్కార్ను ‘కొడా’ టీంకు, ప్రపంచంలోని వినికిడి శక్తిలేని వాళ్లకు, దివ్యాంగులకు అంకితం చేస్తున్నాడు అన్నాడు. ‘కోడ’ డైరెక్టర్ సియన్ హెడెర్ని ‘అత్యుత్తమ కమ్యూనికేటర్’ అని, అద్భుతమైన సినిమా తీసిందని పొగిడాడు కాట్సర్.
‘కొడా’ సినిమాకు ‘చైల్డ్ ఆఫ్ డెఫ్ అడల్ట్స్’ అని అర్థం. వినికిడి శక్తి లేని తల్లిదండ్రులకు పుట్టిన 17 ఏండ్ల అమ్మాయి కథే ఈ సినిమా. ఇందులో ఆమెకు తండ్రిగా కాట్సర్, తల్లిగా మర్లీ మట్లీన్ నటించారు. ఈ సినిమాలో కాట్సర్ నటనని చాలామంది మెచ్చుకున్నారు. ‘కొడా’కు ఈ ఏడాది మూడు ఆస్కార్లు వచ్చాయి.
కాట్సర్కి తొమ్మిదేండ్ల వయసులో వినికిడి శక్తి లేదని తల్లిదండ్రులకు తెలిసింది. దాంతో, కొడుకుతో మాట్లాడడం కోసం వాళ్లు అమెరికన్ సైన్ లాంగ్వేజ్ నేర్చుకున్నారు.
స్కూల్ డేస్ నుంచే యాక్టింగ్ మీద ఇంట్రెస్ట్ పెంచుకున్నాడు కాట్సర్. ‘నేషనల్ థియేటర్ ఆఫ్ డెఫ్’లో యాక్టింగ్ జాబ్ రావడంతో చెవిటి నటుడిగా ఆయన కెరీర్ మొదలైంది. 30 ఏండ్లుగా సినిమాల్లో నటిస్తున్న కాట్సర్ ఫిల్మ్మేకర్ కూడా.