ఉక్రెయిన్తో యుద్దం ముగించకపోతే పన్నులు వేస్తా..రష్యాకు ట్రంప్ వార్నింగ్

• ఉక్రెయిన్​తో సంధి కుదుర్చుకోకుంటే
• రష్యాపై భారీగా పన్నులు వేస్తా
• పుతిన్​కు అమెరికా ప్రెసిడెంట్​ డొనాల్డ్​ ట్రంప్​ హెచ్చరిక
• ఆయన వైఖరి అస్సలు నచ్చట్లేదు: ట్రంప్

వాషింగ్టన్: ఉక్రెయిన్​తో యుద్ధానికి ముగింపు పలకాలని, ఆ దేశంతో సంధి కుదుర్చుకోవాలని రష్యా ప్రెసిడెంట్ పుతిన్​కు అమెరికా ప్రెసిడెంట్ ట్రంప్​ సూచించారు. ఇందుకు గడువు 50 రోజులేనని, అప్పటికీ ఉక్రెయిన్​తో సంధి కుదుర్చుకోకుంటే రష్యాపై భారీగా పన్నులు, ఆంక్షలు విధిస్తానని ఆయన హెచ్చరించారు. ఈ మేరకు సోమవారం న్యూజెర్సీలో ఆయన మాట్లాడుతూ..  పుతిన్​పై సంచలన ఆరోపణలు చేశారు. పుతిన్ తీయగా మాట్లాడుతూనే బాంబుల వర్షం కురిపిస్తాడని మండిపడ్డారు.

 పుతిన్ విధానాలు తనకు ఏమాత్రం నచ్చడం లేదన్నారు. ఉక్రెయిన్​కు అత్యాధునిక ఆయుధాలు పంపిస్తామని ప్రకటించారు. అంతకుముందు కాల్పుల విరమణ ఒప్పందం కుదుర్చుకోవాలన్న ట్రంప్ సూచననూ పుతిన్ తోసిపుచ్చారు. దీంతో పుతిన్​పై ట్రంప్ సంచలన కామెంట్లు చేశారు. ఉక్రెయిన్​పై రష్యా దాడులు చేస్తున్న నేపథ్యంలో ఆ దేశానికి రక్షణ ఎంతో అవసరమన్నారు. ఉక్రెయిన్​కు అమెరికా అండగా ఉంటుందని స్పష్టం చేశారు.

 ఫిఫా క్లబ్ వరల్డ్ కప్ ఫైనల్​ను వీక్షించి వెళ్తూ.. జాయింట్ బేస్ ఆండ్రూస్​లో ట్రంప్ మీడియాతో మాట్లడారు. ‘‘ఉక్రెయిన్​కు పేట్రియాట్ ఎయిర్‌‌‌‌ డిఫెన్స్‌‌‌‌ సిస్టమ్‌‌‌‌తో పాటు అత్యాధునిక ఆయుధాలు పంపిస్తున్నాం. ప్రస్తుత పరిస్థితుల్లో ఇవి ఆ దేశానికి చాలా అత్యవసరం. వాళ్లు మాకు డబ్బులు చెల్లిస్తారు. ఇది మాకు బిజినెస్ లాంటిది. పుతిన్ వ్యవహారశైలి అస్సలు బాగోలేదు. రష్యాపై ఆంక్షలు వేసే అంశాన్ని పరిశీలిస్తున్నాం. మున్ముందు ఏం జరుగుతుందో చూడండి’’అంటూ ట్రంప్ అన్నారు.