- పేపర్ లీకేజీ ఘటనపై శాఖాపరమైన చర్యలు కరువు
- ఇదే విషయాన్ని ప్రకటించిన మంత్రి కేటీఆర్
హైదరాబాద్, వెలుగు: తెలంగాణ స్టేట్ పబ్లిక్ సర్వీస్ కమిషన్ (టీఎస్పీఎస్సీ) క్వశ్చన్ పేపర్ లీకేజీ ఘటనపై ఇప్పటివరకు శాఖాపరమైన చర్యలు తీసుకోలేదు. దీంట్లో కేవలం ఆ ఇద్దరిదే తప్పన్నట్టు కమిషన్ అధికారులు వ్యవహరిస్తున్నారు. ఇదే విషయాన్ని రెండ్రోజుల కింద మంత్రి కేటీఆర్ కూడా ప్రకటించారు. ఆ ఇద్దరి వల్లే ఈ ఘటన జరిగిందని చెప్పుకొచ్చారు. అయితే, ఈ ఘటన జరిగే అవకాశం ఎవరిచ్చారు? ఆ నిర్లక్ష్యం ఎవరిది? అంటే మాత్రం ఏ ఒక్కరి దగ్గరా సమాధానం లేదు. ఘటనపై నిర్లక్ష్యం తమది కాదంటే.. తమది కాదంటూ ఒకరిపై ఒకరు నెట్టేసుకుంటున్నట్టు తెలుస్తోంది.
సిస్టమ్కు అలర్ట్ పెట్టకపోవుడేంది?
క్వశ్చన్ పేపర్ల లీక్తో గ్రూప్ 1 ప్రిలిమ్స్, ఏఈ, ఏఈఈ, డీఏవో పరీక్షలను టీఎస్పీఎస్సీ రద్దు చేయగా, టౌన్ ప్లానింగ్ ఆఫీసర్, వెటర్నరీ అసిస్టెంట్ ఎగ్జామ్స్ వాయిదా వేసింది. ఈ లీకేజీ టీఎస్పీఎస్సీ సెక్రటరీ అనితా రాంచంద్రన్ పీఏ ప్రవీణ్ కుమార్, టీఎస్టీఎస్ ఉద్యోగి, సిస్టమ్ అడ్మిన్ రాజశేఖర్ రెడ్డి ద్వారా జరిగిందని పోలీసులు నిర్ధారించారు. వీరిద్దరితో పాటు ఇంకొంతమందిని పోలీసులు అరెస్ట్ చేశారు. ఇంతవరకూ బాగానే ఉన్నా.. వీరిద్దరు క్వశ్చన్ పేపర్లు లీక్ చేసేందుకు అవకాశం ఇచ్చింది ఎవరు? ఆ నిర్లక్ష్యం ఎవరిది అనే దానిపై మాత్రం కమిషన్ అధికారులు నోరుమెదపడం లేదు. కాన్ఫిడెన్షియల్ సిస్టమ్ నుంచి డేటా లీక్ అవుతుంటే, ఆ సెక్షన్ ఇన్చార్జి ఏం చేస్తున్నట్లు అనే విమర్శలు వినిపిస్తున్నాయి. కాన్ఫిడెన్షియల్ సిస్టమ్ ఓపెన్ చేస్తే అలర్ట్ మెసేజ్ కూడా రాకపోవడం, ఆ మేరకు సైబర్ అలర్ట్ సిస్టమ్ పెట్టకపోవడం ఎవరి తప్పనే ప్రశ్నలు వస్తున్నాయి. మరోపక్క కమిషన్ సెక్రటరీ అనితారాంచంద్రన్ పీఏ ప్రవీణ్ కుమార్ ప్రవర్తన పైనా అనుమానం రాకపోవడంపై విమర్శలు వస్తున్నాయి. సెలవులుపెట్టకుండా గ్రూప్ 1 ప్రిలిమ్స్ రాశారని కొందరు, కొన్ని రోజులు సెలవులు పెట్టారని ఇంకొందరు చెప్తున్నారు. అయినా 15..20 రోజులు చదివితే ఏకంగా 103 మార్కులు సాధించవచ్చా అనే అనుమానం కూడా టీఎస్పీఎస్సీ అధికారుల్లో రాకపోవడం గమనార్హం. అప్పుడే గుర్తించి..రీచెక్ చేస్తే కనీసం మిగిలిన పేపర్లు లీక్ కాకుండా ఉండేవని నిరుద్యోగులు చెబుతున్నారు.
కిందిస్థాయి ఉద్యోగికి బాధ్యతలా!
క్వశ్చన్ పేపర్ లీక్ కావడంతో టీఎస్పీఎస్సీలో ఆదరబాదరగా కమిషన్లోని అధికారుల సెక్షన్లను మార్చారు. ఈ క్రమంలో కాన్ఫిడెన్షియల్ విభాగం ఇన్చార్జిగా ఉన్న సెక్షన్ ఆఫీసర్ ను తొలగించి, అడిషనల్ సెక్రటరీ అధికారికి ఆ బాధ్యతలు అప్పగించారు. అయితే, కీలకమైన ఈ సెక్షన్కు ఉన్నతాధికారికి కాకుండా, కిందిస్థాయి ఉద్యోగులకు ఇవ్వడంపైనా విమర్శలు వినిపిస్తున్నాయి.
