విక్రాంత్‌ మస్సే లీడ్ రోల్‌‌లో విధు వినోద్ చోప్రా తెరకెక్కించిన చిత్రం ‘ట్వల్త్‌ ఫెయిల్‌’. ఎలాంటి అంచనాలు లేకుండా చిన్న సినిమాగా విడుదలైన ఈ బాలీవుడ్ మూవీ బ్లాక్ బస్టర్‌ హిట్‌‌ను సొంతం చేసుకోవడంతో పాటు విమర్శకుల ప్రశంసలను అందుకుంది. మనోజ్ కుమార్ అనే ఐపిఎస్‌ ఆఫీసర్‌ జీవితం ఆధారంగా దీన్ని తెరకెక్కించారు.
తాజాగా ఈ చిత్రం ఓ అరుదైన ఘనతను సాధించింది. ఇంటర్నెట్‌ మూవీ డేటాబేస్‌ సంస్థ (ఐఎమ్‌‌డీబీ) గ్లోబల్ టాప్ 250 చిత్రాల జాబితాను విడుదల చేసింది. ఇందులో 50వ చిత్రంగా నిలిచింది ‘ట్వల్త్‌ ఫెయిల్‌’. ఈ జాబితాలో చోటు సంపాదించిన ఏకైక భారతీయ చిత్రం ఇదే కావడం విశేషం. దర్శకుడు విధు వినోద్ చోప్రా సోషల్ మీడియా వేదికగా ఈ విషయాన్ని వెల్లడించారు.
‘ఎంతో ఆనందంగా ఉంది. ఇప్పుడు ప్రశాంతంగా చనిపోయినా పర్వాలేదనిపిస్తోంది’ అంటూ విధు వినోద్ చోప్రా సంతోషం వ్యక్తం చేశారు. ఐఎమ్‌‌డీబీ అత్యధిక రేటింగ్‌‌ను పొందిన భారతీయ సినిమాల లిస్టులో ఇప్పటికే టాప్ ప్లేస్‌‌ను ఈ చిత్రం దక్కించుకుంది.
