ప్రపంచ పర్యావరణ దినోత్సవం 2024 పురస్కరించుకొని దేశంలో మరో రెండు చిత్తడి నేలలను రామ్సర్ సైట్ల జాబితాలో చేర్చారు. బిహార్లోని జముయు జిల్లాలోని ఝఝూ అటవీ ప్రాంతంలో ఉన్న మానవ నిర్మిత రిజర్వాయర్లు నాగి, నక్తి పక్షుల అభయారణ్యాలు రామ్సర్ జాబితాలోకి చేరాయి.
నక్తి పక్షుల అభయారణ్యం
భారత ప్రభుత్వం సమర్పించిన వివరాల ప్రకారం నక్తి ఆనకట్ట నిర్మాణం ద్వారా నీటిపారుదల కోసం ఈ పక్షుల అభయారణ్యం అభివృద్ధి చేశారు. ఈ చిత్తడి ప్రాంతాన్ని 1984లో అభయారణ్యంగా గుర్తించారు. శీతాకాలంలో 2000కు పైగా వలస పక్షులు ఇక్కడ సేద తీరుతాయి. వీటిల్లో ముఖ్యంగా ఇండో – గంగా మైదాన ప్రాంతంలో రెడ్ క్రెస్టడ్ పోచర్డ్ పక్షుల సమూహం అధికంగా ఉన్నాయి.
నాగి పక్షుల అభయారణ్యం
ఈ అభయారణ్యం 75 పక్షిజాతులకు, 33 చేప జాతులకు ,12 జలచార వృక్షజాతులకు నివాసంగా ఉంది. ప్రధానంగా ఇండో గంగా మైదాన ప్రాంతంలో బార్ హెడేడ్ గీస్ పక్షుల సమూహం అత్యధికంగా ఇక్కడ నివసిస్తున్నాయి. ఈ అభయారణ్యం నాగినదికి ఆనకట్ట అవతల నిర్మించారు. స్వచ్ఛమైన నీటితోపాటు జలచార వృక్ష సంపద వంటి నీటి వనరులను ఏర్పాటు చేయడానికి వీలు కల్పించింది. ప్రపంచ వ్యాప్తంగా 2400 రామ్సర్ చిత్తడి నేలలు 172 దేశాల్లో 2.5 మిలియన్ చదరపు కిలోమీటర్ల వరకు రక్షిస్తున్నారు.
