- పాక్షికంగా దెబ్బతిన్న వెయ్యి గుడిసెలు
- లబోదిబోమంటున్న పేదలు
- అబ్దుల్లాపూర్మెట్ రావినారాయణ రెడ్డి కాలనీలోని పరిస్థితి
అబ్దుల్లాపూర్ మెట్, వెలుగు : రంగారెడ్డి జిల్లా అబ్దుల్లాపూర్ మెట్ మండలం రావినారాయణరెడ్డి కాలనీలో ఆదివారం సాయంత్రం కురిసిన ఈదురు గాలుల వర్షానికి 2 వేల గుడిసెలు నేటమట్టం అయ్యాయి. వెయ్యి గుడిసెలు పాక్షికంగా దెబ్బతిన్నాయి. ఈదురు గాలికి గుడిసెలతోపాటు ఇంట్లోని వస్తువులు, వంట సామాగ్రి ఎగిరిపోయాయి. వివరాల్లోకి వెళ్తే.. రావినారాయణరెడ్డి కాలనీలోని భూదాన్భూమిలో ఏడాదిన్నరగా 8 వేల పేద కుటుంబాలు గుడిసెలు వేసుకుని ఉంటున్నాయి.వీళ్లంతా కూలి పనులకు వెళ్తుంటారు. కొందరు రోడ్డు పక్కన చిరువ్యాపారాలు చేసుకుంటారు.
ఈ గుడిసెలకు ఎలాంటి సౌకర్యాలు లేవు. కరెంట్, వాటర్సదుపాయాలు లేవు. సీపీఐ ఆధ్వర్యంలో నిరుపేదలంతా కలిసి ఇక్కడ గుడిసెలు వేసుకున్నారు. గాలివాన దెబ్బకు 2 వేల కుటుంబాలు రోడ్డున పడ్డాయి. సోమవారం ఉదయం గాలికి ఎగిరిపోయిన వస్తువులను అంతా ఏరుకొచ్చుకున్నారు. నేలమట్టమైన గుడిసెలను చూసి కన్నీరుమున్నీరయ్యారు. గత ప్రభుత్వం తమకు న్యాయం చేయలేదని, కాంగ్రెస్ప్రభుత్వమైనా పట్టించుకొని ఆదుకోవాలని వేడుకున్నారు.
వేల గుడిసెలు కూలిపోయినా ఏ అధికారి కన్నెత్తి చూడలేదని ఆవేదన వ్యక్తం చేశారు. సీపీఐ రాష్ట్ర నాయకులు అందోజు రవీంద్రచారి మాట్లాడుతూ.. తాము పేదల పక్షాన పోరాటం చేస్తున్నామని చెప్పారు. రాష్ట్ర ప్రభుత్వం స్పందించి, గుడిసెవాసులను ఆదుకోవాలని, అన్ని రకాల సౌకర్యాలు కల్పించాలని కోరారు.
