పాత కార్ల మార్కెట్లో ధరల సెగ సామాన్యుడి జేబుకు చిల్లు పెడుతోంది. గత నెలలో సెకండ్ హ్యాండ్ కార్ల సగటు ధర సుమారు రూ.22.95 లక్షలకు చేరుకుంది. ఇది కేవలం ఒక్క నెలలోనే భారీగా పెరగడం గమనార్హం. ప్రస్తుతం మార్కెట్ అస్థిరంగా ఉన్నందున.. కార్ల ధరలను ఎప్పటికప్పుడు గమనిస్తూ ఉండటం బెటర్ అని నిపుణులు హెచ్చరిస్తున్నారు.
మీరు అనుకున్న బడ్జెట్లో కారు దొరకకపోతే.. మీ ఆలోచనా విధానాన్ని మార్చుకోవాలని అమెరికాకు చెందిన కార్ఫ్యాక్స్ నిపుణుడు మెల్కోటే సూచిస్తున్నారు. మీరు కోరుకున్న మోడల్ కాకుండా.. కొంచెం పాత వెర్షన్ లేదా తక్కువ ఫీచర్లు ఉన్న ఇతర బ్రాండ్లను పరిశీలించడం వల్ల మంచి డీల్స్ దొరికే అవకాశం ఉందని సూచిస్తున్నారు. కొన్నిసార్లు పక్క ఊరి మార్కెట్లలో వెతికినా తక్కువ ధరకే కారు లభించవచ్చన్నారు.
గత ఏడాది కాలంగా వాడకంలో ఉన్న కార్ల ధరలు సుమారు 6 శాతం పెరిగాయి. ముఖ్యంగా పెట్రోల్ ధరలు పెరుగుతుండటంతో ఎలక్ట్రిక్ కార్లకు డిమాండ్ పెరిగింది. అయితే సెకండ్ హ్యాండ్ కార్ల సంఖ్య తక్కువగా ఉండటం వల్ల డిమాండ్కు తగ్గ సరఫరా లేక ధరలు దిగిరావడం లేదని ఆర్థికవేత్తలు విశ్లేషిస్తున్నారు.
కొత్త కార్ల పరిస్థితి మరీ ఘోరంగా ఉంది. కొత్త కారు సగటు ధర సుమారు రూ.44 లక్షలు దాటేసింది. ఈ భారీ ధరల వల్ల కొనుగోలుదారులు ఏకంగా 7 ఏళ్ల కంటే ఎక్కువ కాలం ఉన్న రుణాలను తీసుకుంటున్నారు. అందుకే ఈ సమయంలో బడ్జెట్ను దాటకుండా ఉండాలంటే విలాసాల కంటే అవసరాలకే ప్రాధాన్యత ఇచ్చి కారును ఎంచుకోవడం బెస్ట్ అని డీలర్లు కూడా అంటున్నారు.
