- గడువు దాటిపోతోందని ప్రజల ఆందోళన
- రిజిస్ట్రేషన్ తప్పనిసరి..
- ఆన్లైన్లో దొరకని స్లాట్లు
- వ్యాక్సిన్ ఎక్కడ దొరుకుతదో తెలియని పరిస్థితి
హైదరాబాద్, వెలుగు: కరోనా వ్యాక్సిన్ సెకండ్ డోస్ ఎట్లా అని రాష్ట్రంలో 42 లక్షల మంది ఎదురుచూస్తున్నారు. రెండో డోస్ వేసుకునే టైమ్ ముంచుకువస్తున్నా.. ఎక్కడ, ఎప్పుడు వేయించుకోవాలో తెలియని పరిస్థితి నెలకొంది. ప్రభుత్వం వద్ద పక్కా ప్రణాళిక లేకపోవటం, సరిపడా డోస్లు లేకపోవటంతో జనం తీవ్ర ఇబ్బందులు పడుతున్నారు. రోజుకో తీరు ప్రకటనతో ప్రభుత్వం గందరగోళానికి గురి చేస్తోంది. ఇప్పటికే రాష్ట్రంలో నాలుగైదు రోజులుగా వ్యాక్సిన్ బంద్ చేసింది. 18 ఏండ్ల నుంచి 44 ఏండ్ల వయసు వారికి ఎప్పట్నుంచి వ్యాక్సిన్ వేస్తారో ఇప్పటికీ ప్రకటించలేదు. కొవిడ్ వారియర్లతో పాటు 45 ఏండ్లుపైబడిన వారికి ప్రభుత్వం తొలుత వ్యాక్సిన్ వేసుకునే వెసులుబాటు కల్పించింది. దీంతో ఇప్పటివరకు రాష్ట్రంలో 48.69 లక్షల మంది వ్యాక్సిన్ వేసుకున్నారు. ఇందులో 42.18 లక్షల మంది ఫస్ట్ డోసు ఒకటే వేసుకోగా, 6.51 లక్షల మంది రెండో డోసు వేసుకున్నారు. మొదట్లో ప్రైవేట్ హాస్పిటళ్లలో వ్యాక్సిన్ వేసుకునేందుకు అనుమతించిన ప్రభుత్వం ఇప్పుడు అక్కడి నుంచి వ్యాక్సిన్ను స్వాధీనం చేసుకుంది. దీంతో ప్రైవేటు హాస్పిటళ్లలో ఫస్ట్ డోస్ వేసుకున్న జనం రెండో డోస్ ఎక్కడ వేసుకోవాలో తెలియక ఆందోళనకు గురవుతున్నారు.
రిజిస్ట్రేషన్ కోసం మీ సేవా సెంటర్ల వద్ద క్యూ
రెండో డోస్కు కూడా కొవిన్ పోర్టల్లో రిజిస్ట్రేషన్ చేసుకోవటం తప్పనిసరని ప్రభుత్వం ఆదేశాలు జారీ చేసింది. దీంతో రిజిస్ట్రేషన్ కోసం నిరక్షరాస్యులు, నిరుపేదలందరూ మీసేవా సెంటర్లు, ఇంటర్నెట్ సెంటర్ల చుట్టూ తిరగాల్సిన పరిస్థితి తలెత్తింది. కరోనా టైమ్ లో టెస్టులతో పాటు వ్యాక్సిన్లకు క్యూలు కట్టిస్తున్న ప్రభుత్వం.. ఇప్పుడు మీసేవా సెంటర్ల వద్ద కూడా క్యూ కట్టిస్తుందనే విమర్శలు వ్యక్తమవుతున్నాయి. ఫస్ట్ డోస్ తరహాలోనే సెంటర్ల వద్దే ప్రభుత్వం రిజిస్ట్రేషన్ చేసుకోవాలని, అన్ని హాస్పిటళ్లతో పాటు పీహెచ్సీలు, అర్బన్ హెల్త్ సెంటర్లలో వ్యాక్సిన్లు అందుబాటులో ఉంచాలని జనం కోరుతున్నారు.
గడువు దాటితే.. నో యూజ్!
ఫస్ట్ డోస్ వేసుకున్న వారందరూ 30 రోజుల తర్వాత 60 రోజుల లోపు సెకండ్ డోస్ వేసుకోవటం తప్పనిసరి. కొవాగ్జిన్ టీకా వేసుకున్నవాళ్లు తప్పనిసరిగా నాలుగు వారాలయ్యాక ఆరు వారాల లోపు సెకండ్ డోస్ వేసుకోవాలి. కొవిషీల్డ్ వ్యాక్సిన్ వేసుకున్న వారు.. 6 వారాల తర్వాత 8 వారాల గడువులోపు సెకండ్ డోస్ వేసుకోవాలి. ఆలస్యమైతే ఫస్ట్ డోస్ వేసుకున్న ప్రయోజనం కూడా ఉండదని డాక్టర్లు హెచ్చరిస్తున్నారు. ‘ఫస్ట్ డోస్ తీసుకున్నాక ఇన్టైంలో సెకండ్ డోస్ వేసుకోవాలి. అప్పుడు వైరస్ను తట్టుకునే యాంటీబాడీస్ అనుకున్న రేంజ్లో ఉత్పత్తవుతాయి. సెకండ్ డోస్ లేటయితే దుష్పరిణామాలు ఏమీ ఉండకపోవచ్చు. కానీ, యాంటీబాడీస్ ఉత్పత్తి తగ్గిపోయి, వైరస్ నుంచి రక్షణ పొందే వీలు ఉండకపోవచ్చు. దీని వల్ల వ్యాక్సిన్ వేయించుకున్నా దాని ప్రభావం చాలా తక్కువ ఉంటుంది’’ అని ప్రముఖ డాక్టర్ విజయేందర్ వివరించారు. ఈ గడువు ప్రకారం మే 31 వరకు రాష్ట్రంలో 11 లక్షల మంది సెకండ్ డోస్ టీకా తీసుకోవాల్సి ఉంది. వీరందరికీ ప్రయారిటీగా అందించేందుకు ప్రభుత్వం ఏర్పాట్లు చేయాలని డాక్టర్లు సూచిస్తున్నారు.
ప్రైవేట్ డోస్‌‌ల డ్రామా
ఏప్రిల్ 30న రాష్ట్రంలోని పలు ప్రైవేటు, కార్పొరేట్ హాస్పిటళ్లలో ఉన్న వ్యాక్సిన్లన్నింటినీ స్వాధీనం చేసుకుంటున్నట్లు ప్రభుత్వం ప్రకటించింది. దీంతో తమ వద్ద ఉన్న డోసులన్నీ వెనక్కి తీసుకున్నారని, రెగ్యులర్గా వచ్చే పేషెంట్లు ఇప్పుడు సెకండ్ డోస్కు ఇబ్బంది పడుతున్నారని కార్పొరేట్ యాజమాన్యాలు చెబుతున్నాయి. అసలు ఒక్క వ్యాక్సిన్ కూడా వెనక్కి తీసుకోలేదని మెడికల్ అండ్ హెల్త్ డిపార్టుమెంట్ ఆఫీసర్లు అంటున్నారు. ఏప్రిల్ 30 వరకు రూ. 250 రేటుకు వ్యాక్సిన్ అందుబాటులో ఉంది. ఇప్పుడు రేట్లు పెరిగాయి. ప్రైవేటులో వ్యాక్సిన్ నిల్వలుంటే ఎక్కువ ధరకు అమ్ముకొని వ్యాపారం చేసుకునే ప్రమాదముందని హెల్త్ డిపార్ట్మెంట్ వర్గాలు చెబుతున్నాయి.
18-44 ఏజ్ వాళ్లకెప్పుడు..!
రాష్ట్రంలో 18 నుంచి 44 ఏండ్ల మధ్య వయసు వాళ్ల కోసం 4.4 లక్షల డోసులను కేంద్ర ప్రభుత్వం కేటాయించింది. కానీ, ఈ ఏజ్ గ్రూప్ వాళ్లకు వ్యాక్సిన్ వేసే విషయంలో రాష్ట్ర ప్రభుత్వం ఇప్పటికీ ముందుకు రాలేదు. ప్రస్తుతం రాష్ట్రంలో 4 లక్షల డోసులు అందుబాటులో ఉన్నాయి. ఇందులో చాలా కొద్ది మొత్తమే కొవాగ్జిన్ ఉంది. ఎక్కువ డోసులు కొవిషీల్డ్వే ఉన్నాయి.
వెబ్సైట్లో స్లాట్లకు తిప్పలు
వ్యాక్సినేషన్కు రిజిస్ట్రేషన్ తప్పనిసరి చేయడం జనానికి ఇబ్బందిగా మారింది. ఇప్పటికీ కొవిన్ రిజిస్ట్రేషన్ సైట్‌‌లో సరైన సమాచారం అందుబాటులో లేదు. సైట్‌‌లో కొన్ని సెంటర్ల వివరాలే ఉన్నాయి. అన్ని సెంటర్లు, అన్ని ఏరియాల్లో వ్యాక్సిన్ అందుబాటులో ఉంచాల్సిన హెల్త్ డిపార్ట్మెంట్ కొన్ని సెంటర్లలోనే అందుబాటులో ఉంచుతోంది. దీంతో ప్రజలు తమకు స్లాట్ ఎప్పుడు దొరుకుతుంది.. ఏ ఏరియాలో బుక్ చేసుకోవాలో తెలియక ఆందోళన చెందుతున్నారు. కొన్ని సెంటర్లలో ఒక్క రోజు స్లాట్లు చూపిస్తే, ఇంకో రోజు నాట్ అప్లికేబుల్‌ అని చూపిస్తోంది. ఆన్లైన్లో రిజిస్ట్రేషన్ ప్రాసెస్తో పల్లెల్లోని ప్రజలు మరింత ఇబ్బంది పడుతున్నారు.
