- పొంగులేటికి దీటైన క్యాండిడేట్గా భావిస్తున్న హైకమాండ్
- 200 కార్లతో నియోజకవర్గంలో వద్ది రాజు భారీ ర్యాలీ
- కేసీఆర్ సూచనమేరకే బలప్రదర్శన చేశారని పార్టీలో చర్చ
భద్రాద్రి కొత్తగూడెం/పాల్వంచ రూరల్, వెలుగు: ఉమ్మడి ఖమ్మం జిల్లాలో రాజకీయాలు రోజుకో మలుపు తిరుగుతున్నాయి. ముఖ్యంగా కొత్తగూడెం నియోజకవర్గంలో ఆసక్తికర పరిణామాలు చోటుచేసుకుంటున్నాయి. ఇక్కడి నుంచి బీఆర్ఎస్ క్యాండిడేట్గా సిట్టింగ్ఎమ్మెల్యే వనమా వెంకటేశ్వరరావు పేరును సీఎం కేసీఆర్ ఇప్పటికే ప్రకటించారు. కానీ, బీ ఫారం ఇచ్చే నాటికి కొన్ని సర్దుబాట్లు ఉంటాయని హైకమాండ్ లీకులు ఇస్తోంది. ఈ క్రమంలో ఎమ్మెల్యే టికెట్రేసులో రాజ్యసభ సభ్యుడు వద్దిరాజు రవిచంద్ర కూడా ఉండొచ్చని తెలుస్తోంది. ఇటీవల బీఆర్ఎస్ హైకమాండ్ వద్దిరాజును కొత్తగూడెం ఇన్చార్జిగా ప్రకటించడంతో సోమవారం ఆయన ఏకంగా 200 కార్లతో భారీ ర్యాలీ తీయడం చర్చనీయాంశంగా మారింది. ఇక్కడి నుంచి కాంగ్రెస్ తరఫున మాజీ ఎంపీ పొంగులేటి శ్రీనివాస్రెడ్డి పోటీ చేయనున్నట్లు ప్రచారం జరుగుతుండగా.. అతన్ని దీటుగా ఎదుర్కొనేందుకే రవిచంద్రను స్వయంగా కేసీఆరేరంగంలోకి దింపారని, అందుకే ఈ స్థాయిలో బలప్రదర్శనకు దిగారని బీఆర్ఎస్ వర్గాల్లో టాక్ నడుస్తోంది. ఇదే జరిగితే.. వనమాకు షాక్తప్పదని బీఆర్ఎస్లో చర్చ జరుగుతున్నది.
ఓసీలను మట్టి కరిపిస్తం : రవిచంద్ర
కొత్తగూడెం నియోజకవర్గంలోని సుజాతనగర్, కొత్తగూడెం, చుంచుపల్లి, లక్ష్మీదేవిపల్లి, పాల్వంచ మండలాల్లో సోమవారం రవిచంద్ర ఆధ్వర్యంలో బీఆర్ఎస్నాయకులు భారీ కార్ర్యాలీ నిర్వహించారు. అనంతరం పాల్వంచ మండలంలోని పెద్దమ్మ టెంపుల్దగ్గర్లో ఏర్పాటు చేసిన సభలో రవిచంద్ర హాట్కామెంట్స్చేశారు. కొత్తగూడెం నియోజకవర్గంలో పోటీ చేసే ఓసీలను మట్టి కరిపిస్తామని హెచ్చరించారు. కొంతమంది స్థానికేతరులైన ఓసీలు ఇక్కడ పోటీ చేసేందుకు వస్తున్నారని, అటువంటి వారిని చిత్తుగా ఓడిస్తామని పరోక్షంగా మాజీ ఎంపీ పొంగులేటి శ్రీనివాస్ రెడ్డిని విమర్శించారు. ‘ఇక్కడ మీ కార్యకర్తలు ఎవరూ లేరు. మీరు డబ్బు సంచులు పట్టుకొని వస్తే ఇక్కడ తిప్పి కొడ్తారు..’ అంటూ ఫైర్ అయ్యారు. తానే కాదని, తన వెనక సీఎం కూడా ఈ నియోజకవర్గంపై ప్రత్యేక దృష్టి పెట్టారన్నారు. ఇంకా చాలా మంది ప్రతినిధులు ఇక్కడకు వస్తారన్నారు. తాను వనమా గెలుపు కోసం నిరంతరం కృషి చేస్తానని పేర్కొన్నారు.
