చిలగడ దుంప, మొరం గడ్డ, గెనుసు గడ్డ .. ఇలా రకరకాల పేర్లు స్వీట్ పొటాటోకి. మామూలుగా అయితే దీన్ని ఉడకబెట్టి, కాల్చి, పులుసు చేసుకుని తింటారు. ఇలానే కాకుండా ఇంకా బోలెడు వెరైటీలు చేసుకోవచ్చు ఈ స్వీట్ పొటాటోతో. పిల్లలు ఇష్టంగా తినే డోనట్స్, ఈవెనింగ్ శ్నాక్ టాట్స్‌‌తో పాటు క్రేజీగా స్వీట్ పొటాటోతో స్పైసీ కర్రీ కూడా చేసుకోవచ్చు. పైగా వీటిని చేయడం అంత కష్టమేం కాదు. ఈజీగా వండేయొచ్చు. ఇంకెందుకాలస్యం... స్వీట్ పొటాటోలతో వెరైటీలు చేయడానికి రెడీ అయిపోండి.
స్పైసీ కర్రీ
కావాల్సినవి :
గెనుసు గడ్డలు – అర కిలో, నీళ్లు – రెండు కప్పులు
పసుపు – పావు టీస్పూన్, ఉప్పు – ఒక టీస్పూన్
ధనియాలు – రెండు టేబుల్ స్పూన్లు
జీలకర్ర, ఆవాలు, మినప్పప్పు – ఒక్కో టీస్పూన్ చొప్పున
శనగపప్పు – ఒకటిన్నర టేబుల్ స్పూన్
ఎండు మిర్చి – మూడు, నూనె – సరిపడా
కరివేపాకు – కొద్దిగా
తయారీ :
ఒక పాత్రలో నీళ్లు పోసి, గెనుసు గడ్డల ముక్కలు, పసుపు, ఉప్పు వేసి ఉడికించాలి. తర్వాత వడకట్టాలి. ఒక పాన్లో ధనియాలు, జీలకర్ర, శనగపప్పు, ఎండు మిర్చి వేసి వేగించాలి. వాటన్నింటినీ మిక్సీజార్లో వేసి గ్రైండ్ చేయాలి. మరో పాన్లో నూనె వేడి చేసి, ఆవాలు, మినప్పప్పు, కరివేపాకు వేసి వేగించాలి. ఆ తర్వాత ఉడికించిన గెనుసు గడ్డ ముక్కలు వేసి కలపాలి. కాసేపు వేగాక, ఉప్పు, ముందుగా రెడీ చేసుకున్న పొడి వేసి కలపాలి. రెండు నిమిషాలు వేగిస్తే స్వీట్ పొటాటోలతో స్పైసీ కర్రీ రెడీ.
స్వీట్ పొటాటో టాట్స్
కావాల్సినవి :
గెనుసు గడ్డలు – రెండు, మొక్కజొన్న పిండి – రెండు టేబుల్ స్పూన్లు
ఉప్పు, మిరియాల పొడి – ఒక్కోటి పావు టీస్పూన్ చొప్పున, నూనె, నీళ్లు – సరిపడా
తయారీ :
కుక్కర్లో నీళ్లు పోసి గెనుసు గడ్డలు ముక్కల్ని ఉడికించాలి. తర్వాత నీటిని వడకట్టాలి. ఒక గిన్నెలో ఉడికించిన గెనుసు గడ్డలు, మొక్కజొన్న పిండి, ఉప్పు, మిరియాల పొడి వేసి ముద్దగా కలపాలి. ఆ పిండిని చిన్న చిన్న క్యూబ్స్లా తయారుచేసుకోవాలి. ఒక పాన్లో నూనె వేడి చేసి, అందులో క్యూబ్స్ వేసి బ్రౌన్ కలర్ వచ్చేంత వరకు వేగించాలి. వీటిని టొమాటో కెచెప్తో తింటే బాగుంటాయి.
డోనట్స్
కావాల్సినవి :
గెనుసు గడ్డలు – అర కిలో
చక్కెర – అర కప్పు, మైదా – ఒక కప్పు
పాల పొడి – అర కప్పు, కోడిగుడ్లు – రెండు, బ్రెడ్ పొడి – ఒక కప్పు
నూనె, నీళ్లు – సరిపడా
తయారీ :
గెనుసు గడ్డలను తొక్క తీసి, ముక్కలుగా కోయాలి. కుక్కర్లో నీళ్లు పోసి, ఈ ముక్కల్ని అందులో వేసి మూత పెట్టి ఉడికించాలి. గెనుసు గడ్డలు ఉడికాక, నీళ్లు ఒంపేసి, ముక్కల్ని ఒక గిన్నెలో వేయాలి. ఉడికిన ముక్కల్ని చేత్తో పొడి పొడి చేయాలి. చక్కెర, పాల పొడి, మైదా వేసి టెక్స్చర్ మెత్తగా అయ్యేంత వరకు కలపాలి. ఆ తర్వాత కొంచెం కొంచెం పిండి తీసుకుని డోనట్స్లా చేయాలి. తర్వాత డోనట్స్ని కోడిగుడ్డు సొనలో ముంచి, బ్రెడ్ పొడిలో దొర్లించాలి. కాగిన నూనెలో రెండు వైపులా కాల్చితే ఎంతో టేస్టీగా ఉండే స్వీట్ పొటాటో డోనట్స్ రెడీ.
