దసరా నవరాత్రి ఉత్సవాలు ముగిశాయి.. మరో కొద్ది రోజుల్లో కార్తీకమాసం మొదలవుతుంది. చాలామంది హిందువులు..కార్తీకమాసంలో నాన్ వెజ్ తినరు. మరి అలాంటప్పుడు.. ఒక్కసారి తింటే కొన్ని నెలలపాటు అనుభూతిని ఆస్వాదించే నాన్ వెజ్ రెసిపీని టేస్ట్ చేయాలనుకుంటున్నారా.. రెగ్యులర్ గా చికెన్ కూరలు.. ఫ్రై అంటే ఏముంటుంది. రొటీన్ ఫుడ్డేగా మరి.. మరి వెరైటీ కోడి కొబ్బరి కారాన్ని ఇంట్లోనే వెరైటీగా తయారు చేసుకొని తిన్నారంటే నా సామిరంగా.. కొన్ని నెలల పాటు ఆ అనుభూతి ఉండాల్సిందే.. మరి ఇంకెందుకు ఆలస్యం.. అలాంటి కోడి కొబ్బరి కారాన్ని ఎలా తయారు చేయాలో తెలుసుకుందాం. . .!
కోడి కొబ్బరి కారం తయారీకి కావాల్సినవి
- ఎండుమిర్చి - 10
- అల్లం - 2 అంగుళాల ముక్క
- వెల్లుల్లి రెబ్బలు 20
- ఉల్లిపాయలు - 2
- ఉప్పు - రుచికి తగినంత
- పసుపు - అర టీస్పూన్
- కారం - 2 టేబుల్ స్పూన్లు
- ధనియాల పొడి - 2 టీస్పూన్లు
- గరం మసాలా - 2 టీస్పూన్లు
- చికెన్ - కేజీన్నర
- నిమ్మకాయలు- 2
- నూనె - 10టేబుల్ స్పూన్లు
- తురిమిన పచ్చి కొబ్బరి - 2 కప్పులు
- కరివేపాకు - కొద్దిగా
- కొత్తిమీర - కొద్దిగా
కోడి కొబ్బరి కారం తయారీ విధానం
మార్కెట్ నుంచి చికెన్తీసుకొచ్చిన తరువాత దానిలో కొద్దిగా చిటికెడు ఉప్పు, పసుపును చికెన్ బాగా పట్టేలా కలిపి ఆ తరువాత నీటితో శుభ్రంగా కడిగి ఒక గిన్నెలోకి తీసుకోవాలి. ఇలా చేయడం వలన చికెన్ కు ఉన్న డస్ట్ పోతుంది.
ఇప్పుడు శుభ్రమైన చికెన్ లో ధనియాల పొడి, గరంమసాలా, కారం, ఉప్పు, పసుపు వేసి కొద్దిగా నిమ్మరసం పిండి ముక్కలకు బాగా పట్టేలా కలపాలి. ఈ మిశ్రమాన్ని అరగంట పాటు మూత పెట్టి పక్కన పెట్టుకోవాలి.
మిక్సీ జార్ లో ఎండుమిర్చి, అల్లం, వెల్లుల్లి రెబ్బలు, ఉల్లిపాయ ముక్కలు ముక్కలు వేసి మెత్తగా పేస్ట్చేసుకోవాలి. ఇప్పుడు స్టవ్ వెలిగించి వెడల్పాటి కళాయిలో చికెన్ ముక్కలను వేయించేందుకు సరిపడ నూనె పోసి వేడి చేయాలి.
నూనె వేడెక్కిన తరువాత చికెన్ ముక్కలను అందులో వేయాలి. అయితే చికెన్ ముక్కలులు కళాయిలో ఒకదానికొకటి అంటుకోకుండా చూసుకుంటే ఈ రెసిపీ బాగా రుచిగా ఉంటుంది.
చికెన్ అన్ని వైపులా సమానంగా సెమీ డీప్ ఫ్రై వేగేంతవరకుముక్కలను అటూ ఇటూ తిప్పుతూ బాగా ఎర్రగా ఫ్రై చేయాలి.
చికెన్ ముక్కలు మంచి రంగు వచ్చిన తరువాత మిక్సీ పట్టిన ఎండిమిర్చి, ఉల్లిపాయ, అల్లం, వెల్లుల్లి పేస్ట్ ను ఇందులో వేసి పచ్చి వాసన పోయేవరకు సన్నని మంటపై బాగా వేయించుకోవాలి. ఆ తరువాత దీనిపైన కరివేపాకు వేయాలి.
మసాలా చికెన్ కు మొత్తం పట్టేలా పైకి కిందకు కలుపుతూ నూనె పైకి తేలే సమయంలో పచ్చి కొబ్బరి తురుము వేసి బాగా కలపాలి. కొబ్బరి వేగేంత వరకు సన్నని మంటపై చికెన్ ముక్కలు.. కొబ్బరి తురుము కలిసేలా వేయిస్తూ కలపాలి. ఇలా అయిన తరువాత మరో ఐదు నిమిషాలు రోస్ట్గా వేగిన తరువాత సన్నగా తరిగిన కొత్తిమీరను ఈ చికెన్ ముక్కలపై చల్లాలి. అంతే ఇక కోడి కొబ్బరి కారం రెడీ.
ఈ వెరైటీ కోడి కొబ్బరి కారాన్ని వేడి వేడి అన్నంలోకి గానీ, బిర్యానీ, చపాతీల్లోకి గానీ ఇది అద్భుతంగా ఉంటుంది. ముక్క మెత్తగా, జ్యూసీగా చూస్తూనే నోట్లో నీళ్లూరిపోయేలా ఉంటది. మరి ఇంకెందుకు ఆలస్యం ఓ సారి ట్రై చేయండి...!
