బండి లేదా కారు కొనేందుకు డబ్బులు లేదా డెబిట్ కార్డ్, క్రెడిట్ కార్డు తీసుకొని వెళ్తారు ఎవరైనా. కానీ, ఇతను మాత్రం ఒక బ్యాగ్ నిండా చిల్లర పైసలు తీసుకెళ్లాడు. ఆ చిల్లర పైసలతోనే తనకు నచ్చిన స్కూటీ కొన్నాడు కూడా. అతని పేరు హఫిజుర్ అకంద్. అస్సాంలో చిన్న దుకాణం ఉంది అతనికి. రోజూ కొన్ని చిల్లర పైసల్ని దాచిపెట్టి తన కలని నిజం చేసుకున్నాడు ఇతను.
అస్సాంలోని బార్పేట జిల్లాలో హఫిజుర్కి చిన్న దుకాణం ఉంది. సరుకులు తెచ్చేందుకు తను కూడా ఒక స్కూటీ కొనుక్కోవాలని ఎప్పటినుంచో అనుకుంటున్నాడు. అయితే, ఒకేసారి మొత్తం డబ్బు కట్టకున్నా, డౌన్పేమెంట్అయినా (రూ.30వేలు) కట్టి బండి తెచ్చుకోవాలి అనుకున్నాడు. కానీ, అంత డబ్బు కూడా అతని దగ్గర లేదు. దాంతో, రోజూ రూపాయి, రెండు రూపాయలు, 10 రూపాయల నాణేల్ని జమచేయడం మొదలుపెట్టాడు. అలా ఒక ఏడాదిలోనే ఆ బ్యాగ్ నిండా కాయిన్స్ పోగయ్యాయి. ఆ కాయిన్స్తో బండి కొందామని బ్యాగ్ తీసుకుని దగ్గర్లోని బైక్ షోరూమ్కి వెళ్లాడు.
3 గంటలు పట్టింది
షోరూమ్ వరకు అయితే వెళ్లాడు. కానీ, ‘చిల్లర పైసలు తెచ్చాను’ అంటే వాళ్లు ఏమంటారోనని బయటే నిల్చున్నాడు. అతడిని గమనించిన సేల్స్మెన్ ఒకరు ‘ఏం కావాలి? ఎందుకలా ఇటువైపే చూస్తున్నావ్?’ అని అడిగాడు. ‘నేను స్కూటీ కొనడానికి వచ్చాను. అయితే, చిల్లర పైసలు తీసుకుంటారో? లేదో?నని ఆలోచిస్తున్నాను’ అని చెప్పాడు హఫిజుర్. దాంతో ఆ సేల్స్మన్ ‘ఏం టెన్షన్ పడకు. మేం తీసుకుంటాం’ అని చెప్పి, హఫిజుర్ని షోరూమ్లోకి తీసుకెళ్లాడు. అతని బ్యాగ్లోని చిల్లర పైసల్ని ఒకచోట కుప్ప పోశాడు. అక్కడి సేల్స్మేనేజర్తో పాటు ఐదుగురు సేల్స్మెన్లు తలా కొంత చిల్లర తీసుకుని కష్టం అనుకోకుండా మూడు గంటలు లెక్కబెట్టారు. చిల్లర మొత్తం 22 వేల రూపాయలు అయింది. డౌన్పేమెంట్కి ఇంకా 8 వేలు తక్కువయ్యాయి. అతనికి షోరూమ్వాళ్లు లోకల్ బ్యాంక్ నుంచి ఫైనాన్స్ ఇప్పించారు. దాంతో 30 వేలు డౌన్పేమెంట్ కట్టి సుజుకీ అవెనిస్ స్పెషల్ ఎడిషన్ స్కూటీ తీసుకున్నాడు. షోరూమ్వాళ్లు తీసిన కొన్ని ఫొటోలు, వీడియోని హిరక్ జె దాస్ అనే యూట్యూబర్ ఫేస్బుక్లో పెట్టాడు. ఈ వీడియో చూసినవాళ్లంతా హఫిజుర్ని మెచ్చుకుంటూ కామెంట్లు పెడుతున్నారు.
వాళ్లకి థ్యాంక్స్
‘నాకు చిన్న కిరాణ దుకాణం ఉంది. చాక్లెట్, చిప్స్ కొనేందుకు వచ్చే చిన్నపిల్లలు ఒక రూపాయి, రెండు రూపాయలు, ఐదు రూపాయలు ఇచ్చేవాళ్లు. ఆ కాయిన్స్ని ఒక బ్యాగ్లో దాచేవాడిని. ఇప్పుడు ఆ కాయిన్స్తోనే స్కూటీ డౌన్పేమెంట్ కట్టాను. నా ప్రాబ్లమ్ అర్థం చేసుకున్న డీలర్, సేల్స్మెన్కు థ్యాంక్స్”అని చెప్పాడు హఫిజుర్.