విశాల్, అంజలి జోడీ అంటే ప్రేక్షకులకు 'మద గజ రాజా' సినిమానే గుర్తుకొస్తుంది. ఈ సినిమా మంచి విజయం సాధించిపెట్టింది. వీరిద్దరి కాంబినేషన్ కు ఒక ప్రత్యేక గుర్తింపును తెచ్చిపెట్టింది. ఇప్పుడు అదే సెంటిమెంట్ ను నిజం చేస్తూ, విశాల్ తన 35వ సినిమాలో మరోసారి అంజలిని కథానాయికగా ఎంపిక చేశారు. ఈ మూవీపై అభిమానుల్లో ఇప్పటికే భారీ అంచనాలు నెలకొన్నాయి.
గత జులైలో ప్రారంభమైన ఈ సినిమా ఆగస్టు 1న మొదటి షెడ్యూల్ ను పూర్తి చేసుకుంది. సోమవారం నుండి ఊటీలో రెండో షెడ్యూల్ మొదలైంది. ఈ షెడ్యూల్ లోనే అంజలి షూటింగ్‌లో పాల్గొంది. దర్శకుడు రవి అరసు ఈ సినిమాను కేవలం 45 రోజుల్లో పూర్తి చేయాలనే లక్ష్యంతో నాన్-స్టాప్ షెడ్యూల్స్ ను ప్లాన్ చేశారు. ఈ సినిమాలో అంజలితో పాటు దుషారా విజయన్ కూడా మరో హీరోయిన్‌గా నటిస్తున్నారు. తంబి రామయ్య, అర్జై వంటి ప్రముఖ నటులు కీలక పాత్రల్లో కనిపించనున్నారు.
►ALSO READ | వీధి కుక్కలకు 'డాగ్ పోలీస్' పెడతారా?.. సుప్రీంకోర్టు తీర్పుపై రామ్ గోపాల్ వర్మ ప్రశ్నలు!
ఈ సినిమాను ప్రముఖ నిర్మాత ఆర్.బి. చౌదరి, వారి సూపర్ గుడ్ ఫిలిమ్స్ బ్యానర్ పై నిర్మిస్తున్నారు. ఇది వారి బ్యానర్ లో 99వ చిత్రం కావడం విశేషం. 'మద గజ రాజా' సినిమాకు సినిమాటోగ్రాఫర్ గా పనిచేసిన రిచర్డ్ ఎం. నాథన్ ఈ కొత్త చిత్రానికి కూడా పనిచేస్తున్నారు. విశాల్ ఇటీవలి చిత్రం 'మార్క్ ఆంటోని'కి సంగీతం అందించిన జి.వి. ప్రకాశ్‌ కుమార్ దీనికి కూడా మ్యూజిక్ అందిస్తున్నారు.
విశాల్, అంజలిల కలయిక ఈ సినిమాకు మరింత ఆకర్షణను తెచ్చిపెట్టడమే కాకుండా, బాక్సాఫీస్ వద్ద విజయం సాధిస్తుందని అభిమానులు ఆశాభావం వ్యక్తం చేస్తున్నారు. ప్రస్తుతం విశాల్ తన స్వీయ దర్శకత్వంలో 'తుప్పరివాలన్ 2' చిత్రాన్ని కూడా తెరకెక్కిస్తున్నారు. 'మద గజ రాజా' సెంటిమెంట్ ఈ కొత్త సినిమాకు మరో విజయాన్ని అందిస్తుందో లేదో వేచి చూడాలి.
Welcome onboard darling @yoursanjali. looking forward to work with u once again. god bless#Vishal35#SGF99#MadhaGajaRaja https://t.co/H7XGvXA038
— Vishal (@VishalKOfficial) August 22, 2025
