ప్రత్యేక తెలంగాణ ఏర్పాటై.. ముఖ్యమంత్రిగా బాధ్యతలు చేపట్టిన తర్వాత ఇప్పటి వరకూ సీఎం కేసీఆర్ చాలాసార్లు ఢిల్లీ వెళ్లారు. అయితే అక్కడ ఎక్కువ రోజులు గడిపేవారు కాదు. కానీ ఇటీవల కేసీఆర్ 8 రోజుల పాటు ఢిల్లీలోనే ఉన్నారు. దీంతో ఆయన పొలిటికల్ ప్లాన్స్పై చాలా ఊహాగానాలు షికార్లు చేస్తున్నాయి. ఢిల్లీ టూర్ సందర్భంగా కేసీఆర్ చేసిన పనులు చాలానే ఉన్నాయి. సీక్రెట్గా ఆయన కాంగ్రెస్ లీడర్లను కలవొచ్చు. ఎందుకంటే.. కాంగ్రెస్ పార్టీకి చెందిన మాజీ ఎంపీలు చాలా మంది ఇప్పుడు టీఆర్ఎస్లోనే ఉన్నారు. కాంగ్రెస్ హైకమాండ్తో మాట్లాడాలనుకుంటే వారికి ఇప్పటికీ అవకాశం ఉంటుందనే విషయాన్ని మనం మరిచిపోకూడదు. కేసీఆర్ ఉద్దేశపూర్వకంగానే కేజ్రీవాల్, శరద్పవార్లను కలవలేదనే ప్రచారం కూడా జరుగుతోంది. కానీ నిజం ఏమిటనేది నెమ్మదిగా బయటపడుతుంది.
నేషనల్ పాలిటిక్స్కు ఇది టైం కాదు
2021 మేలో జరిగిన అసెంబ్లీ ఎన్నికల్లో గ్రాండ్ విక్టరీ కొట్టిన పశ్చిమబెంగాల్ సీఎం మమతా బెనర్జీకి జాతీయ రాజకీయాలపై చాలా ఆశలే ఉన్నాయి. ఇక శరద్పవార్ కూడా ప్రధానమంత్రి అభ్యర్థిత్వం కోసం చాలా ఆతృతతో ఉన్నారు. కేజ్రీవాల్ విషయానికి వస్తే 2024 లోక్సభ ఎన్నికల తర్వాతే ఆయన అసెంబ్లీ ఎన్నికలను ఎదుర్కోవాల్సి ఉంది. కానీ కేసీఆర్ 2023 డిసెంబర్లోనే రాష్ట్ర అసెంబ్లీ ఎన్నికలను ఫేస్ చేయాల్సి ఉంది. ఆ ఎన్నికల తర్వాత మాత్రమే తాను ఎక్కడ ఉంటాననే విషయం కేసీఆర్కు అర్థమవుతుంది. ఒకవేళ 2023 అసెంబ్లీ ఎన్నికల్లో కేసీఆర్ ఓటమిపాలైతే.. ఆయనకు నేషనల్ పాలిటిక్స్పై అంతగా ఆశలు ఉండకపోవచ్చు. ఒకవేళ ప్రతిపక్షంలో కీలక పాత్ర పోషించాలని కేసీఆర్ కోరుకుంటే.. అది నరేంద్రమోడీకి వ్యతిరేకంగా వెళ్లడమే అవుతుంది. బీజేపీని వ్యతిరేకించి కేసీఆర్ సాధించేదేమిటి? అనేది ఇక్కడ ఎదురయ్యే ప్రశ్న. తెలంగాణలో కాంగ్రెస్ పార్టీ కేసీఆర్కు ప్రధాన ప్రత్యర్థి కదా? అందువల్ల మమతాబెనర్జీ, శరద్పవార్, కేజ్రీవాల్ చేసినట్టుగా కేసీఆర్ చేస్తే అందులో ఎలాంటి లాజిక్ ఉండబోదు. అలాగే రాహుల్ గాంధీని ప్రతిపక్షాల ఉమ్మడి నాయకుడిగా చూడాలని కూడా కేసీఆర్ కచ్చితంగా అనుకోకపోవచ్చు. అందువల్ల తన ప్రత్యర్థులతో ఆయన ఎందుకు కలుస్తారు? ఈ కారణాల వల్ల నేషనల్ పాలిటిక్స్లోకి కేసీఆర్ వెళ్లాల్సిన సరైన టైం ఇది కాదు. ఒకవేళ అలా చేస్తే మాత్రం నీళ్లు లేని స్విమ్మింగ్పూల్లోకి జంప్ చేసినట్టే భావించాలి.
తెలంగాణలో ఎదురయ్యే సమస్యలు
ఏడేండ్లు అధికారంలో ఉన్నందువల్ల సాధారణంగానే ప్రభుత్వ వ్యతిరేకత మొదలవుతుంది. అలాగే ప్రభుత్వ తీరుపై విసుగు కూడా కలుగుతుంది. కేసీఆర్ బయట ఎక్కువగా కనిపించే పొలిటీషియన్. ఎప్పుడైతే ఒక పొలిటీషియన్ ఓవర్ఎక్స్పోజ్ అవుతారో అప్పుడు తన చరిష్మాను, తన సీక్రెట్ను అతను కోల్పోతాడు. కేసీఆర్కు పూర్తి వ్యతిరేకమైన వ్యక్తి ఒడిశా ముఖ్యమంత్రి నవీన్ పట్నాయక్. ఆయన ఎక్కువగా బయట ఎక్స్పోజ్ కారు. కానీ 21 ఏండ్ల పాటు ఏకథాటిగా అధికారంలో కొనసాగుతున్నారు. ప్రస్తుతం కేసీఆర్కు ఎదురయ్యే పొలిటికల్ సవాళ్లు ఏమిటనే విషయాన్ని పరిశీలిస్తే..
1. అధికారంలో ఉండటం వల్ల కేసీఆర్ కాంగ్రెస్, టీడీపీకి చెందిన కీలక నాయకులను ఆకర్షించగలిగారు. ప్రస్తుతం కొత్త లీడర్లకు టీఆర్ఎస్లో అవకాశాలు తక్కువే. ఇదే సమయంలో పాత సీనియర్ లీడర్లకు కచ్చితంగా సరైన అవకాశాలు కల్పించాల్సి ఉంటుంది. అయితే అలాంటి పదవులు ఎక్కువ సంఖ్యలో లేవు. పదవులు దక్కని సీనియర్ లీడర్లు పార్టీకి నష్టం చేసే అవకాశం ఉంటుంది. కేసీఆర్ వాళ్లను వదిలి పెట్టలేరు లేదా అందరికీ పదవులు ఇవ్వలేరు.
2. కాంగ్రెస్ పార్టీలో కొత్త ఉత్సాహం కనిపిస్తోంది. అసంతృప్తితో ఉన్న చాలామంది నేతలు టీఆర్ఎస్ నుంచి మళ్లీ కాంగ్రెస్లో చేరే అవకాశాలు లేకపోలేదు. అలాగే మైనార్టీల ఓట్లు కూడా చీలి పోయే అవకాశాలు ఉన్నాయి.
3. బీజేపీ విషయానికి వస్తే.. తెలంగాణలో వెనుకబడిన వర్గాల పార్టీగా ఆ పార్టీ అవతరిస్తోంది. అలాగే ఎవరైనా కొత్తగా రాజకీయాల్లోకి రావాలనుకున్నా అలాంటి వారిని ఆకర్షిస్తోంది. టీఆర్ఎస్, కాంగ్రెస్ పార్టీలు సీనియర్ లీడర్లతో నిండిపోవడంతో.. బీజేపీలో కొత్త వారికి ఎక్కువ స్పేస్ కనిపిస్తోంది.
4. కేసీఆర్ ప్రభుత్వ పనితీరు ప్రస్తుతం తీవ్ర విమర్శలను ఎదుర్కొంటోంది. ఉచిత స్కీములు, సంక్షేమ పథకాలు వాటిని పొందలేని కొందరిలో ఆగ్రహాన్ని రగిలిస్తున్నాయి. ఇంకో ముఖ్యమైన విషయం ఏమిటంటే.. ఒక సెక్షన్ జనాలు మంచి పాలనను కోరుకుంటున్నారు. ప్రస్తుతం కేసీఆర్ కూడా ఓ డైలమాలో ఉన్నారు. ఉచితంగా ఏమివ్వాలి? ఎంతివ్వాలి? ఎవరికివ్వాలి? అనే విషయాన్ని ఆయన తేల్చుకోలేకపోతున్నారు. ప్రభుత్వం నుంచి ఏదో ఒకటి పొందిన వారిలో సంతృప్తి కలగడం లేదు. వారు మరింత కావాలని కోరుకుంటున్నారు. ఓటర్గ్రీడ్ అనేది అపరిమితమైనది. ఆర్థికశాస్త్ర పరంగా చెప్పాలంటే.. దీనిని ‘లా ఆఫ్ డిమినిషింగ్ రిటర్న్’ అంటారు. మీరు ఎంత ఎక్కువ ఇస్తే.. దాని విలువ అంత తగ్గిపోతుంది.
1955లో ప్రముఖ సోషియాలజిస్ట్ ఎంఎన్ శ్రీనివాస్.. సంస్కృతీకరణ, ఓటుబ్యాంకు అనే పదాలను ఖాయం చేశారు. సంస్కృతీకరణ అనేది సామాజిక మార్పునకు ఉద్దేశించిందని, ఓటుబ్యాంకు అనేది విశ్వసనీయ ఓటర్ల సమూహం, వీరంతా ఒక నిర్థిష్ట అభ్యర్థికే ఓటు వేస్తుంటారని ఎంఎన్ శ్రీనివాస్ చెప్పారు. 25 ఏండ్ల క్రితం, ఒకవేళ మీరు ఒక కులంలో ఎవరికైనా ఏదైనా సాయం చేసినట్లయితే.. ఆ కులం ఓట్లు మొత్తం మీకే పడేవి. కానీ ప్రస్తుతం పరిస్థితులు మారిపోయాయి. సామాజిక మార్పుల కారణంగా ఓటు బ్యాంకులనేవి విచ్ఛిన్నమైపోయాయి. ఒకవేళ హుజూరాబాద్లోని దళితులకు మీరు ఏమైనా చేస్తే, వేరే ప్రాంతాల్లోని దళితులు కూడా అదే కావాలని కోరుకుంటున్నారు. లేకపోతే వారు మీ గురించి అస్సలు పట్టించుకోరు. అందువల్ల ఓటు బ్యాంకుల విచ్ఛిన్నమనే సవాల్ను కూడా కేసీఆర్ ఎదుర్కొంటున్నారు. ఎవరో ఒకరి ఏదో చేయడం ద్వారా ప్రస్తుతం కేసీఆర్ శత్రులను సృష్టించుకుంటున్నారు. ప్రస్తుతం అన్ని కులాలు.. అన్ని పార్టీలకు ఓటు వేస్తున్నాయి. కులాల్లోనే వారు విడిపోతున్నారు. తెలంగాణలో గొప్ప కుల నాయకులు ఎవరైనా ఉన్నారా? ఇప్పటి వరకూ ఫార్వార్డ్ కులాలు మాత్రమే ఓటు బ్యాంకుగా ఉండేవి. అయితే ఇప్పుడు ఈ కులాలు అన్ని పార్టీలకు విస్తరించాయి. అందువల్ల స్పష్టమైన ఓటు బ్యాంకులు అనేది కనుమరుగైపోయాయి.
కేసీఆర్ ముందున్న ఆప్షన్స్
- కేసీఆర్ ప్రస్తుతం అటు కాంగ్రెస్తో కానీ, ఇటు బీజేపీతో కానీ పొత్తు పెట్టుకోలేరు. ఒకవేళ కేసీఆర్ కాంగ్రెస్తో జట్టు కడితే అప్పుడు బీజేపీ ప్రధాన ప్రతిపక్షంగా మారుతుంది. అప్పుడు పదవులు పొందలేని టీఆర్ఎస్ సీనియర్ నాయకుల పరిస్థితి ఏమిటి? ఒకవేళ కేసీఆర్ బీజేపీతో దోస్తీ చేస్తే.. అప్పుడు 10 శాతం ఉన్న మైనార్టీ ఓటర్లను కాంగ్రెస్కు కోల్పోవాల్సి వస్తుంది.
- కేసీఆర్ టీఆర్ఎస్ లోని మొత్తం సీనియర్ లీడర్లను పక్కనపెట్టాలి. బీజేపీ అధికారంలో ఉన్న చాలా రాష్ట్రాల్లో ప్రస్తుతం చేస్తున్న పని ఇదే. కేసీఆర్ సీనియర్లను పక్కన పెట్టి వచ్చే ఎలక్షన్లలో కొత్త ముఖాలకు చోటు కల్పించాలి.
- మంచి ప్రభుత్వాన్ని నడపడం. ఇది చెప్పడానికి సులువుగానే ఉంటుంది. కానీ, సమర్థవంతమైన, అవినీతి మరకల్లేని ప్రభుత్వాన్ని నడిపించడం అంటే చాలా కష్టమైన విషయం.
- తెలంగాణ రాష్ట్రాన్ని సాధించామనే మాట ఇకపై చెప్పడానికి టీఆర్ఎస్ నాయకులకు కుదరకపోవచ్చు. ఎందుకంటే రాష్ట్రం సాధించినందుకే జనాలు పదేండ్ల పాటు ఆ పార్టీకి అధికారాన్ని కట్టబెట్టారు.ఓటు బ్యాంకుల కాలం పోయింది
పెంటపాటిపుల్లారావు,పొలిటికల్ అనలిస్ట్
