న్యూఢిల్లీ: వికీపీడియాలో గౌతమ్అదానీ, ఆయన ఫ్యామిలీ, గ్రూప్ కంపెనీల సమాచారాన్ని అదానీ ఉద్యోగులే మానిప్యులేట్ చేశారని వికీపీడియా ఆరోపిస్తోంది. వికీపీడియాను ఫ్రీ ఇంటర్నెట్ ఎన్సైక్లోపీడియాగా వ్యవహరిస్తారు. నిష్పాక్షికమైన రీతిలో సమాచారాన్ని అందుబాటులో ఉంచే ప్రయత్నం చేస్తుంది వికీపీడియా. ఎవరైనా, ఎప్పుడైనా ఇక్కడి సమాచారాన్ని ఎడిట్ లేదా అప్డేట్ చేసే వీలుంటుంది. వికీపీడియాలో సమాచారాన్ని అప్డేట్ చేసేందుకు చాలా మంది వాలంటీర్లు పనిచేస్తుంటారు. ఏమైనా తేడాలుంటే ఎడిట్ చేసేందుకూ వీలుంటుంది. గౌతమ్ అదానీ, ఆయన ఫ్యామిలీ మెంబర్లు, గ్రూప్కంపెనీలపై నిష్పాక్షికమైన రీతిలో ఉంచిన సమాచారంలో మార్పులు–చేర్పులు జరిగినట్లు తాము గుర్తించామని వికీపీడియా తాజాగా వెల్లడించింది.
ఇలా మార్పులు–చేర్పులు చేసిన వారిలో కొంత మంది అదానీ గ్రూప్ ఉద్యోగులైతే, మరికొంత మంది పెయిడ్ ఎడిటర్లు ఉన్నారని పేర్కొంది. అదానీ, ఆయన కుటుంబ సభ్యులు, గ్రూప్ కంపెనీలపై 9 ఆర్టికల్స్ ఉంటే, వాటిని రివైజ్ చేశారని, ఒక రకంగా చెప్పాలంటే తమ ఫిలాసఫీ నాన్–న్యూట్రల్కు వ్యతిరేకంగా వారు వ్యవహరించారని వికీపీడియా స్పష్టం చేసింది. సంబంధిత ఆర్టికల్స్ను ఎడిట్ చేసినది అదానీ ఉద్యోగులేనని చెప్పడానికి నిదర్శనంగా వారి ఐపీ అడ్రస్లను సైతం లిస్ట్ చేసింది. వికీపీడియా ప్రకటనపై పంపిన ఈ–మెయిల్కు అదానీ గ్రూప్ స్పోక్స్పర్సన్ బదులివ్వలేదు. అదానీపై ఒక ఆర్టికల్ 2007 లో మొదలైందని, కానీ 2012 నాటికల్లా ముగ్గురు ఎడిటర్లు దానిలో మార్పులు–చేర్పులు చేశారని వికీపీడియా తెలిపింది.
ఆ తర్వాత ఆ ముగ్గురినీ గుర్తించి, బ్లాక్ చేసినట్లు వెల్లడించింది. ముఖ్యంగా ఫిలాంథ్రపీ సెక్షన్లో వారు మార్పులు–చేర్పులకు పాల్పడినట్లు వివరించింది. ఒక పెయిడ్ ఎడిటర్ కంపెనీ ఐపీ అడ్రస్నే వాడి అదానీ గ్రూప్పై ఆర్టికల్ను పూర్తిగా తిరగ రాసినట్లు వికీపీడియా స్పష్టం చేసింది. వికీపీడియాలోని సమాచారాన్ని అన్డిక్లేర్డ్ పెయిడ్ ఎడిటర్ల ద్వారా ఎడిట్ చేయించడం ఇది మొదటిసారి కాదని, బిలియనీర్లు కొంత మంది అలా చేస్తున్నారని వికీపీడియా వివరించింది.