- ఇద్దరిని రక్షించిన పోలీసులు
- మూడేండ్ల కొడుకు మృతి
- భార్యాభర్తల గొడవలే కారణం
- అమీన్పూర్ పరిధిలో ఘటన
రామచంద్రాపురం (అమీన్పూర్), వెలుగు: భార్యాభర్తల మధ్య తరచూ గొడవలు జరుగుతుండడంతో మనస్తాపం చెందిన భార్య తన కవల పిల్లలను చెరువులో విసిరేసి తానూ దూకింది. ఈ సంఘటనలో మూడేండ్ల కొడుకు చనిపోగా, తల్లి, మరో కూతురిని పోలీసులు కాపాడారు. వరంగల్ జిల్లాకు చెందిన విద్యాధర్ రెడ్డి, శ్వేత భార్యాభర్తలు. ఇద్దరూ సాఫ్ట్వేర్ ఉద్యోగాలు చేసుకుంటూ రంగారెడ్డి జిల్లా చందానగర్లో ఉంటున్నారు. వీరికి మూడేండ్ల వయస్సున్న కవల పిల్లలు శ్రీహా, శ్రీహాన్స్ఉన్నారు. అయితే, శ్వేత, విద్యాధర్రెడ్డి మధ్య కొన్ని రోజులుగా గొడవలు జరుతున్నాయి.
శ్వేతతో బుధవారం గొడవపడిన విద్యాధర్ సొంత గ్రామమైన వరంగల్ వెళ్లిపోయాడు. దీంతో కలత చెందిన శ్వేత గురువారం తెల్లవారుజామున ఇద్దరు పిల్లలను తీసుకొని స్కూటీపై అమీన్పూర్ పరిధిలోని పెద్ద చెరువు వద్దకు చేరుకుంది. శ్రీహా, శ్రీహాన్స్లను ముందు చెరువులోకి విసిరేసి తాను కూడా దూకింది. అక్కడే నైట్ పెట్రోలింగ్ డ్యూటీ చేస్తున్న అమీన్పూర్ హెడ్ కానిస్టేబుల్ జానకీరామ్, కానిస్టేబుల్ ప్రభాకర్ ఇది చూశారు.
వెంటనే చెరువులో దూకి తల్లి శ్వేత, కూతురు శ్రీహాను బయటకు తీసుకువచ్చారు. అప్పటికే శ్రీహాన్స్ నీటిలో మునిగిపోవడంతో అతడి ఆచూకీ దొరకలేదు. గురువారంఉదయం గజ ఈతగాళ్ల సాయంతో గాలించగా శ్రీహాన్స్ డెడ్బాడీ లభించింది. సీఐ నాగరాజు సంఘటనా స్థలాన్ని పరిశీలించి వివరాలు సేకరించారు. కేసు నమోదు చేసి దర్యాప్తు చేస్తున్నామని పూర్తి వివరాలు తెలియాల్సి ఉందని సీఐ తెలిపారు.
