- ఆస్ట్రేలియన్ ఓపెన్ చాంప్ నొవాక్ జొకోవిచ్
- 22 గ్రాండ్స్లామ్స్తో నడాల్ రికార్డు సమం
మెల్బోర్న్: కీలక టైమ్లో బలమైన సర్వీస్లు.. ప్రత్యర్థి పుంజుకునే దశలో సూపర్ ఏస్లు.. శక్తివంతమైన ఫోర్ హ్యాండ్, బ్యాక్హ్యాండ్ షాట్లు.. బేస్లైన్ గేమ్లో తిరుగులేని పెర్ఫామెన్స్.. అద్భుతమైన క్రాస్ కోర్టు రిటర్న్స్తో చెలరేగిన సెర్బియా టెన్నిస్ స్టార్ నొవాక్ జొకోవిచ్.. పదోసారి ఆస్ట్రేలియన్ ఓపెన్ మెన్స్ సింగిల్స్ టైటిల్ను సొంతం చేసుకున్నాడు. ఆదివారం హోరాహోరీగా సాగిన ఫైనల్లో నాలుగోసీడ్ జొకో 6–3,7–6 (7/4), 7–6 (7/5)తో థర్డ్సీడ్ స్టెఫానోస్ సిట్సిపాస్ (గ్రీస్)పై గెలిచాడు. ఓవరాల్గా 22వ గ్రాండ్స్లామ్ను సొంతం చేసుకున్న నొవాక్.. టెన్నిస్ హిస్టరీలో అత్యధిక గ్రాండ్స్లామ్స్ నెగ్గిన స్పెయిన్ లెజెండ్ రఫెల్ నడాల్ (22)తో సమంగా నిలిచాడు. తాజా విక్టరీతో ఏటీపీ ర్యాంకింగ్స్లో నంబర్వన్ ర్యాంక్ను సొంతం చేసుకోనున్న జొకోవిచ్.. హార్డ్ కోర్ట్లో తన వరుస విజయాల సంఖ్యను 28కి పెంచుకున్నాడు. జొకో కెరీర్లో ఇప్పటి వరకు 7 వింబుల్డన్, 3 యూఎస్ ఓపెన్, 2 ఫ్రెంచ్ ఓపెన్ టైటిల్స్ ఉన్నాయి.
అచ్చొచ్చిన కోర్టులో..
గతేడాది కొవిడ్ రూల్స్ను పాటించకపోవడంతో టోర్నీకి దూరమైన జొకో ఈసారి మాత్రం అదరహో అనిపించాడు. తనకు అచ్చొచ్చిన కోర్టులో.. తనకు కలిసొచ్చిన నైట్స్లో.. తనకు మాత్రమే సాధ్యమైన ఆటతో సత్తాచాటాడు. 2 గంటలా 56 నిమిషాల మ్యాచ్లో ప్రతిఘటన ఎదురైన ప్రతిసారి తన ట్రేడ్ మార్క్ ఆటతో అదరగొట్టాడు. ఓవరాల్ మ్యాచ్లో సిట్సిపాస్ 15 ఏస్లు కొట్టినా.. 42 తప్పిదాలతో ఓటమిపాలయ్యాడు. 7 ఏస్లు సంధించిన జొకో.. 22 అనవసర తప్పిదాలు చేశాడు.
