బ్యాంకులు తమ కస్టమర్ల తాజా కేవైసీ స్టేటస్ సంబంధించి తమ డేటాబేస్‌‌‌‌ను అప్‌‌‌‌డేట్ చేయాల్సి ఉంటుంది. ఆర్బీఐ రూల్స్ ప్రకారం ఇది తప్పనిసరి. కేవైసీ చేయని వారి బ్యాంక్ ఖాతాను సస్పెండ్ చేసే అవకాశాలు ఉంటాయి. కేవైసీని పూర్తిగా ఆన్లైన్లో ఎలా అప్‌‌‌‌డేట్ చేయాలో తెలుసుకుందాం.
మీరు ఇప్పటికే అవసరమైన డాక్యుమెంట్లు సమర్పించి, చిరునామాను మార్చుకోకపోతే 'నో యువర్ కస్టమర్' (కేవైసీ) వివరాలను అప్‌‌‌‌డేట్ చేయడానికి బ్యాంక్ శాఖలను సందర్శించాల్సిన అవసరం లేదు. మీ కేవైసీ సమాచారంలో ఎటువంటి మార్పూ లేకుంటే, మీరు ఈ–మెయిల్ -ఐడీ, రిజిస్టర్డ్ మొబైల్ నంబర్, ఏటీఎంలు లేదా ఏదైనా ఇతర డిజిటల్ ఛానెల్‌‌‌‌ల ద్వారా సెల్ఫ్-డిక్లరేషన్‌‌‌‌ను సమర్పించవచ్చు. ఈ ఏడాది జనవరిలో ఆర్బీఐ జారీ చేసిన సర్క్యులర్‌ ప్రకారం.. కేవైసీ సమాచారంలో మార్పు లేకుంటే, సెల్ఫ్ డిక్లరేషన్ ఇస్తే సరిపోతుంది. “రిజిస్టర్డ్ ఈ–మెయిల్-ఐడీ, రిజిస్టర్డ్ మొబైల్ నంబర్, ఏటీఎంలు, డిజిటల్ వంటి ఛానెల్‌‌‌‌ల ద్వారా వ్యక్తిగత ఖాతాదారులకు సెల్ఫ్-డిక్లరేషన్ సౌకర్యాన్ని అందించాలని బ్యాంకులకు ఆదేశాలు ఇచ్చాం. బ్యాంకు శాఖను సందర్శించాల్సిన అవసరం లేకుండా ఛానెల్‌‌‌‌లు (ఆన్‌‌‌‌లైన్ బ్యాంకింగ్/ఇంటర్నెట్ బ్యాంకింగ్, మొబైల్ అప్లికేషన్), లెటర్ మొదలైన వాటిని ఉపయోగించుకోవచ్చు”అని ఆర్బీఐ పేర్కొంది.
కేవైసీ వివరాలను ఆన్లైన్లో ఎలా అప్‌‌‌‌డేట్ చేయాలంటే...
అడ్రస్ మారకుంటే.. గతంలో సమర్పించిన కేవైసీ పత్రాలే సరిపోతాయి. ఇలాంటి సందర్భాల్లో మీ కేవైసీని రెన్యువల్ చేసుకోవడానికి సెల్ఫ్-డిక్లరేషన్‌‌‌‌ను సమర్పించవచ్చు. కేవలం చిరునామా మారితే మాత్రం డిజిటల్ఛానెల్‌‌‌‌లలో ఏదో ఒక దాని ద్వారా కొత్త చిరునామాలను అందించవచ్చు. ఆ తర్వాత రెండు నెలల్లో బ్యాంక్ డిక్లేర్డ్ అడ్రస్ వెరిఫికేషన్ చేపడుతుందని ఆర్బీఐ సర్క్యులర్‌ పేర్కొంది. కేవైసీ డాక్యుమెంట్ చెల్లుబాటు గడువు ముగిసినా లేదా సమర్పించిన కేవైసీ డాక్యుమెంట్ ఇకపై అధికారికంగా చెల్లుబాటు అయ్యే డాక్యుమెంట్ కాకపోయినా (ఓవీడీ) బ్యాంకుకు వెళ్లి ఓవీడీ లిస్టులో పేర్కొన్న వాటిలో ఏదో ఒక డాక్యుమెంటు అందజేయాలి. హెచ్డీఎఫ్సీ బ్యాంక్ కస్టమర్లు https://www.hdfcbank.com/personal/useful-links/important-messages/re-kyc-update లింక్ ద్వారా వారి కేవైసీని ఆన్లైన్లో అప్‌‌‌‌డేట్ చేయవచ్చు.
ఐసీఐసీఐ బ్యాంక్ కస్టమర్లు తమ కేవైసీ వివరాలను ఆన్లైన్లో అప్‌‌‌‌డేట్ చేయడానికి ఐమొబైల్ యాప్‌‌‌‌ని ఉపయోగించవచ్చు. ఈ బ్యాంకు కస్టమర్లు ముందుగా ఐమొబైల్ యాప్‌‌‌‌లో రిజిస్టర్ చేసుకోవాలి. తరువాత ఐడీ, పాస్ట్వర్డ్స్ ఉపయోగించి లాగిన్ కావాలి. మొబైల్ బ్యాంకింగ్ డ్యాష్‌‌‌‌బోర్డ్‌‌‌‌లో ‘అప్‌‌‌‌డేట్ కేవైసీ’ బ్యానర్ కనిపిస్తుంది. దానిని క్లిక్ చేయడం ద్వారా కేవైసీ అప్డేషన్ ప్రక్రియను ప్రారంభించవచ్చు. ఇందుకు కొద్ది సమయమే పడుతుంది. కేవైసీ అప్డేషన్ నియమాలను పాటించకపోతే ఇబ్బందులు తప్పవు. సంబంధిత కస్టమర్ బ్యాంకు లావాదేవీలపై పరిమితి విధింవచ్చు. లేదా బ్యాంకింగ్ ఖాతాను తాత్కాలికంగా నిలిపివేసే అవకాశాలూ ఉంటాయి. బ్యాంక్ ఖాతాతో లావాదేవీలను నిర్వహించడానికి ఉపయోగపడకపోవచ్చు. కేవేసీ అప్‌‌‌‌డేట్ చేయకపోవడం ఖాతా మూసివేయడానికి కూడా దారితీయవచ్చని ఆర్బీఐ హెచ్చరించింది. ఇలాంటి చర్యలు తీసుకునే ముందు.. కేవైసీని అప్‌‌‌‌డేట్ చేసుకోవాలని ఖాతాదారునికి బ్యాంక్ సూచిస్తుంది.
