జగిత్యాల రూరల్, వెలుగు: యంగ్ ఇండియా ఇంటిగ్రేటెడ్ రెసిడెన్షియల్ స్కూళ్లను రాష్ట్ర ప్రభుత్వం ప్రతిష్టాత్మకంగా ఏర్పాటు చేస్తోందని జగిత్యాల ఎమ్మెల్యే సంజయ్ కుమార్ అన్నారు. జగిత్యాల నియోజకవర్గంలో తాటిపల్లి శివారులో 25 ఎకరాల్లో రూ.200 కోట్లతో నిర్మించే యంగ్ఇండియా స్కూల్ పనులను శుక్రవారం అధికారులు, ప్రజాప్రతినిధులతో కలిసి ఎమ్మెల్యే పరిశీలించారు.
ఈ సందర్భంగా మాట్లాడుతూ.. పేద, మధ్యతరగతి కుటుంబాల విద్యార్థులకు నాణ్యమైన విద్యతో పాటు వసతి, భోజనం, క్రీడలు, నైపుణ్యాభివృద్ధి వంటి సౌకర్యాలను ఒకే ప్రాంగణంలో అందించడం ఈ స్కూళ్ల ప్రధాన ఉద్దేశ్యమన్నారు. 2500 మంది విద్యార్థులకు ప్రాథమిక స్థాయి నుంచే ఆధునిక విద్యా సదుపాయాలు అందించనున్నట్లు తెలిపారు. కార్యక్రమంలో రూరల్ తహసీల్దార్ హకీమ్, ఏఈలు శశి, ధనుంజయ్, ఏఎంసీ చైర్మన్ గడ్డం నారాయణ రెడ్డి, సర్పంచులు గంగారెడ్డి, రాజేందర్ తదితరులు పాల్గొన్నారు.
