- 26 ఏండ్ల కింద తన తండ్రిని చంపిన మాజీ మావోయిస్ట్‌‌‌‌ను హత్య చేసిన యువకుడు
- యూట్యూబ్ ఛానల్‌ ఇంటర్వ్యూ ద్వారా విషయం తెలుసుకొని హత్య
- సిరిసిల్ల జిల్లా వేములవాడ అర్బన్‌ మండలంలో ఘటన
వేములవాడ, వెలుగు : ఇరవై ఆరేండ్ల కింద జరిగిన తన తండ్రి హత్యకు.. కొడుకు ప్రతీకారం తీర్చుకున్నాడు. తన తండ్రిని మాజీ మావోయిస్ట్‌ సిద్ధన్నే చంపాడని ఓ యూట్యూబ్ ఛానల్‌ ఇంటర్వ్యూ ద్వారా తెలుసుకున్న సదరు యువకుడు.. ప్లాన్‌ ప్రకారం మరోసారి ఇంటర్వ్యూ పేరుతో అతడిని రప్పించి హత్య చేశాడు. ఈ ఘటన సిరిసిల్ల జిల్లా వేములవాడ అర్బన్‌ మండలంలో వెలుగు చూసింది.
పోలీసులు తెలిపిన వివరాల ప్రకారం... సిరిసిల్ల జిల్లా ఎల్లారెడ్డిపేట మండలం వీర్నపల్లికి చెందిన జక్కుల అంజయ్యను ఇన్‌‌‌‌ఫార్మర్‌ నెపంతో 1999లో పీపుల్స్ వార్‌ నాయకులు హత్య చేశారు. తర్వాత అంజయ్య కుటుంబ సభ్యులు జగిత్యాలకు వెళ్లి అక్కడే ఉంటున్నారు. ఇదిలా ఉండగా.. తంగలపల్లి మండలం గండిలచ్చపేటకు చెందిన బల్లెపు నర్సయ్య (58) అలియాస్‌ సిద్ధన్న గతంలో పీపుల్స్ వార్‌‌‌‌లో దళ నాయకుడిగా పనిచేశాడు.
ఇతడు ఇటీవల ఓ ట్యూబ్‌ ఛానల్‌‌‌‌కు ఇంటర్వ్యూకు ఇస్తూ... జక్కుల అంజయ్యను తానే హత్య చేశానని చెప్పాడు. ఈ వీడియోను చూసిన సంతోష్‌.. సిద్ధన్నను ఎలాగైనా హత్య చేయాలని నిర్ణయించుకున్నాడు. ఈ క్రమంలో మూడు నెలల నుంచి సిద్ధన్నతో పరిచయం పెంచుకున్నాడు. ‘నేను ఓ యూట్యూబ్ ఛానల్‌ పనిచేస్తాను.. మీ ఇంటర్వ్యూ కావాలి.. అడవి లాగా ఉండే వేములవాల అర్బన్‌ మండలం అగ్రహారం గుట్టల వద్దకు రండి’ అని సిద్ధన్నను సంతోష్‌ నమ్మించాడు. దీంతో ఇద్దరూ గురువారం రాత్రి అగ్రహారం గుట్ట వద్దకు చేరుకున్నారు. ఇద్దరూ కలిసి అక్కడే కల్లు తాగారు.
అనంతరం సంతోష్‌ పక్కనే ఉన్న బండరాయితో కొట్టి సిద్ధన్నను హత్య చేసి అక్కడి నుంచి వెళ్లిపోయాడు. సంతోష్‌ జగిత్యాల పోలీసుల ఎదుట లొంగిపోయినట్లు తెలిసింది. విషయం తెలుసుకున్న పోలీసులు ఘటనాస్థలానికి చేరుకొని సిద్ధన్న డెడ్‌‌‌‌బాడీని వేములవాడ ఏరియా హాస్పిటల్‌‌‌‌కు తరలించారు. సిరిసిల్ల ఎస్పీ మహేశ్‌ బి గీతే హాస్పిటల్‌‌‌‌కు వచ్చి వివరాలు తెలుసుకున్నారు. కేసు నమోదు చేసినట్లు సీఐ వీరప్రసాద్‌ తెలిపారు.
శంభునిపల్లిలో గుర్తుతెలియని యువకుడి హత్య
జమ్మికుంట, వెలుగు : కరీంనగర్‌ జిల్లా జమ్మికుంట మండలంలోని శంభునిపల్లిలో ఓ గుర్తు తెలియని యువకుడు హత్యకు గురయ్యాడు. పోలీసులు తెలిపిన వివరాల ప్రకారం... శంభునిపల్లి గ్రామానికి చెందిన తిప్పారపు శ్రీనివాస్‌‌‌‌కు చెందిన పొలంలో శుక్రవారం ఓ గోనె సంచిలో మృతదేహం కనిపించింది. దీంతో పోలీసులకు సమాచారం ఇవ్వడంతో వారు ఘటనాస్థలానికి చేరుకొని పరిశీలించారు.
సుమారు 32 సంవత్సరాలు గల యువకుడిని రెండు, మూడు రోజుల కింద తాళ్లతో బంధించి హత్య చేసిన అనంతరం ప్లాస్టిక్‌ కవర్‌, గోనె సంచిలో చుట్టి ఇక్కడ పడేసి ఉంటారని పోలీసులు గుర్తించారు. విలేజ్‌ సెక్రటరీ ఉప్పుల ప్రవీణ్‌ ఫిర్యాదుతో కేసు నమోదు చేసినట్లు సీఐ రామకృష్ణ గౌడ్‌ తెలిపారు. క్లూస్‌ టీమ్‌‌‌‌ను రప్పించి పూర్తి వివరాలు సేకరిస్తున్నామని నిందితులను త్వరలోనే పట్టుకుంటామని సీఐ వెల్లడించారు.
