శ్రామికశక్తికి తోడుగా నూతన కార్మిక చట్టాలు

భారతదేశం శ్రమపై ఆధారితమైన దేశం.  కార్మికులు, ఉద్యోగుల  సంక్షేమం అనేది చాలా కీలకమైన అంశం.  భారతదేశంలో ఇప్పటివరకు అమల్లో ఉన్న కార్మిక చట్టాలు స్వాతంత్ర్యానికి ముందు, స్వాతంత్ర్యం సిద్ధించిన తొలి రోజుల్లో రూపొందించినవి. అప్పటి పని వ్యవస్థ, ఉద్యోగాల తీరు,  పరిశ్రమల విధానాలు  ప్రస్తుత పరిస్థితికి పూర్తి భిన్నంగా ఉండేవి. 

 ఈ అంశాలను పరిగణనలోకి తీసుకున్న ప్రధాని మోదీ ప్రభుత్వం ఆధునికత లోపించిన 29 కార్మిక చట్టాల స్థానంలో నూతన కార్మిక చట్టాలను తీసుకువచ్చింది.  వేతనాల కోడ్- 2019,  సామాజిక భద్రతా కోడ్- 2020,  పారిశ్రామిక సంబంధాలు కోడ్- 2020, వృత్తి భద్రత, ఆరోగ్యం, పని పరిస్థితుల కోడ్- 2020ను ఈ నెల 21 నుంచి 

అమల్లోకి  తీసుకొచ్చింది. ఈ  నాలుగు చట్టాలు గత 29 చట్టాల్లో ఉన్న లోపాలను సవరించి  కార్మికులకు,  పరిశ్రమలకు భారమైన విధానాలను తొలగిస్తూ ఆత్మ నిర్భర్​ భారత్​ నిర్మాణానికి,  కార్మికుల సంక్షేమానికి ఉపయోగపడేలా తీర్చిదిద్దారు.  ప్రధానిగా  మోదీ  బాధ్యతలు స్వీకరించినప్పటి నుంచి  కార్మికుల సంక్షేమం కోసం అనునిత్యం అనేక నూతన యోజనలను  ప్రవేశపెడుతున్నారు.  కార్మికుల కష్టాన్ని, గౌరవాన్ని ఎల్లప్పుడూ నిలబెట్టడంలో వారికి తగిన ప్రాధాన్యత కల్పిస్తూనే ఉన్నారు.

నూ తనంగా అమలవుతున్న నాలుగు కార్మిక చట్టాలు సుదీర్ఘకాలంగా భారతదేశం కోరుకుంటున్న ఆధునిక ప్రయాణానికి అనుకూలంగా ఉన్నాయి.  ప్రపంచదేశాల స్థాయిలో భారత కార్మికులను, పరిశ్రమలను తీర్చిదిద్దే శక్తిని కలిగి ఉన్నాయి. ఉద్యోగ సామర్థ్యాన్ని , ఉత్పత్తి సామర్థ్యాన్ని,   స్వయం సమృద్ధిని,  కార్మికుల సంక్షేమానికి మరింత ప్రాధాన్యతను కలిగించే దిశగా ఉన్నాయి.  గత చట్టాలు ఉద్యోగులకు నియామకపత్రం మంజూరును తప్పనిసరి చేయలేదు.  సామాజిక  భద్రతను  పరిమితం చేశాయి.  కనీస వేతన నియమాన్ని కొన్ని పరిశ్రమలకు ఉద్యోగాలకు మాత్రమే పరిమితం చేశాయి. 

ఉద్యోగులకు ఆరోగ్య భద్రత కల్పించలేదు.  సరైన సమయంలో కార్మికులకు వేతనాలు చెల్లించడాన్ని సూచించలేదు. మహిళల  సాధికారతను దెబ్బతిస్తూ  రాత్రివేళల్లో  వారిని పనిచేయించడానికి కొన్ని వృత్తుల్లో నియమించడం పరిమితం చేశాయి. ఈఎస్ఐ కవరేజ్ కూడా నోటిఫికేషన్ చేసిన పరిశ్రమలకు పరిమితమై 10 మంది కంటే తక్కువగా ఉద్యోగులు ఉన్న పరిశ్రమలు ఈ పరిధిలోకి రాకుండా నియమాలు ఉండేవి. పరిశ్రమలు అనేక  రిటర్న్ లైసెన్సులు వివిధ ప్రక్రియలను పాత చట్టాలు క్లిష్టతరం చేశాయి. 

లోపభూయిష్టమైన ఈ చట్టాలు ఉద్యోగులకు, కార్మికులకు, పరిశ్రమలకు, యాజమాన్యాలకు మధ్య ఘర్షణ పూరితమైన వాతావరణాన్ని పెంచాయి. సంస్కరణల స్థానంలో సంఘర్షణను  ప్రేరేపించాయి.  అప్పటి  ప్రభుత్వాలు కూడా ఓటు బ్యాంకు రాజకీయాల కోసం పరిశ్రమలు  నెలకొల్పేవారిని కార్మికులకు శత్రువులుగా చూపెట్టి అభివృద్ధి నిరోధక రాజకీయాన్ని చేశాయి. ఈ అన్ని అంశాలను పరిగణనలోకి తీసుకున్న మోదీ ప్రభుత్వం కొత్త చట్టాలను తీసుకువచ్చింది.  

కొత్త కార్మికచట్టాలతో శ్రామిక సాధికారత 

నూతన శ్రామిక చట్టాలలో ప్రతి ఉద్యోగికి నియామక పత్రాలను తప్పనిసరి చేయడం వలన పారదర్శకత పెరగడంతోపాటు ఉద్యోగ భద్రత అందుబాటులోకి వస్తుంది.  సామాజిక భద్రత కోడ్ 2020  ప్రకారం గిగ్ కార్మికులు,  ఫ్లాట్​ఫారం  కార్మికులు సహా  అన్ని రకాల  కార్మికులకు  పీఎఫ్, ఈఎస్ఐ లాంటి  సామాజిక భద్రతాప్రయోజనాలు అందుతాయి.  వేతన కోడ్  2019  ప్రకారం  కార్మికులకు కనీస వేతనంతోపాటు సరైన సమయంలో జీతాల చెల్లింపు తప్పనిసరి చేయడంతో కార్మికులకు ఆర్థిక భద్రత లభిస్తుంది.

40 సంవత్సరాలు పైబడిన కార్మికులకు ఉచితంగా ఆరోగ్య పరీక్షలు నిర్వహించడం వలన ఆరోగ్య భద్రత లభించి తద్వారా ఆరోగ్య భారత నిర్మాణానికి బాటలు పడతాయి. మహిళలకు సమాన అవకాశాలు కల్పించడంలో భాగంగా వారి అనుమతితో తగిన భద్రతా నియమాలను పాటించి రాత్రివేళతోపాటు అన్ని రకాల ఉద్యోగాలలో వారు పని చేయడానికి నూతన చట్టాలు అనుమతిని ఇచ్చాయి.  దీని ద్వారా మహిళలకు అనేక అవకాశాలు లభించడంతో పాటు అధిక మొత్తంలో వేతనాలు లభించనున్నాయి. 

కార్మికులకు భద్రత, ఆర్థిక స్థిరత్వం

ఈఎస్ఐ కవరేజ్ దేశవ్యాప్తంగా విస్తరించడం వలన గతానికి భిన్నంగా 10 మంది కంటే తక్కువగా ఉద్యోగులు ఉన్న సంస్థలకు కూడా ప్రయోజనం కలుగుతుంది.   పరిశ్రమలకు మేలు చేకూరుస్తూ  దేశవ్యాప్తంగా  లైసెన్సింగ్ రిటర్న్స్ ప్రక్రియను  సరళీకృతం చేయడంతో పరిశ్రమల నిర్వహణ మరింత సులభతరం కానుంది.  శాశ్వత ఉద్యోగులతో  సమానంగా ఇతర ఉద్యోగులకు కూడా సెలవులు,  సామాజిక భద్రతలాంటి అంశాలలో మేలు చేకూరడంతోపాటు  గ్రాట్యుటీ  కేవలం సంవత్సరం తర్వాత  అందుబాటులోకి రావడం కీలక పరిణామం.

 2017– 18లో ఉద్యోగాల సంఖ్య 47.5 కోట్లు ఉండగా 2023–-24 నాటికి 64.33 కోట్లకు చేరింది.  నూతన కార్మిక చట్టాలు దేశంలో కార్మిక వాతావరణాన్ని,  పరిశ్రమల సామర్థ్యాన్ని సమతుల్యం చేసే శక్తిని కలిగి ఉన్నాయి.    ఈ చట్టాలు దేశాభివృద్ధికి, ఆధునిక కార్మికవ్యవస్థ నిర్మాణానికి,  మరింతగా తోడ్పాటును అందిస్తాయి.

శ్రామికశక్తికి మోదీ అగ్రతాంబూలం

ప్రధాని మోదీ  నిరంతరం తనను తాను ప్రధాన సేవక్​గా భావిస్తూ ఓ నిరంతర కార్మికుని మాదిరిగా దేశసేవలో నిమగ్నమై ఉన్నారు.  కాశీ  కారిడార్ నుంచి అయోధ్య రామాలయ నిర్మాణం వరకు,  మెట్రో నిర్మాణాల నుంచి రైల్వే ప్రాజెక్ట్ వరకు ప్రతి అంశంలో కార్మికుల శ్రమను గుర్తించి నేరుగా కార్మికులను సత్కరించే వ్యక్తిత్వాన్ని కలిగి ఉన్నారు. 

 శ్రమయేవ జయతే అనే నినాదాన్ని జీవన విధానంలో సాక్షాత్కారం చేస్తూ  ముందుకు సాగుతున్నారు. మోదీ ప్రధానిగా బాధ్యతలు స్వీకరించిన 11 సంవత్సరాలలో అనేక రంగాలలో వివిధ రకాల సంస్కరణలు చేపట్టి  దేశాన్ని అభివృద్ధిపథంలో నడిపిస్తున్నారు.  నూతన కార్మికచట్టాలు భారతదేశ వికసిత ప్రయాణంలో కీలక చారిత్రాత్మక ఘట్టంగా మారాయి.  

- తూళ్ల వీరేందర్ గౌడ్, రాష్ట్ర ప్రధాన కార్యదర్శి,బీజేపీ, తెలంగాణ