ఉమ్మడి మహబూబ్ నగర్ జిల్లాలో చివరి రోజు జోరుగా నామినేషన్లు

• రాత్రి పొద్దుపోయేంత వరకు కొనసాగిన నామినేషన్​ పక్రియ
• అన్ని పార్టీల్లోనూ రెబల్స్​ బెడద

వెలుగు, నెట్​వర్క్: మొదటి దశ ఎన్నికలు జరగనున్న పంచాయతీల్లో చివరి రోజు పెద్ద సంఖ్యలో నామినేషన్లు దాఖలయ్యాయి. ఉదయం నుంచే  క్లస్టర్​ సెంటర్ల వద్ద బారులుదీరిన అభ్యర్థులు సర్పంచ్, వార్డు మెంబర్​ స్థానాలకు పోటాపోటీగా నామినేషన్లు దాఖలు చేశారు. సాయంత్రం 5 గంటల వరకు వచ్చిన అభ్యర్థులను అనుమతించిన ఆఫీసర్లు అర్ధరాత్రి దాకా నామినేషన్లు తీసుకున్నారు. తొలి విడత నామినేషన్ల దాఖలు ప్రక్రియ శనివారంతో ముగియగా, ఆదివారం నామినేషన్ల పరిశీలనకు అధికారులు ఏర్పాట్లు పూర్తి చేశారు.

సాయంత్రం 5 గంటల తర్వాత  స్క్రూటినీ పూర్తి చేసి, చెల్లుబాటయ్యే అభ్యర్థుల లిస్ట్​ రెడీ చేస్తారు.  నామినేషన్‌‌  తిరస్కరణకు గురైతే డిసెంబర్​1 సాయంత్రం వరకు ఆర్డీవోకు అప్పీల్  చేసుకునే అవకాశం కల్పించారు. డిసెంబర్​ 3న  మధ్యాహ్నం3 గంటల వరకు నామినేషన్ల ఉపసంహరణకు గడువు ఉంది. అదే రోజు మధ్యాహ్నం 3 గంటల తర్వాత గ్రామాలవారీగా బరిలో ఉన్న అభ్యర్థుల తుది జాబితాను ఎన్నికల అధికారులు ప్రకటిస్తారు.

కాంగ్రెస్​లో పెరుగుతున్న పోటీ...

సర్పంచ్​ పదవులను ఆశిస్తున్న నాయకుల సంఖ్య పెరగడంతో ఎమెల్యేలు సర్ది చెప్పలేక పోతున్నారు.పెద్ద గ్రామాలు, మేజర్ గ్రామ పంచాయితీల్లో సర్పంచ్  పదవి కోసం అధికార పార్టీలో తీవ్ర పోటీ నెలకొంది. నాగర్​కర్నూల్​ జిల్లా కల్వకుర్తి, వెల్డండ, వంగూరు, తాడూరు, తెల్కపల్లి, ఊర్కోండ మండలాల్లోని పెద్ద గ్రామాల్లో సర్పంచ్​ పదవులకు డిమాండ్  పెరిగింది.కొన్ని గ్రామాల్లో ఇద్దరు, ముగ్గురు పోటీ పడుతుండడంతో ఎమ్మెల్యేలు ఎటు తేల్చలేక నిర్ణయం వారికే వదిలేస్తున్నారు. ఇదిలాఉంటే సర్పంచ్​ అభ్యర్థుల ఎంపిక, ఎలక్షన్​ మేనేజ్​మెంట్​ ప్లానింగ్​లో కాంగ్రెస్​ ముందుంటే పదేళ్లు రాష్ట్రంలో అధికారం చలాయించిన బీఆర్ఎస్​కు చెందిన పల్లె నేతలు తమ పార్టీకి చెందిన మాజీ ఎమ్మెల్యేలు, ఎమ్మెల్సీలు రాక పరేషాన్​లో ఉన్నారు.

రెబల్స్ గా రంగంలోకి..

ప్రధాన పార్టీల్లో ముందు నుంచి సర్పంచ్​ పదవులు ఆశిస్తున్న వారు చివరి రోజు రెబల్స్​గా నామినేషన్లు వేశారు. మహబూబ్​నగర్​ జిల్లా నవాబుపేట మండలం పల్లెగడ్డలో చివరి రోజు నామినేషన్​ పర్వం ఆసక్తిగా మారింది. శనివారం ఉదయం యూనానిమస్​ చేయాలని నిర్ణయించి బీసీ వర్గానికి చెందిన బాలరాజును ఎన్నుకున్నారు. అయితే ఉప సర్పంచ్​ పదవి విషయంలో తేడా రావడంతో సర్పంచ్​ పదవికి నామినేషన్​ దాఖలు చేశారు. ఇదే మండలం యన్మన్​గండ్ల గ్రామ పంచాయతీ జనరల్​కు రిజర్వ్ అయింది. అయితే బీఆర్ఎస్​ కీలక లీడర్ శేఖర్​రెడ్డి ఈ జీపీ నుంచి పోటీకి ప్రయత్నించగా, మాజీ ఎమ్మెల్యే బీసీ వర్గానికి చెందిన లీడర్​కు మద్దతు ఇచ్చారు. దీంతో ఆయన కాంగ్రెస్​ మద్దతుతో శనివారం నామినేషన్​ దాఖలు చేశాడు. దీనిని వ్యతిరేకించిన చాకలి శేఖర్​ రెబల్​గా రంగంలోకి దిగారు.

ఏకగ్రీవాలకు తూట్లు!

ఏకగ్రీవ సర్పంచ్​ పదవులకు తూట్లు పడుతున్నాయి. గతంలో ఎన్నడూ లేనివిధంగా జోగులాంబ గద్వాల జిల్లాలో సర్పంచ్  పదవులకు వేలం పాటలు జరిగాయి. కాంగ్రెస్ లోని వర్గాల మధ్య సయోధ్య కుదరకపోవడం, ప్రతిపక్ష పార్టీలు కొన్ని చోట్ల పోటీకి దిగడంతో ఏకగ్రీవాలకు బ్రేక్​ పడినట్లయింది. వేలం పాటలో గట్టు మండలం మిట్టదొడ్డి గ్రామ సర్పంచ్ పదవికి రూ.90 లక్షలు, తారాపురం గ్రామపంచాయతీ సర్పంచ్ పదవికి రూ.16 లక్షలు, ఆరగిద్ద సర్పంచ్  పదవికి రూ.31 లక్షలు, ముచ్చోనిపల్లి సర్పంచ్  పదవికి రూ.16 లక్షలు, తుమ్మలపల్లి సర్పంచ్  పదవికి రూ.30 లక్షలు, పెంచికల్​పాడు సర్పంచ్  పదవితో పాటు ఉప సర్పంచ్  పదవికి రూ.40.50 లక్షలు. 

గద్వాల మండలం వీరాపురం సర్పంచ్  పదవికి రూ.50 లక్షలు, ఏడుకొండపల్లి సర్పంచ్  పదవికి రూ.10 లక్షలు, కురువపల్లి సర్పంచ్  పదవికి రూ.45 లక్షలు, పూటాన్ పల్లి సర్పంచ్  పదవికి రూ.15 లక్షలు, ధరూర్ మండలం కొత్తపాలెం సర్పంచ్  పదవికి రూ.20.50 లక్షలు, కేటిదొడ్డి మండలం ఉమెచ్చల తండా సర్పంచ్ పదవికి రూ.12 లక్షలు, రంగాపురం సర్పంచ్ పదవికి రూ.15 లక్షలు ఇచ్చేందుకు పాట పాడి పదవులు దక్కించుకున్నారు. అయితే వివిధ కారణాలతో చివరి రోజు ఒకటి కంటే ఎక్కువగా నామినేషన్లు దాఖలయ్యాయి. ఇదిలాఉంటే చింతలకుంట సర్పంచ్  స్థానానికి నామినేషన్  వేసేందుకు వెళ్లిన జంగం బద్రి వద్ద నామినేషన్ పత్రాలను లాక్కొని చించివేసినట్లు ఆరోపణలు వచ్చాయి.