- లక్షలకు లక్షలు ఎగ్గొడుతున్న వైనం
భద్రాచలం, వెలుగు: మహిళా సాధికారతకు సర్కారు కోట్ల రూపాయలు విడుదల చేస్తుంటే వాటిని ఆఫీసర్లు, పెద్దోళ్లు కలిసి మింగేస్తున్నారు. భద్రాచలంలో తాజాగా ఓ టీఆర్‍ఎస్ మహిళా లీడర్ సుమారు రూ.5 లక్షలు బ్యాంకు లింకేజీ, రూ.1.50 లక్షల స్త్రీనిధి లోన్ తీసుకున్న విషయం వెలుగులోకి వచ్చింది. ఇది తమకు తెలియదని గ్రూపు సభ్యులు చెబుతుండగా.. రెండేళ్లుగా లోన్ చెల్లించడం లేదని ఐకేపీ(ఇందిరా క్రాంతి పథం) ఆఫీసర్లు అంటున్నారు. దీంతో బకాయిలు పేరుకుపోతున్నాయి. గతంలో కూడా భద్రాచలం టౌన్లో ఓ ఐకేపీ సీసీ గ్రామ సమాఖ్యల పేరిట రుణాలు దారి మళ్లించి వాటిని వడ్డీకి తిప్పాడు. అతను హత్యకు గురి కావడంతో ఈ స్వాహా పర్వం బయటపడింది.
ఇతను సుమారు రూ.50 లక్షలు తీసుకున్నాడని, తీసుకున్న వాటితో పాటు తాము కట్టిన డబ్బులను బ్యాంకుకు చెల్లించలేదని సభ్యులు ఫిర్యాదు చేశారు. ఇక ఐటీడీఏ రోడ్డులో మైక్రో ఫైనాన్స్ వేధింపులకు సూసైడ్ చేసుకున్న ఓ గ్రూపు నాయకురాలు కూడా సభ్యుల పేరిట రుణాలు తీసుకున్నారు. ఆ బకాయిలు కూడా అలాగే ఉన్నాయి. ప్రస్తుతం లక్షలాది రూపాయల బకాయిలు భద్రాచలం టౌన్లో పేరుకుపోయాయి.
గ్రామ దీపికలే కీ రోల్
ఐకేపీలో మహిళలకు లోన్ల మంజూరులో గ్రామదీపికలే కీ రోల్ పోషిస్తున్నారు. వారికి తెలిసే స్వాహా పర్వం సాగుతోంది. టౌన్లో ఓ గ్రూపులో సభ్యులు తప్పుకున్నారు. కానీ ఆ గ్రూపులో కొత్త సభ్యులను చేర్పించి ఓ మహిళా టీఆర్‍ఎస్ లీడర్ బ్యాంకు లింకేజీ, స్త్రీ నిధి రుణాలు సుమారు రూ.6.50 లక్షలు తీసుకున్నారు. ఆ సభ్యులకు కూడా రుణం వచ్చిన విషయం తెలియదు. రెండేళ్లుగా మీటింగ్‍లు లేవు. డబ్బులు కూడా రికవరీ కాకపోవడంతో ఐకేపీ ఆఫీసర్లు రంగంలోకి దిగేసరికి అసలు విషయం బయటపడింది. ఇదంతా గ్రామదీపికలకు తెలిసే జరుగుతోందనే ఆరోపణలున్నాయి. రుణాలు మంజూరైతే వీరికి కమీషన్ వస్తుంది. కమీషన్ల కక్కుర్తికి ఆశపడి కొందరు దొడ్డిదారిన పెద్దోళ్లకు లోన్లు ఇప్పిస్తున్నారు. అలాంటి వారు కట్టకుండా పేరుకుపోయిన బకాయిలు రూ.60 లక్షల నుంచి రూ.70 లక్షల వరకు ఉన్నాయి.
బకాయిలు వాస్తవమే
భద్రాచలం టౌన్లో ఒక గ్రూపు రూ.6.50 లక్షల బకాయి ఉంది. రెండేళ్లుగా లోన్లు చెల్లించడం లేదు. మేం అడిగితే వారి పేరు మీద వేరే వారు లోన్లు తీసుకున్నారని చెబుతున్నారు. సభ్యులకు తెలియకుండానే రుణం వెళ్లింది. త్వరలో చెల్లించేందుకు వారితో మాట్లాడుతున్నాం.- రాంబాబు, సీసీ, భద్రాచలం
