పెషావర్: పాకిస్తాన్లో టెర్రరిస్టులు మళ్లీ దాడులకు పాల్పడ్డారు. రీజినల్ పోలీస్ హెడ్ క్వార్టర్, చెక్ పోస్టుపై అటాక్ చేశారు. ఈ దాడుల్లో ఐదుగురు పోలీసులు ప్రాణాలు కోల్పోయారు. పోలీసుల కాల్పుల్లో నలుగురు మిలిటెంట్లు కూడా హతమయ్యారు. ఇటీవల ఖైబర్ పక్తుంఖ్వా ప్రావిన్స్లోని ఆర్మీ పోస్టుపై దాడి చేసి 23 మంది సైనికులను చంపేసిన టెర్రరిస్టులు.. ఇప్పుడు మళ్లీ అదే ప్రావిన్స్లో శుక్రవారం దాడులకు పాల్పడ్డారు. మొదట టంక్ జిల్లాలోని పోలీస్ హెడ్ క్వార్టర్స్పై అటాక్ చేశారు.
ఒక టెర్రరిస్టు ఆఫీస్ ఎంట్రెన్స్ వద్ద ఆత్మాహుతి దాడికి పాల్పడగా, మిగతా టెర్రరిస్టులు లోపలికి ప్రవేశించి కాల్పులు జరిపారు. ఈ దాడిలో ముగ్గురు పోలీసులు, ఎదురుకాల్పుల్లో నలుగురు మిలిటెంట్లు హతమయ్యారని అధికారులు తెలిపారు. ఖైబర్ జిల్లాలో పోలీస్ చెక్ పోస్టుపైనా టెర్రరిస్టులు దాడి చేశారని చెప్పారు. ఇక్కడ ఇద్దరు పోలీసులు చనిపోయారని, మరో ఆరుగురు గాయపడ్డారని పేర్కొన్నారు.
