- భారీ వర్షాల నేపథ్యంలో ప్రజలు అలర్ట్గా ఉండాలి
- సమస్య ఉంటే టోల్ఫ్రీ నంబర్1912కు సమాచారం అందించాలి
- టీజీఎన్పీడీసీఎల్మంచిర్యాల ఎస్ఈ ఉత్తమ్జాడే
- ప్రమాదాల నివారణకు పలు సూచనలు
మంచిర్యాల, వెలుగు: ఉమ్మడి జిల్లాలో అతి భారీ వర్షాలు కురుస్తున్న నేపథ్యంలో విద్యుత్ వినియోగదారులు, ముఖ్యంగా రైతులు కరెంట్తో జాగ్రత్త వహించాలని టీజీఎన్పీడీసీఎల్ మంచిర్యాల ఎస్ఈ ఉత్తమ్ జాడే సూచించారు. కరెంట్పనులు, రిపేర్లు సొంతంగా చేసుకోవద్దని, అవగాహనతో మెలగాలన్నారు. తెగిపడిన, వేలాడుతున్న, వదులుగా, తక్కువ ఎత్తులో ఉన్న వైర్లకు తాకరాదని, ప్రమాదకరంగా ఉంటే గమనించిన వెంటనే సంబంధిత సిబ్బందికి లేదా టోల్ ఫ్రీ నంబర్1912కు సమాచారం అందించాలన్నారు. ఈ సందర్భంగా ఆయన పలు సూచనలు చేశారు.
పొలాల్లో రైతులు అలర్ట్గా ఉండాలి
రైతులు పొలాల్లో నాణ్యతలేని మోటార్లు వినియోగించినప్పుడు మోటార్లు, ఫుట్ వాల్వులు, సర్వీస్వైర్లకు ఇన్సులేషన్ సరిగా లేక కరెంట్సప్లై కావడం వల్ల ప్రమాదాలు జరుగుతున్నాయి. కాబట్టి కరెంట్ మోటార్లను, పైపులను, ఫుట్ వాల్వులను తాకొద్దు. వ్యవసాయ పంపుసెట్లకు, స్టార్టర్లకు తప్పనిసరిగా ఎర్తింగ్చేయాలి. వీటికి ఎర్తింగ్ లేకపోవడం చాలా ప్రమాదకరం. విద్యుత్ కంచెల వల్ల రైతులే కాకుండా ఇతరులు కూడా ప్రమాదాల బారినపడుతున్నారు. విద్యుత్ కంచెలు ఏర్పాటు చేయడం చట్టరీత్యా నేరం. ఎవరైనా ఇలాంటి ఫెన్సింగ్లు ఏర్పాటు చేస్తే పోలీసులకు ఫిర్యాదు చేయాలి.
మొబైల్ చార్జింగ్ పెట్టి తడి చేతులతో మాట్లాడం వల్ల షాక్కు గురై చనిపోతున్నారు. చార్జింగ్ బంద్ చేసి మాట్లాడాలి.
ఎవరికైనా కరెంట్ షాక్ కొడితే రక్షించాలన్న ఆతృతతో ఆ వ్యక్తిని ముట్టుకోవద్దు. షాక్కు గురైన వ్యక్తిని వేరు చేయడానికి కర్ర, ప్లాస్టిక్ వస్తువులు వాడాలి.
పశువులను మేతకు తీసుకెళ్లినప్పుడు ట్రాన్స్ఫార్మర్లు, పోల్స్ దగ్గరికి వెళ్లకుండా కాపరులు జాగ్రత్తలు తీసుకోవాలి. ఒకవేళ వైర్లు కిందపడి ఉంటే పశువులు వాటిని తాకకుండా చూడాలి.
రైతులు, వినియోగదారులు కరెంట్ పనులను సొంతంగా చేసుకోవద్దు. ట్రాన్స్ఫార్మర్ల దగ్గర ఫ్యూజులు మార్చడం, రిపేర్లు చేయడం, ఏబీ స్విచ్లు ఆపరేట్ చేయడం, కాలిన తీగలను సరిచేయడానికి విద్యుత్ సిబ్బంది సహకారం తీసుకోవాలి. లేదా అర్హత కలిగిన ఎలక్ట్రీషియన్తోనే రిపేర్లు, ఇతర పనులు చేయించుకోవాలి.
దండేలు, పోల్స్, వైర్లతో జాగ్రత్త
ఇండ్లలో బట్టలు ఆరేయడానికి చాలామంది జీఐ వైర్లను దండెంగా ఉపయోగిస్తున్నారు. వాటికి ఇన్సులేషన్ సరిగా లేకపోవడం వల్ల కరెంట్సప్లై జరిగి షాక్ కొట్టే ప్రమాదం ఉంది. వైర్లకు బదులుగా ప్లాస్టిక్ దండేలను ఉపయోగించాలి. పోల్నుంచి కరెంట్ సప్లై అయ్యే వైర్లను దండేలకు, ఇంటిముందు రేకులకు తగలకుండా జాగ్రత్తలు తీసుకోవాలి. ఇంటి వైరింగ్కు సరైన ఎర్తింగ్ చేయాలి. నాణ్యమైన ప్లగ్లు, సెల్ఫోన్ చార్జర్లను ఉపయోగించాలి. ఇండ్లలో, వ్యవసాయ మోటార్లకు నాణ్యమైన, అతుకులు లేని సర్వీస్ వైరును మాత్రమే వాడాలి.
