- పాకాల వన్యప్రాణుల అభయారణ్యంలోని 13.5 ఎకరాలపై ప్రభావం
- జింకలు, చిరుతలకు హాని కలగొచ్చని ఆందోళన
- 5 ఎకరాల్లో మాత్రమే గ్రిడ్ కేబుల్స్ వేసేలా అధికారుల ప్రణాళిక
హైదరాబాద్, వెలుగు: ఇంటింటికీ ఇంటర్నెట్అందించాలన్న రాష్ట్ర ప్రభుత్వ లక్ష్యానికి అటవీ, వన్యప్రాణుల సంరక్షణ రూపంలో చిక్కుముడులు ఏర్పడుతున్నాయి. టీ ఫైబర్ ఆధ్వర్యంలో చేపడుతున్న ఫైబర్ గ్రిడ్ ప్రాజెక్ట్తో పాకాల వన్యప్రాణుల అభయారణ్యంలోని 13.5 ఎకరాల అటవీ భూములపై ప్రభావం పడుతుందని తెలుస్తున్నది. ఫైబర్ గ్రిడ్ కేబుల్స్ మహబూబాబాద్ జిల్లాలోని పాకాల అభయారణ్యం నుంచే వేయాల్సి ఉన్నది.
ఈ నేపథ్యంలోనే అభయారణ్యంలో ఉన్న వివిధ రకాల జింకలు, చిరుత పులులు, అడవి పందుల వంటి జంతువులకు హాని కలిగిస్తాయన్న ఆందోళన వ్యక్తమవుతున్నది. ఈ క్రమంలోనే ప్రాజెక్ట్ కోసం నేషనల్ బోర్డ్ ఫర్ వైల్డ్లైఫ్ (ఎన్బీడబ్ల్యూఎల్) నుంచి అనుమతులు తీసుకోవాల్సి ఉంటుందని అధికారులు చెబుతున్నారు. అయితే, అన్ని అంశాలను దృష్టిలో పెట్టుకుని ప్రాజెక్టును చేపడతామని సంబంధిత అధికారులు చెప్తున్నారు. ఇప్పటికే ఎన్బీడబ్ల్యూఎల్ అనుమతుల కోసం అప్లై చేసుకున్నట్టు తెలిసింది.
అడవి జంతువులపై ప్రభావం పడకుండా చర్యలు
పాకాల వన్యప్రాణుల అభయారణ్యంలోని 13.5 ఎకరాల్లో కేవలం 5 ఎకరాల్లో మాత్రమే గ్రిడ్ కేబుల్స్ను వేస్తామని అధికారులు అంటున్నారు. కేబుల్స్ కోసం చెట్లను నరకబోమని చెప్తున్నారు. గ్రిడ్ కేబుల్స్ కోసం అటవీ భూములను డైవర్ట్ చేయడం తప్పదని పేర్కొంటున్నారు. అయితే, ఈ ప్రాజెక్ట్ వల్ల అడవి జంతువులపై ప్రభావం పడకుండా చర్యలు తీసుకుంటామని స్పష్టం చేస్తున్నారు. డిజిటల్ తెలంగాణ ఇనిషియేటివ్లో భాగంగా రాష్ట్ర ప్రభుత్వం ఇంటింటికీ ఇంటర్నెట్ సౌకర్యాన్ని కల్పించాలనుకుంటున్నదని, దీనిని ముందుకు తీసుకెళ్లాల్సిన అవసరం ఎంతైనా ఉందని చెప్తున్నారు.
కేబుల్స్ను ఎక్కువ శాతం రోడ్ల పక్క నుంచి వేస్తుంటారని.. అయితే, కొన్ని రోడ్లు అడవుల మధ్య నుంచి వెళ్తుండడంతోనే సమస్య ఏర్పడిందని, దానికి అటవీ అనుమతులు అవసరమని అంటున్నారు. కేబుల్స్ కోసం అర మీటరు వెడల్పుతోనే గుంతలు తవ్వుతారని, దాంతో చెట్లను కొట్టేయాల్సిన అవసరం రాదని చెప్తున్నారు. నష్ట నివారణకు కాంపా అకౌంట్లో కొంత మొత్తాన్ని జమ చేయాల్సిందిగా వైల్డ్ లైఫ్ అధికారులు అడిగినట్టు తెలిసింది. గుంతలను తవ్వే పనిని ఉదయం 8 గంటల నుంచి సాయంత్రం 5 గంటల వరకే చేసేలా చర్యలు తీసుకుంటున్నట్టు తెలుస్తున్నది.
