- అమెరికాలోని ఫ్లోరిడాలో ఘటన
ఫ్లోరిడా: అమెరికాలో మరోసారి దుండగులు తుపాకులతో రెచ్చిపోయారు. ఫ్లోరిడాలోని లేక్ ల్యాండ్లో నలుగురు వ్యక్తులు కారులో నుంచి విచక్షణారహితంగా జరిపిన కాల్పుల్లో 10 మందికి గాయాలయ్యాయి. వీరిలో ఇద్దరి పరిస్థితి విషమంగా ఉంది. ఈవివరాలను స్థానిక పోలీసు విభాగం కూడా ధ్రువీకరించింది.
డార్క్ బ్లూ కలర్ నిస్సాన్ లో వచ్చిన నలుగురు దుండగులు.. కారు నడుస్తుండగానే నాలుగు కిటికీ అద్దాలను కిందికి దింపి, తుపాకులతో ఫైరింగ్ చేశారని దర్యాప్తులో గుర్తించారు. అనంతరం కారు వేగాన్ని పెంచి పరారయ్యారని పోలీసులు తెలిపారు. ఈ ఘటనలో గాయాలపాలైన వారంతా 20 నుంచి 35 ఏళ్లలోపు వారేనని చెప్పారు. ఆ కారు ఎవరిది ? అందులోని వారెవరు ? అనేది తెలుసుకునే దిశగా దర్యాప్తు జరుపుతున్నట్లు వెల్లడించారు. అయితే ఈ కాల్పులు జరిగిన చోట మారిజ్వానా అనే డ్రగ్ పడి ఉన్నట్లు గుర్తించారు.
